ސިނގިރޭޓް ޖެނެރޭޝަނަލް ބޭންގައި ރައީސްގެ ހުށަހެޅުއްވުން ހިއްސާކުރައްވައިފި

އައިމިނަތު ޝިޔާޒާ

02 އޭޕްރީލް 2025 - 21:16

0 comments

ރައްޔިތުންނާ އެކު ޕޮޑްކާސްޓުގައި ރައީސް ވާހަކަފުޅު ދައްކަވަނީ. -- ފޮޓޯ | ރައީސް އޮފީސް

ދުންފަތުގެ އިސްތިއުމާލުކުރުމަށް އަލަށް ވަންނަ ކުދިން އެކަމުން ދުރުކުރުމަށް "ޖެނެރޭޝަން ބޭން"ގެ ގޮތުގައި ފިޔަވަޅު އަޅން ރައީސް ޑރ. މުހައްމަދު މުއިއްޒު ހުށަހަޅުއްވާ ގޮތްތައް އެމަނިކުފާނު ހިއްސާ ކުރައްވައިފި އެވެ.

"ރައްޔިތުންނާ އެކު" ސިލްސިލާ ޕޮޑްކާސްޓްގެ ދެ ވަނަ އެޕިސޯޑްގައި ރައީސް މުއިއްޒު ވިދާޅުވީ ޖެނެރޭޝަނަލް ބޭންއާ ގުޅޭ ކެބިނެޓް ކަރުދާހެއް ދިރާސާކޮށް ތައްޔާރުކުރުމަށް ހެލްތު މިނިސްޓަރު އަބްދުﷲ ނާޒިމް އިބްރާހީމްއާ ހަވާލުކުރައްވާފައިވާ ކަމަށެވެ.

އެ ކަރުދާސް ތައްޔާރުކުރުމުގައި ޑޮކްޓަރުންނާއި އަދިވެސް އެނޫންވެސް ފަރާތްތަކުގެ މަޝްވަރާވެސް ހޯދުމަށް އިރުޝާދު ދެއްވާފައިވާ ކަމަށް ރައީސް މުއިއްޒު ވިދާޅުވި އެވެ.

ޖެނެރޭޝަނަލް ބޭން ކަނޑައެޅުމުގައި ރައީސް ހުށައަޅުއްވާ ގޮތްތައް

2007 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
2004 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
2000 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

"އެކުދިން ހަމަ އުމުރުން ދުވަސްވީ ވަރަކަށް ވެސް މަނާވާނެ. ކުރިއަށް އޮތްތާ އުމުރަގަ ވެސް ނުބޮވޭނެ ސިނގިރެޓެއް، ދުންފަތުގެ އިސްތިއުމާލެއް ނުކުރެވޭނެއޭ ގާނޫނުގެ ދަށުން،" ރައީސް ވިދާޅުވި އެވެ.

ރައީސް ވިދާޅުވީ މި އުމުރުފުރާތަކަކީ މިހާރު 18 އަހަރާއި 25 އަހަރާ ދެމެދުގެ މީހުން ކަމަށާއި، އެމީހުން ދުންފަތުގެ އިސްތިއުމާލު ކުރާތާ މާގިނަ ދުވަހެއް އަދި ނުވާނެ ކަމަށެވެ. އެހެންކަމުން އެމީހުން ދުންފަތުގެ ވަބާއިން ދުރުކުރުވަން ފަސޭހަވާނެ ކަމަށް އެމަނިކުފާނު ވިދާޅުވި އެވެ. ނަމަވެސް އުމުރުން 40-50 އަހަރު ވެފައިވާ މީހުންގެ ކިބައިން އެ އާދަ ކަނޑުވަން ވަރަށް އުނދަގޫވާނެ ކަން ވެސް ފާހަގަކުރެއްވި އެވެ.

"އަޅުގަނޑު ހަގީގަތުގަ ވެސް މިއުޅެނީ މި މައްސަލަ ހައްލުކުރަން. އަޅުގަނޑުމެންގެ ޅަ ދަރިން، ތުއްތު ކުދިން ހާއްސަކޮށް މި ނުރަގަޅު އާދައިގެ ތެރެއަށްދާން ދޫކޮށްލައިގެން ސަރުކާރެއް އޮންނަންވީ ސަބަބެއް އަޅުގަނޑަކަށް ނުވިސްނޭ. ސަރުކާރުގެ ޒިންމާތަކެއް އެބައޮތޭ އަޅުގަނޑު ގަބޫލުކުރަނީ،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި މިއީ އެތައް ޖީލެއްގެ ސަލާމަތާއި ރައްކާތެރިކަމަށް އެމަނިކުފާނު އަޅުއްވާ ފިޔަވަޅުތަކެކެވެ. މި ނިންމުމަށް ގިނަ ބައެއްގެ ތާއީދު އޮތް ކަން ފާހަގަކުރައްވައި ރައީސް އެދިވަޑައިގަތީ މިކަމުގައި އެންމެންގެ އެއްބާރުލުމަށެވެ.