ދުންފަތް މަނާކުރާ އުމުރު ކަނޑައަޅަން ރައީސް އާންމުންގެ ހިޔާލަށް

އަލީ ރާޒީ

03 އޭޕްރީލް 2025 - 19:03

0 comments

ރާއްޖޭގައި ދުންފަތުގެ އިސްތިއުމާލު ކުރުން މަނާކުރާނެ އުމުރެއް ކަނޑައެޅުމަށް ރައީސް މުހައްމަދު މުއިއްޒު އާންމުންގެ ހިޔާލު ހޯއްދަވަން މިއަދު ފައްޓަވައިފި އެވެ.

އެހެން ބައެއް ގައުމުތަކެކޭ އެއްގޮތަށް، ރާއްޖޭގައި ވެސް ޒުވާނުން ދުންފަތާ ދުރުކުރުމަށް "ޖެނަރޭޝަން ބޭން" ނުވަތަ ވަކި އުމުރެއްގެ މީހުންނަށް ދުންފަތް މަނާވާ ގޮތަށް ކަނޑައަޅަން ނިންމަވައި އެކަން އިއުލާނުކުރެއްވުމަށް ފަހު ރައީސް މިއަދު އެކްސްގައި ކުރެއްވި ޕޯސްޓެއްގައި ވަނީ ދުންފަތް މަނާ ކުރާނެ އުމުރުފުރާ ކަނޑައެޅުމަށް ޕޯލެއް ހިމަނުއްވައިފަ އެވެ.

މިއީ ރާއްޖޭގެ ރައީސަކު ސޯޝަލް މީޑިއާގައި އާންމުންގެ ހިޔާލަށް އެދިވަޑައިގެން ޕޯލެއް ހިމެނުއްވި ފުރަތަމަ ފަހަރެވެ.

އެ ޕޯލްގައި ރައީސް ހިޔާލު ހޯއްދަވަން ހުށަހަޅުއްވާފައި ވަނީ:

ޖެނުއަރީ 1، 2007އިން ފެށިގެން އުފަންވި މީހުންނަށް ދުންފަތުގެ އިސްތިއުމާލުކުރުން މަނާކުރަން
ޖެނުއަރީ 1، 2004އިން ފެށިގެން އުފަންވި މީހުންނަށް ދުންފަތުގެ އިސްތިއުމާލުކުރުން މަނާކުރަން
ޖެނުއަރީ 1، 2000އިން ފެށިގެން އުފަންވި މީހުންނަށް ދުންފަތުގެ އިސްތިއުމާލުކުރުން މަނާކުރަން

"ރައްޔިތުންނާ އެކު" ޕޮޑްކާސްޓުގެ ނަމުގައި ރައީސް މުއިއްޒު މިފަހުން ގެނެސްދެއްވަން ފެއްޓެވި ޕޮޑްކާސްޓުގެ ދެވަނަ އެޕިސޯޓުގައި ރައީސް މުއިއްޒު ވަނީ 18-25 އަހަރުގެ މީހުންނަށް ދުންފަތުގެ އިސްތިއުމާލުކުރުން މަނާކުރުމުގެ ވިސްނުމެއް ގެންގުޅުއްވާކަން ހާމަކުރައްވައިފަ އެވެ.

ދުންފަތުގެ އިސްތިއުމާލުކުރުމާ ދެކޮޅަށް މި ފަހުން ސަރުކާރުން ވަނީ ގިނަ ފިޔަވަޅުތަކެއް އަޅައިފަ އެވެ. އެގޮތުން ރާއްޖޭގައި ވޭޕް މަނާކުރުމާއި ދުންފަތުގެ ބާވަތްތަކުން ނަގާ ޑިއުޓީ ސަރުކާރުން ވަނީ ބޮޑުކޮށްފަ އެވެ.