ޝަމްހީދު، އެމްޑީޕީގެ ރިޔާސީ ޕްރައިމަރީގެ ޝައުގުވެރިކަން ފާޅުކޮށްފި

ހަސަން ހަލީމް

05 އޭޕްރީލް 2025 - 21:55

0 comments

ހުޅުމާލެ ދެކުނު ދާއިރާގެ މެމްބަރު ޑރ. އަހުމަދު ޝަމްހީދު -- ފޮޓޯ/ މަޖިލިސް

އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމުގެ ޝައުގުވެރިކަން ހުޅުމާލެ ދެކުނު ދާއިރާގެ މެމްބަރު ޑރ. އަހުމަދު ޝަމްހީދު ފާޅުކުރައްވައިފި އެވެ.

އެ ޕާޓީގެ ބައެއް މެމްބަރުންނަށް ޝަމްހީދު މިއަދު ފޮނުއްވި މެސެޖުގައި ވަނީ 2028 ވަނަ އަހަރުގެ ރިޔާސީ އިންތިހާބުގައި ޕާޓީގެ ޓިކެޓު ލިބިވަޑައިގަންނަވާ ކެންޑިޑޭޓަކު ހޮވުމަށް ބާއްވާ ޕްރައިމަރީގައި ވާދަކުރުމުގެ ފުރުސަތުތައް ހޯދުމަށް ބައްދަލުވުންތަކެއް ބާއްވަން ވިސްނަމުން އަންނަ ކަމަށެވެ.

ޖުމްހޫރީ ޕާޓީގެ ސްލޮޓްގައި 2012 ވަނަ އަހަރު ޓްރާންސްޕޯޓް މިނިސްޓަރުކަން ވެސް ކުރެއްވި ޝަމްހީދު ވަނީ ރިޔާސީ ޓިކެޓް ހޯދުމަށް އަޅާ "ފުރަތަމަ ފިޔަވަޅަށް" އެ ބޭފުޅުންގެ ތާއިދަށް އޭނާ ވަނީ އެދިވަޑައިގެންފަ އެވެ.

މީގެ ކުރިން، ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކުގެ ވެރިކަމުގައި ޑރ. ޝަމްހީދު ވަނީ ޖުމްހޫރީ ޕާޓީގެ ސްލޮޓެއްގައި ޓްރާންސްޕޯޓު މިނިސްޓަރުކަން ކުރައްވާފައެވެ. ނަމަވެސް، ފަހުން އެމްޑީޕީއާ ގުޅިވަޑައިގެން އެ ޕާޓީގެ ޓިކެޓުގައި މި ހިނގާ 20ވަނަ މަޖިލީހަށް ވާދަކުރައްވާ، އޭނާ ވަނީ ކާމިޔާބު ހޯއްދަވާފަ އެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އެ ޕާޓީގެ ޗެއާޕާސަން ފައްޔާޒް އިސްމާއީލް ވެސް ވަނީ މީގެކުރިން އިއުލާނު ކުރައްވާފަ އެވެ.

ކުރީގެ ރައީސް އިބްރާހިމް މުހައްމަދު ސޯލިހަށް ތާއިދުކުރައްވާ ބައެއް މެމްބަރުން ވެސް ދަނީ އެ މަނިކުފާނަށް ތާއިދުކޮށް ސޯޝަލް މީޑިއާގައި ޕޯސްޓުތައް ކުރަމުންނެވެ. ނަމަވެސް، އިންތިހާބާ ގުޅޭގޮތުން އިބޫ އަދި ރަސްމީކޮށް ވާހަކައެއް ނުދައްކަވަ އެވެ.