ރައީސްގެ ޔޫކޭ ދަތުރަށް 153،000ރ. ހޭދަވި

އިސްމާއިލް ރިޒާ

10 އޭޕްރީލް 2025 - 16:14

0 comments

ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިނގިރޭސިވިލާތަށް ކުރެއްވި ދަތުރުފުޅަށް ރައީސް އޮފީހުން ޖުމްލަ ހަރަދުކުރީ 153،689.92 ރުފިޔާ ކަމަށް އެ އޮފީހުން ހާމަކޮށްފި އެވެ.

މި މަހުގެ 1-5 އަށް ކުރެއްވި އެ ދަތުރަކީ އިނގިރޭސިވިލާތުގެ މަޝްހޫރު ފުޓްބޯޅަ ކުލަބް ލިވަޕޫލް މެދުވެރިކޮށް ރާއްޖެ އިޝްތިހާރު ކުރުމަށް ކުރިއަށް ގެންދާ ކެމްޕެއިން ފެއްޓެވުމަށް ކުރެއްވި ދަތުރެވެ. ރާއްޖޭގެ ޓޫރިޒަމް އިޝްތިހާރު ކުރުމުގެ މި ކެމްޕޭނަނީ ލިވަޕޫލާއި އެމްއެމްޕީއާރްސީގެ އިތުރުން އަދި ވިޒިޓް މޯލްޑިވްސް ގުޅިގެން ކުރިއަށް ގެންދާ ކެމްޕޭނެކެވެ.

އެގޮތުން ރައީސް އިނގިރޭސިވލާތަށް ކުރެއްވި ދަތުރަށް ޖުމްލަ 153،689.92ރ. ހަރަދުވެފައިވެ އެވެ.

ރައީސްގެ މި ދަތުރުފުޅުގައި ފަހުގެ ވަސީލަތްތަކާއެކު އެންމެ ޒަމާނީ ފެންވަރަށް ތަރައްގީކޮށްފައިވާ ލިވަޕޫލްގެ އަކްސާ ޓްރެއިނިން ސެންޓަރަށް ޒިޔާރަތްކުރައްވާ ރާއްޖޭގެ ފުޓްބޯޅައިގެ ތަރައްގީއަށް ކުރެވިދާނެ ކަންކަމާއި ކުރި އަރަމުންދާ އުންމީދީ ކުޅުންތެރިންނަށް ފުރުސަތުތައް ފަހިކޮށްދެވޭނެ ގޮތްތަކާއިމެދު މަޝްވަރާ ކުރެއްވި އެވެ.

މީގެ އިތުރުން އިނގިރޭސިވިލާތުގެ ލިވަޕޫލްގައި ކިޔަވަމުންދާ ދިވެހި ދަރިވަރުންނާ ރައީސް މުއިއްޒު ބައްދަލުކުރެއްވި އެވެ. އަދި އިނގިރޭސިވިލާތުގެ ޔުނިވާސިޓީ އޮފް ލީޑްސް އަށް ޒިޔާރަތްކުރައްވާ ރާއްޖެއާ އެ ޔުނިވާސިޓީން އެކުގައި ކުރެވިދާނެ މަސައްކަތްތަކާމެދު ވަނީ މަޝްވަރާކުރައްވާފަ އެވެ.

ރައީސްގެ މި ދަތުރުފުޅުގައި ވަނީ އިނގިރޭސިވިލާތުގެ ލަންޑަންގައި ހުންނަ ނަންބަރު 9 ރޯޒްމަންޓް އެވެނިއު މޯލްޑިވްސް ސްޓޫޑަންޑްސް އެސޯސިއޭޝަން -ޔޫކޭ އާ އަލުން ހަވާލުކުރައްވާފަ އެވެ.