ޕީޖީ އެދިގެން ރައުދު ދޫކޮށްލައިފި

އަލީ ރާޒީ

27 މެއި 2025 - 10:21

0 comments

މާލޭގެ އިމާރާތެއްގެ މަތިން ވެއްޓުނު ހައްވާ ޔުމްނު ރަޝީދުގެ މައްސަލައިގައި ހައްޔަރު ކޮށްފައިވާ ރައުދު އަހުމަދު ޒިލާލަށް ދައުވާ އުފުލުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާފައިވާތީ އޭނާ ރޭ ބަންދުން ދޫކޮށްލާފައިވާ ކަމަށް ފުލުހުން މިއަދު ބުނެފި އެވެ.

ރައުދުގެ ވަކީލުން ބުނީ ރައުދު ބަންދުން ދޫކޮށްލީ ޕްރޮސިކިއުޓަ ޖެނެރަލް އެގޮތަށް އެދިވަޑައިގެން ސިޓީ ފޮނުވުމުން ކަމަށެވެ.

އެނގިފައިވާ ގޮތުގައި އެ ސިޓީ ޕްރޮސިކިއުޓަ ޖެނެރަލްގެ އޮފީހުން މޯލްޑިވްސް ޕޮލިސް ސާވިސް އަށް ފޮނުވީ އިއްޔެ އެވެ.

ރައުދު ދޫކޮށްލިއިރު، އޭނާގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް އިއްޔެ ވަނީ ފޮނުވައިފަ އެވެ.

ރައުދުގެ މައްޗަށް ފުލުހުން ކުރަނީ އެހީއަށް ބޭނުންވެފައިވާ މީހަކަށް އެހީތެރިކަން ފޯރުކޮށްދީފައި ނުވުމާއި މަސްތުގެ ހާލުގައި ހުރިކަމުގެ ކުށުގެ ތުހުމަތެވެ.

ރައުދަށް ދައުވާކޮށްދިނުމަށް އެދި ފުލުހުން ޕީޖީއަށް ފޮނުވާފައިވިޔަސް، އޭނާއަށް ކުރާ ތުހުމަތުތަކުގެ ތަފްސީލެއް ފުލުހުން ނުދެ އެވެ. ފުރަތަމަ ނެރުނު ކޯޓު އަމުރުން އެނގޭ ގޮތުގައި މަސްތުވާތަކެތި ބޭނުންކުރުމާއި އެހީތެރިކަން ފޯރުކޮށްދޭން ޖެހޭ މީހަކަށް އެހީތެރިކަން ނުދިނުމުގެ ތުހުމަތުކޮށްފައިވެ އެވެ.