ހައްޖުގެ އަޅުކަމަށްފަހު ދިވެހި ހާޖީން އެނބުރި ރާއްޖެ އަންނަން ފަށައިފި

އަލީ އާމިރު

13 ޖޫން 2025 - 19:56

0 comments

ދިވެހި ޙައްޖުވެރިން ޙައްޖުގެ މަތިވެރި އަޅުކަމަށް ފަހު އެނބުރި ރާއްޖެއަށް އަންނަން މިއަދު ފަށައިފި އެވެ.

ދިވެހި ހައްޖުވެރިން އެނބުރި އަންނަން ހަމަޖެހިފައި ވަނީ މިއަދާއި މާދަމާގެ އިތުރުން އަންނަ އާދީއްތަ ދުވަހު އެވެ. ހައްޖުވެރިން އަންނަން ހަމަޖެހިފައިވާ ދުވަސްތަކުގައި އެއާޕޯޓާއި ހައިވޭގެ ޓްރެފިކް ބާރުބޮޑުވާނެ ކަމަށް ލަފާކޮށް އެމްއޭސީއެލުން ވަނީ ފަސިންޖަރުން ސަމާލުވުމަށް އިރުޝާދު ދީފަ އެވެ.

ޙައްޖުގެ އަޅުކަމުން އަންނަ މީހުން ޑޮކްޓަރަށް ދައްކަން އައިޖީއެމްއެޗުގައި ފްލޫ ކްލިނިކެއް މިއަދު ވަނީ ހުޅުވާފައެވެ. އަދި، ކުޑަކުދިން ގޮވައިގެން އެއާޕޯޓަށް ނުދާން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވަނީ އިލްތިމާސްކޮށްފަ އެވެ.

ކެރި ކުޅަދާނަވެގެންވާ ކޮންމެ މުސްލިމަކު އުމުރުން އެއް ފަހަރު އަދާކުރުން ވާޖިބު މި އަޅުކަމަށް މި އަހަރު އެއް މިލިއަނަށް ވުރެ ގިނަ މީހުން މައްކާ އަށް ދިޔަ އެވެ. މިއަހަރު ރާއްޖެއިން 1000 އަށް ވުރެ ގިނަ މީހުން ހައްޖަށް ދިޔަ އެވެ.

ރައީސް ޑރ. މުހައްމަދު މުއިއްޒު އާއި އެމަނިކުފާނުގެ އަނބިކަނބަލުން ސާޖިދާ މުހައްމަދު އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް މިއަހަރު ހައްޖުގެ އަޅުކަމަށް ވަޑައިގެންނެވި އެވެ.