ބީއެމްއެލް ހޯރަފުށީ ބްރާންޗުގެ އާ އިމާރާތުގެ މަސައްކަތް ހުއްޓިފައި!

އަލީ އާމިރު

24 ޖުލައި 2025 - 09:06

0 comments

ބީއެމްއެލް ހޯރަފުށީ ހަދަމުން އަންނަ އެ ބޭންކްގެ ބްރާންޗުގެ އާ އިމާރާތް - ފޮޓޯ: ހޯރަ އޮންލައިން

ހއ. ހޯރަފުށީ ކައުންސިލާއި ބޭންކް އޮފް މޯލްޑިވްސް އާއި ދެމެދުވެފައިވާ އެއްބަސްވުމުގެ ދަށުން އިމާރާތް ކުރަމުން އަންނަ ބީއެމްއެލްގެ ހޯރަފުށީ ބްރާންޗްގެ އާ އިމާރާތުގެ މަސައްކަތް ލަސްވަމުންދާ ކަން ފާހަގަ ވެއްޖެ އެވެ.

ހޯރަފުށީ ބްރާންޗްގެ އާ އިމާރާތުގެ މަސައްކަތް ލަސްވެފައިވާއިރު މި މަސައްކަތުގައި އުޅޭ ބައެއް ސަބް ކުންފުނިތަކަށް ދައްކަން ޖެހޭ ފައިސާ ނުދައްކާ ހުރި ކަމުގެ ޝަކުވާ ތަކެއް ވެސް "ހޯރަ" އަށް ވަނީ ލިބިފަ އެވެ.

ހޯރަފުށީ ބްރާންޗްގެ އާ އިމާރާތުގެ މަސައްކަތުގައި އުޅޭ ކުންފުންނަކުން "ހޯރަ" އަށް ބުނީ ބީއެމްއެލް އާ އިމާރާތުގެ ބައެއް މަސައްކަތް ކޮށް ލިބެންޖެހޭ ފައިސާ ނުލިބުމުން މިހާރު އާ އިމާރާތުގެ ދެން ހުރި މަސައްކަތް ހުއްޓިފައިވާ ކަމަށެވެ.

ބީއެމްއެލް އިން މި މަސައްކަތް ހަވާލުކޮށްގެން އުޅެނީ "އީސީއެސް އިންޖިނިއަރިން" ކިޔާ ކުންފުންނަކާ އެވެ.

ބީއެމްއެލް ހޯރަފުށީ ބްރާންޗުގެ އާ އިމާރާތުގެ މަސައްކަތް ނިންމަން އަމާޒުހިފި ތާރީހަށް ނުނިމި ލަސްވެފައިވާތީ އެކަމުގެ ކަންބޮޑުވުން ހޯރަފުށީ ކައުންސިލުން ބީއެމްއެލްގެ ސަމާލުކަަމަށް ގެނެސްފައިވާކަން "ހޯރަ" އަށް ވަނީ ޔަގީން ކުރެވިފައި އެވެ. އަދި އެ މަސައްކަތް އަލުން ނިންމުމަށް އާ ޓައިމް ލައިނަކަށް ހޯރަފުށީ ކައުންސިލުން މިހާރު ވަނީ ބީއެމްއެލްގައި އެދިފަ އެވެ.

ހޯރަފުށީގައި ހަދަމުން އަންނަ ބީއެމްއެލްގެ ބްރާންޗްގެ އާ އިމާރާތުގެ މަސައްކަތް ލަސްވަމުންދާއިރު ހޯރަފުށީގެ އުމްރާނީ ތަރައްގީގެ ގިނަ މަސައްކަތްތަކެއް މިހާރު ވެސް ހުއްޓިފައި އޮތުމުގެ ކަންބޮޑުވުން އެރަށު ރައްޔިތުން އަދި ކައުންސިލުން އަންނަނީ ކުރަމުން ނެވެ.