އިމެއްނެތި ބޭނުންގޮތަކަށް ހުތުބާ ކިޔަން ދޫކޮށްލައިފި ނަމަ ހާލަތު ގޯސް ވެދާނެ: ޝަހީމް

އަލީ ރާޒީ

03 ޖެނުއަރީ 2026 - 10:33

0 comments

އިމެއްނެތި ބޭނުންގޮތަކަށް ހުކުރު ހުތުބާ ކިޔަން ދޫކޮށްލައިފި ނަމަ ރާއްޖެ ދީނީ ނުތަނަވަސް ކަމަކަށް ވެއްޓިދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

މި އަހަރު ރާއްޖޭގެ މިސްކިތްތަކުގައި ކިޔާނެ ހުކުރު ހުތުބާގެ މައުލޫއުތައް ކަނޑައެޅުމަށް އިސްލާމިކް މިނިސްޓްރީން އިއްޔެ ވަނީ އާއްމުންގެ ހިޔާލަށް ހުޅުވާލާފަ އެވެ. އެއާއެކު ގިނަ ބަޔަކު އަންނަނީ އެ މީހުން ބޭނުންވާ މައުލޫއުތައް ހުށަހަޅަމުންނެވެ.

އެކަމަކު އެކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ފާޑު ވިދާޅުވި އެވެ. އެކްސްގައި ކުރެއްވި ޕޯސްޓެއްގައި އެ މަނިކުފާނު ވިދާޅުވީ ހުކުރު ހުތުބާ ދެވޭ ފެންވަރުގެ އިލްމާއި ގާބިލްކަން ހުރި ކޮންމެ މީހަކަށް ވެސް، ހުތުބާ ދިނުމުގެ ހުއްދަ ދޭން ޖެހޭ ކަމަށެވެ. އަދި އެ މީހަކަށް ފެންނަ، އެއިރެއްގެ ހާލަތާ ގުޅޭ މައުލޫއު އިހްތިޔާރުކުރުމުގެ މިނިވަންކަން އޮންނަން ޖެހޭ ކަމަށް ވެސް ވިދާޅުވި އެވެ.

ޑީޑީ އަށް ވަރަށް އިހުތިރާމް ކުރައްވާ ކަމަށް ވިދާޅުވެ ޝަހީމް ވަނީ އޭނާ އެކަމާ ދެކޮޅު ހައްދަވާ ސަބަބުން ވެސް ތަފުސީލު ކޮށްދެއްވި އެވެ.

ނުބަލައި ހުތުބާ ކިޔުމުގެ ހުއްދަ މިހާރު ވެސް ދޭ ނަމަވެސް، އެގޮތަށް ހުތުބާ ކިޔާ މީހުން ވެސް ހުތުބާ ފަށާ ގޮތަށް ނިންމުން ލަސްވުމުގެ ސަބަބުން ރައްޔިތުންގެ އެތައް މަސްލަހަތަކަށް ގެއްލުންވާ ކަމަށް ޝަހީމް ވިދާޅުވި އެވެ.

"އަނެއްކޮޅުން ހައްދެއް އިމެއްނެތި އެގޮތަށް މިކަން އެންމެންނަށް ހުޅުވައިފި ނަމަ، ދީނީ ގޮތުން ނުތަނަވަސް ހާލަތަށް ރާއްޖެ ވެއްޓިގެން ދިއުމުގެ ބިރު އޮންނާނެ. އަޅުގަނޑު އެކަމަށް ޖާގައެއް ނުދޭނަން،" އޭނާ ވިދާޅުވި އެވެ.

ޝަހީމް ވިދާޅުވީ ރާއްޖޭގައި މިވަގުތު ހުތުބާގެ ކަންކަމުގައި އަމަލުކުރަމުން އަންނަނީ ރާއްޖޭގެ މަސްލަހަތާ ގުޅޭ ގޮތަށް ކަމަށެވެ. އަދި ރާއްޖޭގެ ދީނީ އެއްބައިވަންތަކަމާ ވެސް ގުޅޭ ގޮތަށް ހަރުދަނާ ނިޒާމެއްގެ ތެރެއިން ކަމަށް އޭނާ ވިދާޅުވި އެވެ.

"ތިޔަ ވިދާޅުވާ ގޮތަށް ހުޅުވިފައި އޮންނަ ގައުމުތަކުގައި ދީނީ ތަފާތު ފިކުރުތައް އުފެދި، ޖަމާއަތްތައް އުފެދި، އެކި މިސްކިތްތަކުގައި އެކި މަޒުހަބަށް ހުތުބާ ކިޔައި، ހަމަނުޖެހުން އުފެދިގެން ގޮސްފައިވޭ،" ޝަހީމް ވިދާޅުވި އެވެ.