ކައުންސިލް ރައީސް ވަހީދު ހުންނެވީ ހޯރަފުށި ބިންހިއްކާނެ ދުވަހެއްގެ އިންތިޒާރުގައި!

ކައުންސިލް ރައީސް ވަހީދު ހުންނެވީ ހޯރަފުށީ ބިންހިއްކާނެ ދުވަހެއްގެ އިންތިޒާރުގައި!

އަލީ ރާޒީ

25 ފެބުރުއަރީ 2026 - 17:15

0 comments

ހޯރަފުށީ ކައުންސިލްގެ ރައީސް މުހައްމަދު ވަހީދު

މި ހުރީ ހޯރަފުށީ ބިންހިއްކާނެ ދުވަހެއްގެ އިންތިޒާރުގައި ކަމަށް ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވެއްޖެ އެވެ.

ވަހީދު މިހެން ވިދާޅުވީ ސަރުކާރުން ހއ. ދިއްދޫގައި އެއާޕޯޓު ތަރައްގީކުރުމަށާއި އަސާސީ އެހެނިހެން ބޭނުންތަކަށް ބިން ހިއްކުމުގެ މަސައްކަތް 50 ދުވަހުން ނިންމާލައިފައިވާ ކަމަށް، ރައީސް ޑރ. މުހައްމަދު މުއިއްޒު ވިދާޅުވުމާއި ގުޅިގެން ނެވެ.

ހއ. ހޯރަފުށީ ބިން ހިއްކައި ދިނުމަކީ 2023 ގެ ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވެވަޑައިގެންނެވި އެއް ވައުދެކެވެ. ނަމަވެސް ރައީސް މުއިއްޒުގެ ސަރުކާރަށް ދެ އަހަރުވާން ދާއިރު ވެސް ހޯރަފުށީގެ ބިންހިއްކުމުގެ މަސައްކަތުގެ އަޑު މިހާރު ވަނީ މަޑުވެފަ އެވެ. މި ސަރުކާރަށް މަރުދޭ މީހުނަށް މިކަންކަން ފެށޭނެ ދުވަހެއް ބުނެ ނުދެވި ސަރުކާރު ދިފާއު ކުރަން ވެސް ވަނީ ދަތިވެފަ އެވެ.

ރައީސް މުއިއްޒުގެ ސަރުކާރަށް 24 މަސްވެ ފަސް އަހަރުގެ ދައުރު ނިމެން ދާއިރު ހޯރަފުށީ ދާއިރާގެ އުމްރާނީ ތަރައްގީގެ ކުރިމަގާއިމެދު ޖަވާބު ބޭނުން ގިނަ ސުވާލުތަކެއް މިހާރު ވަނީ އުފެދިފަ އެވެ. ވައުދު ވުމަކީ ސަމާސާއަކަށް މި ސަރުކާރުގެ ބައެއް ވެރިން މިއަދު ހަދައިފި އެވެ. އަދި އިންތިހާބުވި މީހުން ގޮނޑިތަކުގައި ހަމަޖެހިލުމަށްފަހު ވައުދު ލިސްޓް ނަނގާލީ ޑަސްބިނަށެވެ. އަދި ބައެއް ވައުދަކީ މީހަކު ބުނެގެން މީހަކަށް ވީ ވައުދުކަމަށް ބުނެ ވެސް އެކަމުން އަންނަނީ ބޯދަމައިގަންނަމުން ނެވެ.