ޒިކުރާ މިސްކިތް ހުރި ބިމުގައި ބޮޑު މިސްކިތެއް އަޅަނީ

އިބްރާހިމް އިމާދު

06 މާޗް 2026 - 20:51

0 comments

ޒިކުރާ މިސްކިތް

ޒިކުރާ މިސްކިތުގެ ބިމުގައި ހަދާފައިވާ ވަގުތީ އިމާރާތް ތަޅާލައި އެ ބިމުގައި ބޮޑު މިސްކިތެއް އަޅަން ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ މިއަދު ވިދާޅުވެއްޖެ އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް މީޑިއާތަކަށް ވިދާޅުވީ ބަންޑާރަ މިސްކިތް ހުރި ތަނުގައި އާ މިސްކިތެއް އެޅުމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާ ކަމަށެވެ.

މިގޮތުން ބަންޑާރަ މިސްކިތް ހުރި ތަނުގައި އައު މިސްކިތް އެޅުމުގެ މަސައްކަތް މި ހިނގާ ރޯދަ މަހަށްފަހު ފަށާނެ ކަމަށް ޝަހީމް ވިދާޅުވި އެވެ.

"ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދަމަސް ފަހުން ފެށިގެންދާނެ އިންޝާ ﷲ. މިކަމަށް ބޭނުންވާ އެހީތެރިކަން ދީލަތި ފަރާތަކުން ވަނީ ހަމަޖެހިފަ. މިއާއެކު މާލެ ގެ ބޮޑެތި ހުރިހައި މިސްކިތެެއް އާވެގެން ދިޔައީ الحمد لله،" ޝަހީމް ވިދާޅުވި އެވެ.

ސަރުކާރުގެ ޚަރަދުގައި ޢިމާރާތްކުރި ބައެއް މިސްކިތްތަކާއި، އަމިއްލަ ފަރާތްތަކާއި ގުޅިގެން ޢިމާރާތްކުރި މިސްކިތްތައް ހިމެނޭހެން މި ރަމަޟާން މަހަށް 15 މިސްކިތެއް މިހާތަނަށް ވަނީ ހުޅުވާފައެވެ. ރޯދަމަސް ނިމޭއިރު ހުޅުވޭ މިސްކިތްތަކުގެ އަދަދު 20އަށް އަރާނެކަަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެ އެވެ.

އެސްޓީއޯ ސުޕަމާޓް ކައިރީގައި ހުންނަ ބަންޑާރަ މިސްކިތް ނުވަތަ ކުރީގެ މަޝްހޫރު ނަމުން، ބުމްބާ މިސްކިތަށް މިހާރު 98 އަހަރު ވެއްޖެ އެވެ. ކުރީގެ ރައީސް މައުމޫން އަބްދުލްގައްޔޫމްގެ ބައްޕާފުޅުގެ ހަނދާނުގައި ބިނާކޮށްފައި ހުރި ޒިކުރާ މިސްކިތް ތަޅާލުމަށް ފަހު އެތަނުގައި "ދާރުލް ޒިކުރާ" ގެ ނަމުގައި 10 ބުރީގެ އިމާރާތެއް އަޅަން ރައީސް އަބްދުﷲ ޔާމީންގެ ސަރުކާރުގައި ނިންމި އެވެ. އެ ނިންމުމުގެ ދަށުން އިސްލާމިކް މިނިސްޓްރީ އާއި އެސްޖޭ ކުންފުންޏާ ދެމެދު، 130 މިލިއަން ރުފިޔާ ޖުމްލަ މަޝްރޫއުއަށް ލިބޭ ގޮތަށް ސޮއިކުރި އެވެ.

ނަމަވެސް އެ އެއްބަސްވުން ބާތިލު ކުރި މައްސަލައިގައި ދެ ފަރާތުން ވެސް ކޯޓަށް ދިޔަ އެވެ. އެ މައްސަލައިގައި އެންމެ ފަހުން ދެ ފަރާތުން އެއްބަސްވީ، ބަދަލުގައި އެސްޖޭގެ ހަރަދުގައި ހުޅުމާލެ ދެވަނަ ފިޔަވަހީގައި މިސްކިތެއް އެޅުމަށެވެ.