އިމާމުންނަށް ފަރުމާކުރާ ދިވެހިވަންތަ ހެދުމުގެ ނަމޫނާއެއް ދައްކާލައިފި

ހުނައިދާ ޔާސިރު

22 ސެޕްޓެމްބަރ 2026 - 23:26

0 comments

ރާއްޖޭގެ މިސްކިތްތަކުގައި ނަމާދުކުރާ އިމާމުންނަށް ހާއްސަކޮށް ތައްޔާރުކުރާ ހެދުމުގެ ވަގުތީ ޑިޒައިން ދައްކާލައިފި އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް މިރޭ ފޭސްބުކްގައި ދައްކާލެއްވި އެ ހެދުމާއި ބޮލުގައި އަޅާ ތާކިހަލުން ފެންނަނީ މުޅިން ވެސް ދިވެހިވަންތަކަމެވެ.

ހެދުން ޑިޒައިން ކުރުމުގައި ހުކުރު މިސްކިތުގެ މުންނާރާއި ދިވެހިން ވިޔެ އުޅުނު ތުނޑުކުނަލާއި ގެދޮރު އެޅުމުގައި ބޭނުން ކުރި ހިރިގަލުގެ ފަރުމާތަކުން ހިޔާލު ހޯދާފައި ވެ އެވެ.

ޝަހީމް ވިދާޅުވި ގޮތުގައި މިއީ ފުރަތަމަ މަރުހަލާގައިވާ ޑިޒައިނެކެވެ. ހެދުން އެއްކޮށް ނިންމާނީ އެންމެ ގިނަ ބަޔަކު އެދޭ ގޮތަށް ކަމަށް ވިދާޅުވި އެވެ.

"މިކަން މި ކުރަނީ ރާއްޖޭގެ ސަގާފަތާއި ތާރީހު ދެމެހެއްޓުމަށާއި ރާއްޖޭގެ ދީނީ ސަގާފަތުގެ ތެރެއަށް ވަދެގެންދާ، ބިދޭސީ އާދަކާދައިން ސަލާމަތްވުމަށް،" ރާއްޖޭގެ ހަތީބުންނާއި އިމާމުންގެ ރަސްމީ ފޭރާމެއް ނޯންނަކަން ފާހަގަކުރައްވައި ޝަހީމް ވިދާޅުވި އެވެ.

އޭނާ ވިދާޅުވި ގޮތުގައި އަމާޒަކީ ކުރިއަށް ރޯދަ މަހު ހެދުން އެޅޭވަރު ކުރުމެވެ.