މެޑަމް ސާޖިދާގެ ކަންބޮޑުވުން؛ ޑިމޮކްރަސީއަށް މުހިއްމު...!

އަބޫ ފުރުޤާން ޢޖ

13 ޑިސެމްބަރ 2023 - 23:22

3 comments

ފަސްޓް ލޭޑީ ސާޖިދާ މުހައްމަދު ރަންހިރު ދަރުބާރުގައި އަންހެނުންތަކަކާއިއެކު ފޮޓޯ ނަންގަވަނީ

"އަޅުގަނޑުމެންނަށް މި ފެންނަނީ ވަކި ހިސާބަކުން އަންހެނުން މަސައްކަތާ ދުރުވެގެންދާ ތަން. ހަގީގަތުގަ ފުރުސަތު ލިބިފައި އޮންނަނީ ލިޔެކިޔުމުގަ. އެހެންނަމަވެސް އެ ފުރުސަތުގަ އަޅުގަނޑުމެންގެ ރޯލު ތަފާތުވުމާއެކު ކުރިއަށްދިއުމަށް ގޮންޖެހުންތަކެއް އެބަހުރި،" ޤައުމެއް ކުރިއަށްދިއުމުގައި އަންހެނުން ބާރުވެރިކުރުމުގެ މުހިންމުކަން ފާހަގަކުރައްވާ ލޯކަލް ކައުންސިލް އޮތޯރިޓީއާއި ޔުނައިޓެޑް ނޭޝަންސް ޑިވެލޮޕްމެންޓް ޕްރޮގްރާމް މޯލްޑިވްސް، ޔޫއެންޑީޕީ ގުޅިގެން "ވިމެން އިން ލޯކަލް ގަވަނެންސް ފޯރަމް، "ރަންހިރު ދަރުބާރު" ގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވި އެވެ.

މި އާޓިކަލްގައި އަޅުގަނޑު އަލިއަޅުވާލަނީ، ފަސްޓް ލޭޑީ ސާޖިދާ މުޙައްމަދު ވެސް ކަންބޮޑުވެވަޑައިގަންނަވާ މައްސަލަ އާދެ، ސިޔާސީ މައިދާނުގައި އަންހެން ބޭފުޅުން އިސްކޮށް އުޅުއްވި ނަމަވެސް، ރާއްޖޭގެ ލީޑަރޝިޕްގައި ޖިންސުގެ ހަމަހަމަކަން ދެމިއޮތުމުގެ މިންވަރުގެ މައްޗަށެވެ.

ދުނިޔޭގެ ސަމާލުކަން ހޯދަމުން އަންނަ ރާއްޖޭގެ ހިތްގައިމު އާކިޕެލަގޯގައި، ސިޔާސީ މައިދާނުގައި އެންމެ ކުރީ ސަފުގައި އަންހެނުން ތިބުމާ ޚިލާފަށް، ލީޑަރޝިޕްގެ ރޯލުތަކުގައި ޖިންސުގެ ތަފާތުތަކެއް އެބަހުއްޓެވެ.

ސިޔާސީ މައިދާނުގައި އަންހެނުން އަމަލީ ގޮތުން ބައިވެރިވެ، ވަޒީރުކަމުގެ މުހިންމު މަގާމުތަކާއި، ބަރުލަމާނީ ދައުރުތައް ހިމަނައިގެން ގައުމަށް ބޮޑެތި ކުރިއެރުންތަކެއް ލިބުނު ނަމަވެސް، ލީޑަރޝިޕްގެ މަތީ ފަންތީގައި ގިނައީ ފިރިހެނުންގެ އަޣުލަބިއްޔަތު އޮންނަ ބައެކެވެ. އެގްޒެކެޓިވް އަދި ނިންމުންތައް ނިންމުމުގެ ރޯލުތަކުގައި އަންހެނުންނަށް ފުރުސަތެއް ނެތްއިރު، ރާއްޖޭގެ ލީޑަޝިޕްގައި ޖިންސުގެ ފަރަގު ދެމެހެއްޓެނިވި ގޮތެއްގައި އޮތްކަން ފާހަގަކުރެވެ އެވެ.

ރާއްޖެއަށް ޑިމޮކްރަސީ ގެނައުމަށް ބުރަ މަސައްކަތްކުރެއްވި ރައީސް ނަޝީދުއާއި، ބައެއް ސިޔާސީ ޕާޓީތަކުގެ ލީޑަރުންނާއި އަދި ދިވެހިރާއްޖޭގެ ޕޮލިސީ މޭކަރުންނާއިއެކު އެކި ދުވަސްވަރުގައި އެކި ސިފަސިފާގައި މަސައްކަތް ކުރުމުގެ ފުރުސަތު އަޅުގަނޑަށް ލިބިފައިވުމުން އޭރު ކުރެވުނު ތަޖުރިބާތަކަށް ބަލައި، މިއަދު މެޑަމް ސާޖިދާ ކަންބޮޑުވެވަޑައިގަންނަވާ މައްސަލައަކީ ސީދާގޮތުން ރާއްޖޭގެ ޑިމޮކްރަސީއާއި ގުޅިފައިވާ، އަދި ޑިމޮކްރަސީ ކުރިއެރުވުމަށްޓަކައި ކުރިމަތިވެފައިވާ ވަރަށް ބޮޑު ގޮންޖެހުމެއްކަން ޤަބޫލުކުރަމެވެ. އެހެންކަމުން، ރާއްޖޭގެ މުހިންމު މަޤާމުތަކަށް އަންހެނުން އިންތިޚާބުކޮށް، އެކަނބަލުންގެ ހިތްވަރާއި ޤާބިލުކަން ދެނެގަނެ، އެކަނބަލުންނަށް ތަޢުރީފުކޮށް މިތަނުގައި އެއްޗެއް ބުނުމަކީ މައްސަލައެއް ކަމުގައި އަޅުގަނޑު ނުދެކެމެވެ.

އަންހެންބޭފުޅުން އެމްޕަވަރ ކުރުމުގައި އިތުރަށް މަސައްކަތްކުރަންޖެހޭކަން ފާހަގަވާކަމަށް މެޑަމް ސާޖިދާ ވިދާޅުވުމުން، އަޅުގަނޑު ދަންނަވާނީ ލީޑަރޝިޕްގައި އަންހެނުންނަށް މިހާރަށްވުރެ ފުރިހަމަ މާޙައުލެއް ޤާއިމުކުރުމަށްޓަކައި އިޖްތިމާޢީ އަދި މުއައްސަސާތަކުގެ ވިސްނުމަށް ފުޅާ ދާއިރާއެއްގައި ބަދަލުތަކެއް ގެންނަންވެއްޖެކަމަށެވެ.

ޒަމާނީ ޑިމޮކްރަސީގެ މަގުން ކުރިއަރަމުންދާ މިރާއްޖޭގެ ސިޔާސަތު ކަނޑައެޅުމުގައި އަންހެނުންނަކީ މުހިއްމު ދައުރެއް އަދާކުރަންޖެހޭ ބަޔަކެވެ. ވަޒީރުންނާއި ސަރުކާރު ހިއްސާވާ ކުންފުނިތަކުގެ ބޯޑަށް އަންހެން ބޭފުޅުން އައްޔަން ކުރުމުން އެނގިގެންދިޔައީ ގާބިލް އަންހެނުން ލީޑާޝިޕްގެ މަސްއޫލިއްޔަތުތަކާ ހަވާލުވާން ތައްޔާރަށް ތިބި ކަމެވެ. ޖިންސީ ހަމަހަމަކަމަށް ވަކާލާތުކުރާ ފަރާތްތަކުން ބުނަނީ މިއީ ފުޅާ ދާއިރާއެއްގައި އިޞްލާޙުތައް ގެނައުމަށް މަގުފަހިކޮށްދޭ، ލީޑަރޝިޕްގެ ރޯލުތަކަށް އިތުރު އަންހެނުން އެދުމަށް ބާރުއެޅުމާއި، ކުރިއެރުމަށް ހުރަސްއެޅޭ ހުރަސްތައް ނައްތާލުމަށް މަގުފަހިކޮށްދޭ ކަމެއް ކަމަށެވެ.

މި ކަންބޮޑުވުންތަކާ ގުޅިގެން މަދަނީ ޖަމިއްޔާތަކާއި ޖެންޑާ އިކުއަލިޓީއަށް ވަކާލާތުކުރާ ފަރާތްތަކުން ދަނީ މިހާރު އޮތް ޖިންސީ ތަފާތުކުރުންތަކަށް ހައްލެއް ގެނައުމަށް އަމާޒުކޮށްގެން މަސައްކަތް ކުރުމަށް ގޮވާލަމުންނެވެ. ހަމަހަމަ ފުރުޞަތުތައް ފަހިކޮށްދިނުމާއި، ސްޓެރިއޯޓައިޕްތަކަށް ގޮންޖެހުންތައް ކުރިމަތިކުރުވާ، ނިންމުންތައް ނިންމުމުގެ މަރުޙަލާތަކުގައި އަންހެނުންގެ ބައިވެރިވުމަށް ޙަރަކާތްތެރިވާ ސިޔާސަތުތަކުގެ މުހިންމުކަމުގެ މައްޗަށް އެބޭފުޅުން އަލިއަޅުއްވާލެއްވި އެވެ.

ލީޑަރޝިޕްގައި އަންހެނުން ކުރިއެރުމަށް ހުރި ހުރަސްތައް ނައްތާލުމަށް ޓަކައި އެކި ފަރާތްތަކާ ގުޅިގެން ސްޓްރެޓެޖީތައް އެކުލަވާލައި ތަންފީޒުކުރަން ޖެހެ އެވެ. އެންމެން ބައިވެރިވާ މާހައުލެއް ޤާއިމުކޮށް، ޖިންސީ މިންގަނޑުތަކަށް ހަމަހަމަ ހައްލެއް ހޯދައި ދިވެހިރާއްޖެއަށް ބާރުތަކާއި ނުފޫޒުތައް މިހާރަށްވުރެ ހަމަހަމަކަމާއެކު ބެހުމަށް މަގު ފަހިކޮށްދެވިދާނެ އެވެ.

ރައީސް ޑރ. މުއިއްޒުގެ އަނބިކަނބަލުން ފަސްޓްލޭޑީ ސާޖިދާ މުޙައްމަދު މިކަންބޮޑުވުން ފާޅުކުރުމުން، އަންހެނުންގެ ލީޑަރޝިޕްގެ ދައުރާ ބެހޭ ގޮތުން ދެކެވޭ ވާހަކަތައް އިތުރަށް ގަދަވެއްޖެ އެވެ. އުއްމީދަކީ، ރާއްޖޭގެ ސިޔާސީ މައިދާނުގައި އިސްކޮށް އުޅުއްވާ އަންހެން ބޭފުޅުންގެ ކާމިޔާބީތަކުގެ ސަބަބުން އާ ޖީލެއްގެ ލީޑަރުންނަށް ހިތްވަރު ލިބި، މުޖުތަމައުގެ ހުރިހާ ދާއިރާއަކުން ވެސް ޖިންސުގެ ހުރަސްތައް މަޑުމަޑުން ނައްތާލުމަށް މަގުފަހިވެގެން ދިއުމެވެ.