މިއަދުގެ ހުކުރު ޚުތުބާގެ މައުޟޫއުއަކީ "ހިޖުރައިގެ އިބުރަތްތަކުގެ ތެރެއިން" މިއެވެ.މިއަދުގެ ހުތުބާގައި ބުނެފައި ވަނީ ހިޖުރައިގެ މަތިވެރި ޒިކުރާ ގުޅިފައިވަނީ، ރަސޫލާ މައްކާއިން މަދީނާއަށް ހިޖުރަކުރެއްވި މަތިވެރި ހާދިސާއާއި ކަމަށެވެ. މިއީ އިސްލާމީ ދައުލަތެއްގެ ބިންގާ އެޅުނު ހާދިސާ ކަމަށް ފާހަގަކުރި އެވެ.
މި ފެށޭ ހަފުތާއަކީ ހިޖުރީ އައު އަހަރެއް ފެށޭ ހަފުތާއަށް ވާތީ، ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައާ މެދު ފުންކޮށް ވިސްނައިލުމަކީ މިއަދު ކުރާންޖެހޭ ކަމެއް ކަމަށް ހުތުބާގައި ވިދާޅުވެފައިވެއެވެ. ހިޖުރައިގެ މާނައަކީ އަމިއްލަ ވަޒަން ދޫކޮށް އެހެން ރަށަކަށް ދިއުމަށް ވުރެ މާފުޅާ މާނައެއް އޮތް ކަމެއް ކަންވެސް ހުތުބާގައި ފާހަގަކޮށްފައި ވެއެވެ. ހިޖުރައިގެ އެންމެ މަތިވެރި މާނައަކީ ނުބައިކަންތައް ދޫކޮށް ހެޔޮކަމުގެ މަގަށް ރުޖޫއަވުން ކަމަށް ހުތުބާގައި ފާހަގަކުރި އެވެ.
"ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައިގައި ތަފާތު އެތައް އިބުރަތްތަކަކާއި ދަރުސްތަކެއްވޭ. ހިޖުރައިން ލިބޭ އަގުހުރި އެއް ފިލާވަޅަކީ، ދީނަށް ޓަކައި ގުރުބާންވުމުގެ މަތިވެރި ފިލާވަޅެވެ. ކީރިތި ރަސޫލާ މަދީނާއަށް ހިޖުރަކުރެއްވުމުގެ ދަތުރުފުޅު ފެއްޓެވީ، އެކަލޭގެފާނު އުފަންވެ ވަޑައިގެން ބޮޑުފުޅުވީ ރަށާއި، އާއިލާގެ ބޭފުޅުން، އިސްލާމްދީނުގެ ދިފާއުގައި ދޫކުރައްވައިފައި." ހުތުބާގައި ފާހަގަކުރި އެވެ.
ދަތި އުނދަގޫ ވަގުތުގައި ވެސް އީމާންކަމުގެ އަހުލުވެރީން ސާބިތުކަމާ އެކު ދެމިތިބޭނޭކަން ފާހަގަކޮށް ހުތުބާގައި ވަނީ، ހުރިހާ ވަގުތެއްގައި އިސްލާމް ދީނުގައި ތެދުވެރިކަމާ އެކު ތިބުމަށް އަޒުމު ކަނޑައަޅަން ނަސޭހަތްތެރިވެފައެވެ. އަދި، އުޚުރަވީ ހަޔާތް ބާއްޖަވެރި ކުރުމަށް މީސްތަނުންނަށް ހުތުބާގައި ވަނީ ގޮވާލާފަ އެވެ."މުސްލިމް އަޚުންނޭވެ! ހިޖުރައިގެ މި މަތިވެރި ޙާދިސާއަށް ފުން ނަޒަރަކުން އަހަރެމެން ބަލައިލާ އިރު، މި ހާދިސާއިން އަހަރެމެންނަށް ގިނަގުނަ ޢިބުރަތްތަކެއް ލިބެއެވެ. ކަންކަމުގައި މާތް اللهއާ ވަކީލުކުރާންޖެހޭކަމީ، ހިޖުރައިގެ ހާދިސާއިން އަހަރެމެންނަށް ލިބޭ ފިލާވަޅެކެވެ. މާތް اللهއާ ވަކީލުކުރުމަކީ އެއްވެސް ޙާލެއްގައި، ވަކީލުކޮށްފީމޭ ބުނެ ދެއަތް އުރައިލައިގެން ތިބުމެއް ނޫނެވެ. ވަކީލުކުރުމަކީ، ކަންކަން ކުރުމުގައި ލިބޭން ހުރި ވަސީލަތްތަކުގެ ބޭނުން ހިފުމާ އެކު، މާތް اللهގެ ހަޟުރަތުން ރައްކާތެރިކަމާއި ތައުފީގު ލިބޭނޭކަމަށް ޔަގީންކޮށްގެން ހުރުމެވެ،" ހުތުބާގައި ބުންޏެވެ.ޚުތުބާގައި އިތުރަށް ބުނެފައިވަނީ ހިޖުރައިގެ ސަވާބާއި ދަރުމަ ލިބުން ހުރީ އެ ކަމުގައި ހިޖުރަވެރިޔާގެ ނިޔަތުގެ މައްޗަށްކަމަށާއި ބައެއް މީހުން ދުންޔަވީ ފާއިދާއެއް ހޯދުމަށް ނުވަތަ މީހަކާ ކާވަނިކުރުމަށް ވެސް ހިޖުރަކޮށް އުޅޭކަމަށެވެ. ނަމަވެސް ސަވާބާއި ދަރުމަ ހުރި ހިޖުރައަކަށް ހިޖުރަ ވާނީ، މާތް الله އާއި އެކަލާނގެ ރަސޫލާއަށް ޓަކައި ކުރި ހިޖުރައަކަށް ވާނަމަކަމަށް ޚުތުބާގައި ބުނެފައިވެ އެވެ.
