އިންޑިއާ އައުޓް ހަރަކާތަކީ ހަރުކަށި މީހުން އަޑީގައި ތިބެގެން ހިންގާ ހަރަކާތެއް: ރައީސް ނަޝީދު

މަރިޔަމް އަނާ

13 ސެޕްޓެމްބަރ 2020 - 11:40

1 comments

އައިސިސް އަށް ތާއީދުކޮށް މާލޭގައި ބަޔަކު އަޑުއުފުލަނީ

"އިންޑިއާ އައުޓް"ގެ ނަމުގައި މިހާރު ހިންގަމުން އަންނަ ހަަރަކާތަކީ ހަރުކަށި ފިކުރުގެ މީހުން އަޑީގައި ތިބެގެން ހިންގާ ކަމެއް ކަމަށާއި އިދިކޮޅު ޕީޕީއެމުން މިކަމަށް ޖާގަ ދޭ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އިއްޔެ ތުހުމަތުކުރައްވައިފި އެވެ.

"އިންޑިއާ އައުޓް"ގެ ނަމުގައި އިދިކޮޅު ފަރާތްތަކުން ސޯޝަލް މީޑިއާއާއެކު ބޮޑު ކެމްޕެއިނެއް ފަށާފައިވާއިރު، "ގައުމު ވިއްކާލުމާ ދެކޮޅަށް" ނަމުގައި އިދިކޮޅު ޕީޕީއެމް، ޕީއެންސީން އިއްޔެ ވަނީ ސައިކަލް ބުރެއް ބާއްވައިފައެވެ.

އެކަމާ ގުޅިގެން އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ރައީސް ނަޝީދު ވިދާޅުވެފައިވަނީ، ޕީޕީއެމް އާއި ކުރީގެ ރައީސް ޑރ.މުހައްމަދު ވަހީދު ހަސަން މަނިކު ގެންދަވަނީ ހަރުކަށި މީހުންގެ ނާޖާއިޒު ފައިދާ ނަންގަވަމުން ކަމަށެވެ. އެއީ ޕީޕީއެމުން ކުރާ ވަރަށް ދަށު ދަރަޖައިގެ ކަމެއް ކަމަށާއި ރާއްޖޭގެ މިނިވަންކަން އެންމެ ފަސޭހައިން ގެއްލޭނެ ކަމަކީ ވެސް އެކަމުން ކަމަށް އެމަނިކުފާނު ވިދާޅުވި އެވެ.

"ޕީޕީއެމުން މަސައްކަތް ކުރަނީ އައިސިސް ރާއްޖެ ހިފުމުގެ ޕްލޭނަކަށް، އެއީ ޕީޕީއެމުން ކުރާ ވަރަށް ނުރައްކާތެރި ދަށު ދަރަޖައިގެ ކަމެއް، ރާއްޖޭގެ މިނިވަންކަން އެންމެ ފަސޭހައިން ގެއްލޭނެ ކަންތައް،" ނަޝީދު ވިދާޅުވިއެވެ.

އެމްޑީޕީގެ ގައުމީ މަޖިލީހަށް ނަޝީދު އެ މެސެޖް ދޫކޮށްލެއްވީ ސަރުކާރާ ދެކޮޅަށް އަޑުއުފުލަން މާލޭގައި އިއްޔެ ބޭއްވި ސައިކަލް ބުރު ކުރިއަށް ދިޔަ ވަގުތު އެވެ. އެކަމަކު އެއީ ޕީޕީއެމުން ރާވައިގެން ކުރިއަށް ގެންދިޔަ ހަރަކާތެއް ނޫން ކަމަށް އެ ޕާޓީން ބުންޏެވެ.

އިދިކޮޅު ފަރާތްތަކުން ބައިވެރިވެގެން މާލޭގައި އިއްޔެ ބޭއްވި ސައިކަލް ބުރުގެ ތެރެއިން 41 މީހަކު ހައްޔަރުކޮށް، ފުލުހުން ވަނީ ސައިކަލްތަކެއް ޓޯ ކޮށްފައެވެ.

ފުލުހުން ބުނީ އެމީހުން ހައްޔަރު ކުރީ، އާންމު ސިއްހަތުގެ ކުއްލި ނުރައްކަލުގެ ތެރެއަށް ހުށަހެޅޭ ގޮތަށް އެޗްޕީއޭގެ ގައިޑްލައިންތަކާ ހިލާފަށް އެއްވުމާ ގުޅިގެން ކަމަށެވެ.