އޮލިމްޕިކް ކޮމިޓީގެ ރައީސަކަށް ޗަމްޕީ އިންތިޚާބްކޮށްފި

ހަސަން ހަލީމް

10 ޖޫން 2021 - 20:11

0 comments

މުހައްމަދު އަބްދުއްސައްތާރު (ޗަމްޕީ)

މޯލްޑިވްސް އޮލިމްޕިކް ކޮމިޓީގެ ކުރިއަށް އޮތް ދައުރުގެ ރައީސްގެ މަގާމަށް ސްވިމިން އެސޯސިއޭޝަންގެ ރައީސް މުހައްމަދު އަބްދުއްސައްތާރު (ޗަމްޕީ) މިއަދު އިންތިހާބުވެވަޑައިގެންފި އެވެ.

ކުޅިވަރުގެ އެންމެ ނުފޫޒުގަދަ އެއް ޖަމިއްޔާކަމަށްވާ އެމްއޯސީގެ ރައީސަކު ހޮވުމަށް މިއަދު ބޭއްވި އިންތިޚާބީ ޖަލްސާގައި 18 ވޯޓްގެ ތެރެއިން 11 ވޯޓް ޗަންޕީއަށްވަނީ ލިބިފައެވެ. ޗަންޕީއާ ވާދަކުރެއްވި ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު (މޫސަ)އަށް ލިބިފައިވަނީ 7 ވޯޓްއެވެ. އެފްއޭއެމްގެ ސީނިއަރ ނައިބު ރައީސް އަލީ އުމަރުވަނީ އެމްއޯސީގެ ރައީސް ކަމަށް ވާދަކުރެއްވުމަށް ނިންމެވުމަށްފަހު، އިންތިޚާބްގެ އެއްދުވަސް ކުރިން ނަން ނަގާފައެވެ.

އެމްއޯސީގެ ރައީސްގެ މަގާމަށް ކުރިމަތިލާފައިވާ މޫސާ ނާޝިދު އަންނަނީ ދުނިޔޭގެ ބެޑްމިންޓަން ފެޑެރޭޝަން ބީޑަބްލިއުއެފްގެ ކައުންސިލް މެމްބަރުކަމާއި ބެޑްމިންޓަން އޭޝިއާ އާއި ދެކުނު އޭޝިއާގެ ބެޑްމިންޓަން އެސޯސިއޭޝަންގެ ޖެނެރަލް ސެކްރެޓަރީގެ އިތުރުން ރާއްޖޭގެ ބެޑްމިންޓަން އެސޯސިއޭޝަން އޮފް މޯލްޑިވްސްގެވެސް ރައީސްގެ މަގާމްވެސް ފުރަމުންނެވެ. ސްވިމިން އެސޯސިއޭޝަންގެ ރައީސް މުހައްމަދު އަބްދުއްސައްތާރުވަނީ ފީނާގެ ޑިވެލޮޕްމަންޓް އެންޑް ފައިނޭންސް ކޮމިޓީގައި މަސައްކަތްކޮށްފައެވެ.

އޮލިމްޕިކް ކޮމިޓީގެ ނައިބު ރައީސްގެ މަގާމަށް އިންތިޚާބްވެފައިވަނީ ހޭންޑް ބޯލް މޯލްޑިވްސްގެ ރައީސް އަހުމަދު އިސްމާއިލް އާއި އެތުލެޓިކްސް އެސޯސިއޭޝަންގެ ރައީސް މުހައްމަދު ތޮލާލްއެވެ. އަހުމަދު އިސްމާއީލަށް 14 ވޯޓު ލިބިފައިވާއިރު، ތޮލާލް އަށް 15 ވޯޓު ލިބިފައިވެއެވެ.

އެޗްޕީއޭގެ ހުއްދަ ލިބިގެން އަދި ކޮވިޑްގެ ހާއްސަ ފިޔަވަޅުތަކާ އެކު ކުރިއަށް ދިޔަ އިންތިހާބުގައި ވަނީ އެމްއޯސީގައި ހިމެނޭ އޮލިމްޕިކް ކުޅިވަރުތަކުގެ ހަ ސްލޮޓަށް ވެސް މެންބަރުން ހޮވާފަ އެވެ. އެގޮތުން ހޮވުނީ ޓެނިސް އެސޯސިއޭޝަން، ބެޑްމިންޓަން އެސޯސިއޭޝަން، ސާފިން އެސޯސިއޭޝަން، ވޮލީބޯލް އެސޯސިއޭޝަން، ޓޭބަލް ޓެނިސް އެސޯސިއޭޝަން އަދި ބާސްކެޓް އެސޯސިއޭޝަނެވެ. ނޮން އޮލިމްޕިކް ކުޅިވަރުތަކުގެ ސްލޮޓަށް ހޮވުނީ ޗެސް އެސޯސިއޭޝަނާއި ބޮޑީބިލްޑިން އެސޯސިއޭޝަން އަދި ނެޓްބޯލް އެސޯސިއޭޝަން އެވެ.

އެމްއޯސީގެ ރައީސަކަށް ހޮވުނު ޗަމްޕީ ވަނީ އެމްއޯސީގެ މިދިޔަ ދައުުރުގައި މެންބަރުކަން ކުރައްވާފަ އެވެ. އަދި މިދިޔަ އަހަރުގެ ޖުލައި މަހު ބޭއްވި ސްވިމިން އެސޯސިއޭޝަންގެ އިންތިހާބުގައި އޭނާ ވަނީ ތިންވަނަ ދައުރަކަށް އެ އެސޯސިއޭޝަންގެ ރައީސްގެ މަގާމަށް ވެސް އިންތިހާބުކޮށްފަ އެވެ.