މަސްދަރު ހާމަކުރަންޖެހޭ ބިލު ތަސްދީގުކުރުން ކުށްވެރިކުރަން: އައިޕީއައި

އިސްމާއިލް ރިޒާ

20 ޖުލައި 2022 - 19:10

1 comments

ނޫސްވެރިން މައުލޫމާތު ހޯދާ މަސްދަރު, ޝަރީއަތް މެދުވެރިކޮށް ހާމަކުރުވޭ ގޮތަށް ރައްޔިތުންގެ މަޖިލީހުން ފާސްކުރި ހެކީގެ ބިލު ރައީސް އިބްރާހިމް މުހައްމަދު ސޯލިހު ތަސްދީގު ކުރެއްވުމުން އިންޓަނޭޝަނަލް ޕްރެސް އިންސްޓިއުޓް (އައިޕީއައި) އިން އެކަން ކުށްވެރިކޮށްފި އެވެ.

ވަކި ހާލަތްތަކެއްގައި މައުލޫމާތު ދިން މަސްދަރު ހާމަކުރަންޖެހޭ ގޮތަށް މާއްދާއެއް ހިމަނައި، ހެއްކާ ބެހޭ ބިލު މަޖިލީހުން ފާސްކުރީވެސް އެކަން ނުކުރުމަށް ރަސްމީކޮށް އެދުމުގެ އިތުރުން މަޖިލިސް ކައިރީ ނޫސްވެރިން މުޒާހަރާކުރަމުން ދަނިކޮށެވެ.

މިދިޔަ ހޯމަ ދުވަހު ރައީސް އެ ބިލު ތަސްދީގުކުރެއްވުމުން އެކަން ކުށްވެރިކޮށް އައިޕީއައި އިން ކުރި ޓުވީޓެއްގައި ބުނީ މަސްދަރު ހާމަކުރަން މަޖުބޫރު ކުރެވޭ ގޮތަށް ގާނޫނު ހެދުމަކީ ނޫސްވެރިކަމުގެ މިނިވަންކަމަށް އޮތް ބޮޑު ނުރައްކަލެއް ކަމަށެވެ.

"ނޫސްވެރިންގެ މަސްދަރު ހާމަކުރަން ޖެހޭ ގޮތަށް، އަދި ނޫސްވެރިކަމުގެ މިނިވަންކަމަށް ބޮޑެތި ގޮންޖެހުންތަކެއް ކުރިމަތިވާ ގޮތަށް އޮތް ހެއްކާ ބެހޭ ބިލު ރައީސް އިބްރާހިމް މުހައްމަދު ސޯލިހު ތަސްދީގު ކުރެއްވުން އައިޕީއައިއިން ހަރުކަށި އިބާރާތުން ކުށްވެރިކުރަން" އެ ޖަމިއްޔާއިން ކުރި ޓުވީޓެއްގައި ބުނެފައިވެއެވެ.

ހެކީގެ ގާނޫނު އޮތް ގޮތުން ޓެރަރިޒަމް އަދި ގައުމީ ސަލާމަތާ ގުޅޭ މައްސަލަތަކުގައި މަސްދަރު ހާމަކުރުމަށް ކޯޓަށް ނޫސްވެރިޔާގެ މައްޗަށް އަމުރު ކުރެވިދާނެ އެވެ. ގައުމީ ސަލާމަތަކީ, އެއްވެސް ގާނޫނެއްގައި މާނަކޮށްފައިނުވާ ވަރަށް ފުޅާ ގޮތެއްގައި ދޫކޮށްލާފައިވާ ކަމެއްކަމުން, އެކަމުގެ ކަންބޮޑުވުން ނޫސްވެރިންގެ ވަރަށް ބޮޑަށް އެބަ އޮތެވެ.

މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި މޯލްޑިވްސް މީޑިއާ ކައުންސިލް (އެމްއެމްސީ) އިން ވަނީ އެ މާއްދާ އެއްކޮށް އުނިކޮށް ދިނުމަށް ދިރާސާ މަރުހަލާގައި ޖުޑީޝަރީ ކޮމިޓީގައި އެދުނެވެ.

ހެކީގެ ގާނޫނު މިހާރު އޮތް ގޮތުން ޓެރަރިޒަމްގެ މައްސަލަތަކުގައި އަދި ގައުމީ ސަލާމަތާއި ގުޅޭ ކަންކަމުގައި ނޫސްވެރިޔާގެ މަސްދަރު ހާމަކުރުމަށް ޝަރުއީ ކޯޓަކަށް އަމުރު ކުރެވޭނެއެވެ.

މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި މޯލްޑިވްސް މީޑިއާ ކައުންސިލް (އެމްއެމްސީ) އިން ވަނީ އެ މާއްދާ އެއްކޮށް އުނިކޮށް ދިނުމަށް ދިރާސާ މަރުހަލާގައި ޖުޑީޝަރީ ކޮމިޓީގާ ވެސް އެދިފައެވެ. އެކަމަކު ފާސްކުރި އިރުވެސް އެ މާއްދާއަށް ބަދަލެއް ގެނެސްފައެއް ނުވެއެވެ.

ހެއްކާ ބެހޭ ބިލުގައި ބޮޑެތި ކަންބޮޑުވުންތަކެއް ހުރުމުން 180 އަށްވުރެ ގިނަ ނޫސްވެރިން ސޮއިކޮށް ރައީސް ސޯލިހަށް ޕެޓިޝަނެއްވެސް ވަނީ ހުށަހަޅާފަ އެވެ. އެ ޕެޓިޝަންގައި ބުނެފައި ވަނީ މަސްދަރު ހާމަކުރަން ލާޒިމް ކޮށްފައި އޮތުމަކީ ނުފޫޒާއި ބާރުހުރި ފަރާތްތަކުން އެކަމުގެ ނާޖާއިޒު ފައިދާ ހޯދުމަށް ހުޅުވިގެންދާ ދޮރެއް ކަމަށެވެ. އެކަމުގެ ސަބަބުން ނޫސްވެރިންނާއި އަދި ނޫސްވެރިންނަށް މައުލޫމާތު ދޭ މަސްދަރު ނުރައްކަލަކަށް ހުށަހެޅިގެން ދާނެ ކަމަށް ބުނެފައިވެ އެވެ.