މަޖިލީހަށް ކުރިމަތިލާން އަދާލަތުގެ ޓިކެޓަށް އެދެން ހުޅުވާލައިފި

މަރިޔަމް އަނާ

18 ޖެނުއަރީ 2024 - 10:21

0 comments

ރައްޔިތުންގެ މަޖިލީހުގެ އިންތިހާބުގައި އަދާލަތު ޕާޓީގެ ޓިކެޓުގައި ވާދަކުރުމަށް ޝައުގުވެރިވާ ބޭފުޅުންނަށް އެ ފުރުސަތު ހުޅުވާލައިފި އެވެ.

އަދާލަތު ޕާޓީގެ މަޝްވަރާ މަޖިލީހުގެ 39 ވަނަ ބައްދަލުވުމުން ނިންމާފައިވަނީ 4 ދާއިރާއަކުން އާންމުކޮށް ހުޅުވާލައިގެން ޓިކެޓަށް އެދުމުގެ ފުރުސަތު ދިނުމަށެވެ. އެދާއިރާތަކަކީ ވައިކަރަދޫ ދާއިރާ، މަކުނުދޫ ދާއިރާ، އިނގުރައިދޫ ދާއިރާގެ އިތުރުން ފެލިދޫ ދާއިރާއެވެ. އަދާލަތު ޕާޓީންވަނީ އެޕާޓީގެ ނަމުގައި މިނޫން ދާއިރާއަކަށް ކުރިމަތިލާން ބޭނުންވާ ފަރާތްތަކުން އެފުރުސަތު ހުޅުވާލާފައެވެ.

އަދާލަތު ޕާޓީން ހުޅުވާލި ދާއިރާތަކަށާއި، މިނޫން ދާއިރާތަކަށް ކުރިމަތިލާން ބޭނުންވާ ފަރާތްތަކުންވެސް 23 ޖަނަވަރީ 2023 ވާ އަންގާރަ ދުވަހުގެ 16:00 ގެ ކުރިން އެކަމަށް އެދި ހުށަހެޅުމުގެ ފުރުސަތުވަނީ ހުޅުވާލާފައެވެ.

ޕާޓީން ހުޅުވާލި 4 ދާއިރާއަށް އެދި ފޯމް ހުށަހަޅާނީ ޕާޓީގެ އިދާރާއަށެވެ. އަދި އިތުރު ދާއިރާއަކުން ކުރިމަތިލާން ބޭނުންވާ ފަރާތްތަކުން ޕާޓީގެ އިންތިހާބީ ކޮމިޓީއަށް އެޑްރެސްކޮށް, ސިޓީ ފޮނުއްވުމަށް އަދާލަތު ޕާޓީންވަނީ އެދިފަ އެވެ.

އަދާލަތު ޕާޓީއަކީ ރާއްޖޭގެ އެންމެ ގިނަ ދުވަސްވީ ޕާޓީތަކުގެ ތެރޭގައި ހިމެނޭ ޕާޓީ އެކެވެ. ނަމަވެސް އިންތިހާބު ތަކުގައި ވާދަކޮށް ކާމިޔާބު ހޯދުމުގައި އެެ ޕާޓީ އަކީ ވަރަށް ނާކާމިޔާބު ޕާޓީ އެކެވެ. މިހާތަނަށް މަޖިލީހުގެ އެންމެ ގޮނޑިއެއް ނޫނީ ކާމިޔާބު ކުރެވިފައެއް ނުވެ އެވެ.