ހުޅުމާލޭގައި އިތުރު ހޮސްޕިޓަލެއް އަޅަން ޖެހޭ: ރައީސް

މަރިޔަމް އަނާ

27 ފެބުރުއަރީ 2024 - 20:39

0 comments

ހުޅުމާލޭގައި ދިރިއުޅެމުންދާ އާބާދީއާ އެކަށީގެންވާ ފެންވަރެއްގައި ހުޅުމާލެ ހޮސްޕިޓަލްގެ ފެންވަރު ރަގަޅު ކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިހެން ވިދާޅުވީ "ރައީސްގެ ޖަވާބު" ޕްރޮގްރާމުގައި، އާންމު ރައްޔިތަކު ކުރި ސުވާލަކަށް ޖަވާބު ދެއްވަމުންނެވެ.

"އިރާދަކުރެއްވިއްޔާ ހުޅުމާލެ ހޮސްޕިޓަލްގަ ދެންމެ ތި ވިދާޅުވި ކަންކަން ހައްލު ވެގެން ދާނެ. ހުޅުމާލޭގަ ލައްކައެއްހާ މީހުން، ފޭސް ވަން، ފޭސް ޓޫ އެއްކޮށް ދިރިއުޅެމުން ދާނެ ކަމަށް ގަބޫލު ކުރެވެނީ. އެހެންވީމަ އެހާ ގިނަ މީހުންނަށް ހިދުމަތް ދޭއިރު ހުޅުމާލެ ހޮސްޕިޓަލުގެ ފެންވަރު ވަރަށް ބޮޑު ތަނުން މަތި ކުރަން ޖެހޭ. އަދި އިތުރު ހޮސްޕިޓަލެއް ވެސް އަޅަން ޖެހޭ،" ރައީސް ވިދާޅުވި އެވެ.

ރައީސް ވިދާޅުވީ މާލެ ސަރަހައްދުގައި ދިރިއުޅޭ ރައްޔިތުންނަށް ފެންވަރު ރަގަޅު ސިއްހީ ނިޒާމެއް ގާއިމް ކުރުމަށް ސަރުކާރުން ފަށާފައިވާ މަސައްކަތުގެ ނަތީޖާ ކުރިއަށް އޮތްތަނުގައި ފެންނަމުން ދާނެ ކަމަށެވެ.

ހުޅުމާލޭގައި ލައްކައެއްހާ މީހުން ދިރިއުޅޭކަން ފާހަގަކުރައްވާ ރައިސް ވިދާޅުވީ މި ހުރިހާ ރައްޔިތުންނަށް ހިދުމަތްދޭއިރު ހުޅުމާލެ ހޮސްޕިޓަލްގެ ފެންވަރު ވަރަށް ބޮޑަށް ރަނގަޅުކުރަންޖެހޭ ކަމަށެވެ. އަދި ހުޅުމާލޭގައި އިތުރު ހޮސްޕިޓަލެއް އަޅަންޖެހޭ ކަމަށް ވެސް ރައީސް ވިދާޅުވި އެވެ.

ހުޅުމާލޭގައި ދިރިއުޅޭ ރައްޔިތުންނާ، މާލޭގައި ދިރިއުޅޭ ރައްޔިތުންނަށް އެންމެ ރަނގަޅު ފެންވަރުގައި ސިއްހީ ހިދުމަތް ފޯރުކޮށްދިނުމުގެ މަސައްކަތް ވަރަށް ބާރު ސްޕީޑުގައި ކުރިއަށްދާ ކަމަށް ރައީސް ވިދާޅުވި އެވެ.