ހުޅުމާލެ ހޮސްޕިޓަލުގެ އިމަޖެންސީ ރޫމް ބޮޑުކުރަން ހަވާލުކޮށްފި

މަރިޔަމް އަނާ

18 ނޮވެމްބަރ 2024 - 18:53

0 comments

ދެ މަސްތެރޭ، ހުޅުމާލޭ ހޮސްޕިޓަލްގެ އިމަޖެންސީ ރޫމް ބޮޑުކުރަން އާރްޑީސީއާ ހާވަލުކުރުން

ހުޅުމާލޭ ހޮސްޕިޓަލްގެ އިމަޖެންސީ ރޫމް (އީއާރް) ބޮޑުކުރުމަށް ރޯޑް ޑެވަލޮޕްމަންޓް ކޯޕަރޭޝަން (އާރްޑީސީ)އާ ހަވާލުކޮށްފި އެވެ.

މާލެ ސިޓީ ގްރޫޕް އޮފް ހޮސްޕިޓަލް އިން އާރުޑީސީއާ އެކު މިއަދު އެއްބަސްވުމެއްގައި ސޮއިކުރީ އިމަޖަންސީ ރޫމްގެ ކެޕޭސިޓީ އިތުރުކޮށް ހިދުމަތް ފުޅާކުރުމަށްޓަކައި ސިވިލް ވޯކް އެންޑް އިންޓީރިއާ ފިނިޝިންގެ މަސައްކަތް 60 ދުވަސް ތެރޭގައި ނިންމުމަށެވެ.

ހުޅުމާލެ ހޮސްޕިޓަލުން ނެރުނު ބަޔާނެއްގައި ބުނީ އެ ހޮސްޕިޓަލްގެ އިމަޖެންސީ އަދި ޖީއޯޕީޑީ ހިދުމަތް ހޯދި މީހުންގެ އަދަދު 250،000 އަށް ވުރެ މައްޗަށް އަރާފައިވާ ކަމަށެވެ.

އެ ހޮސްޕިޓަލްގައި މިހާރު ހުރީ ހަތް އެނދުގެ އިމަޖަންސީ ރޫމެއް ކަމަށާއި ނަމަވެސް މި މަޝްރޫއުގެ ދަށުން ޒަމާނީ ވަސީލަތްތަކާ އެކު 14 އިމެޖަންސީ އެނދާއި ކްރިޓިކަލް ހާލަތްތަކުގައި ފަރުވާ ދިނުމަށް ހާއްސަ ކުރެވޭ ރިސަސްއެއް ގާއިމް ކުރެވޭނެ ކަމަށް އެ ބަޔާނުގައި ބުނެފައިވެ އެވެ.

މި މަޝްރޫއުގެ ތަފްސީލުތައް ހިއްސާކުރައްވަމުން ހަލީމް ވިދާޅުވީ، އެ ހޮސްޕިޓަލްގެ އީއާރްއަށް ގިނަ އަދަދެއްގެ މީހުން އަންނަ ކަމަށާއި މި ވަގުތު އީއާރްގައި ބޭނުން ކުރަމުން ދަނީ ހަތް އެނދު ކަމަށެވެ.

ހަތް އެނދަކީ އެ ހޮސްޕިޓަލާ އެކަށީގެންވާ އަދަދެއް ނޫން ކަމަށާއި އެއަށް ވުރެ ގިނަ ބަލި މީހުންނަށް ހޮސްޕިޓަލުގައި ފަރުވާ ދޭ ކަމަށް ޙަލީމް ވިދާޅުވިއެވެ.

ޓާޝަރީ ހޮސްޕިޓަލެއް ގޮތުގައި ހުޅުމާލޭ ހޮސްޕިޓަލް ކުރިއަށް ގެންދާއިރު އީއާރް ބޮޑު ކުރުމަކީ ކޮންމެހެން ކުރަން ޖެހޭ ކަމެއް ކަމަށާއި މިހާރު ބޮޑުކުރަނީ ހަތް އެނދުން 14 އެނދުގެ އީއާރްއަކަށް ކަމަށް ހަލީމް ވިދާޅުވިއެވެ.

މި މަޝްރޫއު އާރްޑީސީއާ ހަވާލުކުރީ ދެ މަސް ތެރޭ މަސައްކަތް ނިންމާ ގޮތަށެވެ.