ހުޅުމާލެ ހޮސްޕިޓަލުގެ 14 އެނދުގެ އެމާޖެންސީ ރޫމް ހުޅުވައިފި

މަރިޔަމް އަނާ

26 މެއި 2025 - 18:24

0 comments

ޒަމާނީ ވަސީލަތްތަކާއެކު ހުޅުމާލެ ހޮސްޕިޓަލުގައި އަލަށް ޤާއިމުކުރި އިމަރޖެންސީ ރޫމް ރައީސް ޑރ. މުހައްމަދު މުއިއްޒު ހުޅުއްވައިދެއްވައިފި އެވެ.

މިސަރުކާރުން ފެށި މި މަޝްރޫއުގެ އަމަލީ މަސައްކަތް ފެށީ މިދިޔަ އަހަރުގެ ޑިސެމްބަރު މަހުގެ އަށް ވަނަ ދުވަހެވެ. މި މަޝްރޫއުގެ މަސައްކަތް ނިމިގެން ދިއުމާއެކު، މިހާރު އެ ހޮސްޕިޓަލުގައި ފަރުވާދޭ އެމާޖެންސީ ރޫމްތަކުގެ އަދަދު ވަނީ ދެގުނަ ވެފައެވެ. މިގޮތުން މިހާރު އެ ހޮސްޕިޓަލުގެ އެމާޖެންސީ ރޫމްގައި އެއްފަހަރާ 14 އެނދުގައި ބަލި މީހުން އެނދުމަތިކޮށްގެން ފަރުވާ ދެވޭނެއެވެ.

ޒަމާނީ މެޑިކަލް އާލާތްތަކާއެކު ފަރުމާކޮށްފައިވާ މި ރޫމުގައި ކްރިޓިކަލް ބަލި މީހުންނަށް ޚާއްސަ ފަރުވާ ދިނުމަށް ރިސަސިޓޭޝަން ރޫމެއް ވަނީ ޤާއިމުކޮށްފައެވެ. ފުރާނައަށް ނުރައްކާވާ ޙާލަތުގައި އަވަސް ފަރުވާދެވޭ އެންމެ ފުރިހަމަ އާލާތްތަކާއެކު، މި ރޫމް ތައްޔާރުކޮށްފައިވަނީ ބޮޑެތި އިމަރޖެންސީ ޙާލަތްތަކަށް ޚާއްސަ އިސްކަމެއްދީގެންކަމަށް ހުޅުމާލެ ހޮސްޕިޓަލުން ބުނެ އެވެ.

ހުޅުމާލެ ހޮސްޕިޓަލުގައި އަހަރެއްގެ މައްޗަށް 380،000 އަށްވުރެ ގިނަ މީހުންނަށް ހިދުމަތް ދެއެވެ.

މާލެ ގްރޫޕް އޮފް ހޮސްޕިޓަލުން ބުނީ، މި އެމާޖެންސީ ރޫމްގެ ސަބަބުން އެކްސިޑެންޓްތަކާއި، ކުއްލި ފަރުވާ ބޭނުންވާ ކޮންމެ ހާލަތެއްގައި އެ ހޮސްޕިޓަލުން ވަގުތުން ރަނގަޅު ފަރުވާ ލިބެން ފަށާނެ ކަމަށެވެ.