އިންޑިއާގެ އެހީގައި ނިންމާފައިވާ މަޝްރޫތަކެއް އިފްތިތާހުކޮށްފި

ހަސަން ހަލީމް

09 އޯގަސްޓް 2024 - 23:16

0 comments

އިންޑިއާގެ އެހީގައި ކުރިއަށްގެންދިޔަ 6 މަޝްރޫއެއްގެ ނިމުން ފާހަގަކޮށްފި އެވެ.

މި މަޝްރޫއުތަކުގެ ނިމުން ފާހަގަކޮށްފައިވަނީ އިންޑިއާގެ އެކްސްޓަރނަލް އެފެއާޒް މިނިސްޓަރު ޑރ. ސުބްރަމާނިއަމް ޖަޔަޝަންކަރު މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. މި މަޝްރޫއުތަކުގެ ނިމުން ފާހަގަކުރީ ޚާރިޖީ ވުޒާރާގައި މިރޭ ބޭއްވި ހާއްސަ ރަސްމިއްޔާތެއްގަ އެވެ.

ނިމުން ފާހަގަކޮށްފައިވަނީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ކުރިއަށްގެންދިޔަ މަޝްރޫއުތަކުގެ އެވެ.

ފޮރިން މިނިސްޓްރީގައި ބޭއްވި ރަސްމިއްޔާތެއްގައި އިފްތިތާހު ކުރި މަޝްރޫއުތަކުގެ ތެރޭގައި ހިމެނެނީ:

ނުކުޅެދުންތެރިކަން ހުންނަ ކުދިންނަށް ކިޔަވައިދިނުމަށް، ހއ. ދިއްދޫގައި ހުންނަ އަތޮޅު ތައުލީމީ މަރުކަޒާއި ލ. ގަމުގައި ހުންނަ އިހައްދޫ ސްކޫލާއި ގދ. ތިނަދޫގެ އަބޫބަކުރު ސްކޫލުގައި ގާއިމުކުރި "އިންކްލޫސިވް އެޑިޔުކޭޝަން ސަޕޯޓް ޔުނިޓް"
ހދ. ކުޅުދުއްފުށީ ރީޖަނަލް ހޮސްޕިޓަލުގައި ގާއިމުކުރި 'ޗައިލްޑް ޑިވެލޮޕްމެންޓް ސެންޓަރު.' މިތަނުގައި ކުޑަކުދިންނަށް ފިޒިއޮތެރަޕީ އާއި ސްޕީޗް ތެރަޕީ އާއި ކައުންސެލިން އާއި ސައިކޮލޮޖިކަލް އެސެސްމެންޓް މިހާރު ހެދޭނެ
ރ. އުނގޫފާރު ރީޖަނަލް ހޮސްޕިޓަލުގައި ގާއިމުކުރި މެންޓަލް ހެލްތު ޔުނިޓު
ތ. ތިމަރަފުއްޓާއި ވޭމަންޑޫގެ އިތުރުން ގއ. ކޮނޑޭގައި މަގުބައްތި ޖެހުން

މީގެއިތުރުން، މި ރަސްމިއްޔާތުގައި ދެ އެއްބަސްވުމެއްގައި ސޮއިކޮށްފައެވެ. އެއީ އިކޮނޮމިކް ޑިވެލޮޕްމެންޓް މިނިސްޓްރީ އާއި އިންޑިއާގެ ނެޗުރަލް ޕޭމަންޓް ކޯޕަރޭޝަނާ ދެމެދުވި އެއްބަސްވުމަކާއި ސިވިލް ސާވިސް ކޮމިޝަނުގެ 1،000 މުވައްޒަފަކު ތަމްރީނުކުރުމަށް، އެ ކޮމިޝަނާއި އިންޑިއާގެ ނެޝަނަލް ސެންޓަ ފޯ ގުޑް ގަވަނެންސްއާ ދެމެދުވި އެއްބަސްވުމެކެވެ.

ތިން ދުވަހަށް ޖައިޝަންކަރު ރާއްޖެއަށް ކުރައްވާ މި ދަތުރުފުޅުގައި ރައީސް ޑރ. މުޙައްމަދު މުއިއްޒާ ބައްދަލު ކުރުމަށް ވެސް ވަނީ ހަމަޖެހިފަ އެވެ.