އިންޑިއާގެ އާ ސަފީރު ފަތްކޮޅު އަރުވައިފި

އަލީ ރާޒީ

06 ޖެނުއަރީ 2025 - 12:14

0 comments

އިންޑިއާއިން ރާއްޖެއަށް ކަނޑައެޅި އާ ސަފީރު, ޖީ ބާލަސުބްރަމާނިއަން އޭނާގެ މަގާމުގެ ފަތްކޮޅު ރައީސް ޑރ. މުހައްމަދު މުއިއްޒުއަށް މިއަދު އަރުވައިފި އެވެ.

ޖުމްހޫރީ މައިދާނުން ރައީސް އޮފީހަށް ސަފީރު ވަޑައިގަތީ ރަސްމީ އިއްޒަތުގައި ހަތްކޮޅާއެކު އެވެ. ހަތްކޮޅު އެރުވީ އެމްއެންޑީއެފްގެ ބޭންޑުންނެވެ.

ސަފީރުކަމުގެ ފަތްކޮޅު އެރުވުމުގެ ރަސްމިއްޔާތުގައި އިންޑިޔާ ސަފީރު ވަނީ އެ ގައުމުގެ ބޮޑުވަޒީރު ނަރެންދުރަ މޯދީ އާއި އެ ގައުމުގެ ފޮރިން މިނިސްޓަރު ޑރ. ސުބްރަމާނިޔަން ޖައިޝަންކަރުގެ ވެދުމާއި ސަލާން ރައީސް މުއިއްޒަށް ރައްދު ކުރައްވައިފަ އެވެ.

މި ބައްދަލުވުމުގައި ދެ ގައުމުގެ ގުޅުން އިތުރަށް ބަދަހިކުރުމާ ގުޅޭ ގޮތުންނާއި އިންޑިއާ ސަރުކާރުގެ އެހީގައި ރާއްޖޭގައި ހިންގަމުން މަޝްރޫއުތަކާއި އެކި ދާއިރާތަކުން ކުރަމުންދާ އިންވެސްޓުމަންޓުތަކުގެ އިތުރުން ދެ ގައުމުގެ ރައްޔިތުންގެ ގުޅުން ވަރުގަދަކުރުމާ ގުޅޭ ގޮތުން ވެސް މަޝްވަރާކުރެއްވި އެވެ.

ރައީސް އޮފީހުން ބުނި ގޮތުގައި މި ބައްދަލުވުން ނިންމަވާލައްވަމުން އިންޑިއާއާ އޮންނަ ގުޅުން ދެމިގެންދާނެ ކަމުގެ ޔަގީންކަން ރައީސް ދެއްވި އެވެ.

ބާލާސުބްރަމާނިއަން އަކީ 1998 ވަނަ އަހަރުން ފެށިގެން ހާރިޖީ ދާއިރާގައި މަސައްކަތް ކުރައްވަމުން ގެންދަވާ ބޭފުޅެކެވެ. އެގޮތުން އޭނާ މީގެކުރިން ވަނީ ތައިލެންޑް އަދި ރަޝިއާގައި ހުންނަ އިންޑިއަން މިޝަންގެ ޑެޕިއުޓީ ޗީފްގެ މަގާމު ވެސް ފުރުއްވާފަ އެވެ. އޭނާ ވަނީ އިންޑިއާ އިން ނައިޖީރިއާއަށް ކަނޑައަޅުއްވާފައި ހުންނަވާ ސަފީރުގެ މަގާމުވެސް އަދާކުރައްވާފަ އެވެ.

އިންޑިއާ އިން ރާއްޖެއަށް ކަނޑައަޅާ ސަފީރުކަމުގެ މަގާމުގައި މީގެ ކުރިން ހުންނެވީ މުނޫ މަހާވަރު އެވެ.