ރައީސް ގއ. އާއި ގދ. އަށް ފުރާވަޑައިގެންފި

މަރިޔަމް އަނާ

07 ޖެނުއަރީ 2025 - 10:50

0 comments

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ހުވަދުއަތޮޅަށް ކުރައްވާ ދަތުރުފުޅެއްގައި މިއަދު ހެނދުނު ފުރާވަޑައިގެންފި އެވެ.

ރައީސް އޮފީހުން ބުނީ ތިން ދުވަހަށް ކުރައްވާ މި ދަތުރުފުޅުގައި ގދ.ގެ ފަސް ރަށަކަށާއި ގއ. އަތޮޅުގެ ހަތަރު ރަށަކަށް އެ ރައީސް ވަޑައިގަންނަވާނެ އެވެ.

ގދ. އިން ރައީސް ވަޑައިގަންނަވަން ހަމަޖެހިފައި ވަނީ ހޯނޑެއްދޫ، ނަޑައްލާ، ވާދޫ، ފިޔޯރީ އަދި ރަތަފަންދުއަށެވެ. ގއ. އިން ވަޑައިގަންނަވާނީ ކަނޑުހުޅުދޫ، ނިލަންދޫ، މާމެންދޫ އަދި ދެއްވަދުއަށެވެ.

ރައީސްގެ މި ދަތުރުގައި ހޯނޑެއްދޫގެ ފެނާއި ނަރުދަމާ ނިޒާމުގެ ހިދުމަތް ފެށުމުގެ ރަސްމިއްޔާތު ޝަރަފުވެރިކޮށް ދެއްވައި
ގއ. އަދި ގދ. އަތޮޅުގެ ވީހާ ވެސް ގިނަ ރައްޔިތުންނާ ބައްދަލުކުރައްވައި ހާލުއަހުވާލު އޮޅުންފިލުއްވައި ރައްޔިތުންނާ މުހާތަބުކުރައްވައި ވާހަކަފުޅު ދައްކަވާނެ އެވެ.

މީގެ އިތުރުން މާމެންދު އާއި ދެއްވަދޫ ކައުންސިލާ ވެސް ބައްދަލުކުރައްވައި އެ ރަށްރަށުގެ ރައްޔިތުން އެންމެ ބޭނުންވާ ކަންކަމާއި ތަރައްގީއާ ގުޅޭ ކަންކަމާ ބެހޭ ގޮތުން މަޝްވަރާކުރައްވާނެ އެވެ.

މި ދަތުރުފުޅުގައި ވެސް ރައީސްގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބަައިވެރިވެވަޑައިގަންނަވާނެއެވެ. މި ދަތުރުފުޅަށް ފަހު ރައީސް މުއިއްޒު އެނބުރި މާލެ ވަޑައިގަންނަވަން ހަމަޖެހިފައިވަނީ ބުރާސްފަތި ދުވަހެވެ.