ރާއްޖޭގެ ރަށަކަށް 24 ގަޑިއިރު އެންމެ ގިނައިން ވާރޭ ވެހުނު ކަމުގެ ރެކޯޑު ކެލައަށް

އަލީ ރާޒީ

13 އޯގަސްޓް 2024 - 12:38

0 comments

ހއ. ކެލާއަށް ވޭތުވެދިޔަ 24 ގަޑިއިރުގެ ތެރޭގައި 231.5 މިލިލީޓަރުގެ ވާރޭ ވެހިފައިވާ ކަމަށް މެޓް އޮފީހުން ބުނެފި އެވެ.

ރާއްޖޭގެ މޫސުމާ ބެހޭ އިދާރާ މެޓް އޮފީހުން މިއަދު ނެރުނު ނޫސްބަޔާނެއްގައި ބުނީ މިދިޔަ ތިން ދުވަހު ރާއްޖޭގެ ބޮޑު ބަޔަކަށް ބޯކޮށް ވާރޭވެހި، ވައިގަދަވެފައިވާ ކަމަށެވެ. އަދި އިއްޔެ އެންމެ ބޯކޮށް ވާރޭވެހުނު ކަމަށް ރެކޯޑް ކުރެވިފައި ވަނީ ހއ. ކެލާގެ އޮޓޮމެޓިކް ވެދާ ސްޓޭޝަނަށް ކަމަށް ވެސް އެ އިދާރާއިން ބުންޏެވެ.

ކެލައަށް އިއްޔެ ވަނީ 231.5 މިލިމީޓަރުގެ ވާރޭވެހިފަ އެވެ.

"މިއީ މިހާތަނަށް އޮޓޮމެޓިކް ވެދާ ސްޓޭޝަނަކުން 24 ގަޑިއިރަށް ރެކޯޑްކުރެވިފައިވާ އެންމެ މަތީ އަދަދެވެ،" އެ ބަޔާނުގައި ބުންޏެވެ.

އޭގެ އިތުރުން، ވިލާގަނޑުގައި އެންމެ ވައި ގަދަވެފައިވާކަމަށް ރެކޯޑު ކުރެވިފައި ވަނީ ވެސް އިއްޔެ އެވެ. އެއީ ގަޑިއަކު 46 މޭލަށް ފ. ނިލަންދޫ އޮޓޮމެޓިކް ވެދާ ސްޓޭޝަނުންނެވެ.

ވޭތުވެދިޔަ 24 ގަޑިއިރުގެ ތެރޭގައި ހދ. ހަނިމާދޫއަށް 177.5 މިލިލީޓަރަށް، ރ. އިފުރަށް 102 މިލިލީޓަރުގެ ވާރޭ ވަނީ ވެހިފަ އެވެ.

މިހާރު ކުރަމުން މި ދަނީ ހުޅަނގު މޫސުމުގެ ވިއްސާރަ އެވެ. ވޭތުވެދިޔަ 24 ގަޑިއިރު އެންމެ ބޮޑަށް ވިއްސާރަކޮށްފައި ވަނީ އުތުރުގެ ރަށްރަށަށެވެ. އިއްޔެ ވަނީ އެ ހިސާމަށް އޮރެންޖު އެލާޓް ވެސް ނެރެފަ އެވެ. ވިއްސާރައިގެ ސަބަބުން ފެންބޮޑުވެފައިވާ ރަށްރަށުގައި އެމްއެންޑީއެފް އިން ދަނީ ފެން ހިންދުމުގެ މަސައްކަތް ވެސް ކުރަމުންނެވެ.

ރާއްޖޭގެ ހުރިހާ ސަރަހައްދެއްގެ ކަނޑުތައް ވެސް ގަދަވެ، ވިލާގަނޑުގައި ވަރަށް ގަދަވާނެ ކަމަށް ލަފާކުރެވޭ ކަމަށް މެޓް އޮފީހުން ބުންޏެވެ.

މެޓް އޮފީހުން ބުނީ ދިޔަވަރު ބޮޑުވާ ވަގުތުތަކުގައި ރަށްރަށަށް އުދަ އެރުން ވެސް އެކަށީގެންވާ ކަމަށެވެ.