ރާއްޖެއިން ސިއްހީ ފަރުވާ ކަށަވަރު ކުރުމުގެ އަމާޒަށް ސަރުކާރުން ދަނީ ވާސިލުވަމުން: ރައީސް
އަލީ ރާޒީ
02 އޭޕްރީލް 2025 - 14:05
0 comments

ރާއްޖެއިން ބޭރަށް ނުގޮސް، ރާއްޖޭގައި ތިބެގެން ސިއްހީ ފަރުވާގެ ހިދުމަތް ކަށަވަރު ކޮށްދިނުމުގެ އަމާޒަށް ވާސިލުވުމަށް ސަރުކާރުން ކުރައްވަމުން ގެންދަވާ މަސައްކަތްޕުޅުތަކާއި، މި ރޮނގުން ކުރިއަށް ކުރައްވަން ހުރި ކަންކަން، ރައީސް ޑރ މުޙައްމަދު މުއިއްޒު ހިއްސާ ކުރައްވައިފި އެވެ.
ރައީސް މި ކަންކަން ހިއްސާ ކުރައްވާފައި ވަނީ، ރައްޔިތުންނާ ވީހާވެސް ގާތުން މައުލޫމާތު ހިއްސާކުރައްވައި، ރައްޔިތުންގެ ޚިޔާލުތަކާއި ކަންބޮޑުވުންތައް އަޑުއައްސަވައި، ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅުދައްކަވަމުންނެވެ.ސިއްހީ ހިދުމަތް ފޯރުކޮށްދޭ ސަރުކާރުގެ މަރުކަޒުތަކުގެ ހިދުމަތްތައް ފުޅާ ކުރެއްވުމަކީ ވަރަށް ބޮޑު އިސްކަމެއް ދެއްވާ ކަމެއް ކަމަށާއި، ދިވެހިރާއްޖޭގެ އާބާދީގެ ދެބައިކުޅަ އެއްބައެއްހާ މީހުން ދިރިއުޅެމުންދަނީ މާލެ ސަރަޙައްދުގައި ކަމަށް ވާހިނދު، މާލެ ސަރަޙައްދަށް ވަރަށް ބޮޑު އިސްކަމެއް ދެއްވަން ޖެހޭ ކަމުގައި ރައީސް ވިދާޅުވި އެވެ. އެއީ ވަކި ރަށެއް ތަފާތު ކުރުން ނޫން ކަމަށާއި، ރާއްޖޭގައި މީހުން ދިރިއުޅޭ ހުރިހާ ރަށެއްގައިވެސް ސިއްހީ ހިދުމަތް ފޯރުކޮށްދޭ މަރުކަޒުތަކާއި ހަސްފަތާލުތައް ޤާއިމު ކުރެވި، ތަރައްގީ ކުރެވޭނެ ކަމުގެ ޔަޤީންކަންވެސް ރައީސް ވަނީ ދެއްވާފަ އެވެ.މި މޭރުމުން ވާހަކަފުޅު ކުރިއަށް ގެންދަވަމުން ރައީސް ވަނީ ސަރުކާރުން ހިންގަވާ އެންމެ ބޮޑު ހަސްފަތާލު ކަމުގައިވާ، އިންދިރާ ގާނދީ މެމޯރިއަލް ހޮސްޕިޓަލް (އައި.ޖީ.އެމް.އެޗް)ގެ ޚިދުމަތުގެ ފެންވަރު ރަނގަޅު ކުރުމަށް މިހާރުވެސް ކުރައްވަމުން ގެންދަވާ މަސައްކަތްޕުޅުތަކުގެ މަޢުލޫމާތު ޙިއްޞާ ކުރައްވާފައެވެ. އެގޮތުން، އައި.ޖީ.އެމް.އެޗަށް ދިމާވެފައިވާ ޖާގައިގެ ދަތިކަމަށް ޙައްލު ހޯއްދަވައިދެއްވުމުގެ ގޮތުން 75 އެނދުގެ މަޝްރޫޢެއް ނިންމަވައި، ހިދުމަތް ދެވެން ފަށާނެ ކަމުގައި ރައީސް ވިދާޅުވި އެވެ. މި މަޝްރޫޢުގައި ޖެނެރަލް ވޯޑުގެ ގޮތުގައި އިތުރު ކުރެވޭ 44 އެނދާއި، ހައި ޑިޕެންޑަންސީ ޔުނިޓް (އެޗް.ޑީ.ޔޫ) އެނދުގެ ގޮތުގައި އިތުރު ކުރެވޭ 15 އެނދާއި، 14 ޕްރައިވެޓް ޔުނިޓް ހިމެނެ އެވެ.ހަމަ މިއާއެކު، ޓާޝަރީ ފެންވަރަށް ބަދަލުކުރައްވާފައިވާ ހުޅުމާލޭ ހޮސްޕިޓަލުން ފޯރުކޮށްދޭ ހިދުމަތްތައް ތަރައްގީ ކުރައްވަމުން ގެންދަވާ ކަމުގައިވެސް ރައީސް "ޗައިނާއިން ފޯރުކޮށްދެއްވާ ހިލޭ އެހީގެ ތެރެއިން، ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްޤީ ކުރެއްވުމުގެ ހުރިހާ ކަމެއް މިހާރު ހަމަޖެހިފައި" ރައީސް ވިދާޅުވި އެވެ.މީގެ އިތުރުން، މާލެ ސަރަޙައްދުގައި ވަކިވަކި ކަންކަމަށް ޚާއްޞަ ހަސްފަތާލުތައް ތަރައްގީ ކުރެއްވުމަށްވެސް ގިނަ މަސައްކަތްޕުޅުތަކެއް ކުރައްވަމުން ގެންދަވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެގޮތުން ކެންސަރ ހޮސްޕިޓަލުގެ މަސައްކަތާއި، ތެލަސީމިއާއަށް ހާއްސަކޮށްގެން ހުޅުމާލޭގައި ތަރައްޤީ ކުރައްވާ ހަސްފަތާލާއި، އަންހެނުންނާއި ކުޑަކުދިންނަށް ޚާއްޞަ ހަސްފަތާލެއްގެ މަސައްކަތްޕުޅު މި ދައުރުގެ ތެރޭގައި ކޮށްދެއްވާނެ ކަމުގައި ރައީސް ވިދާޅުވި އެވެ.އެގޮތުން ސަރުކާރުން ތަންފީޒުކުރެއްވުމަށް މަސައްކަތްޕުޅު ކުރައްވަމުން ގެންދަވަނީ ވަށައިޖެހޭ ޞިއްޙީ ޚިދުމަތުގެ ސިޔާސަތެއް ކަމުގައި ރައީސް ވިދާޅުވި އެވެ. ނަމަވެސް، އަދުގެ ހާލަތު އޮތް ގޮތުން ރާއްޖެއިން ބޭރަށް ގޮސް ސިއްހީ ހިދުމަތް ހޯދަންޖެހޭ ޙާލަތްތައް މެދުވެރި ވާ ކަމަށާ، އެއީ ފަސޭހަ ކަމެއް ނޫންކަން ފާހަގަކުރައްވައި، ބަލިޖެހޭ ހިސާބުން، ރާއްޖޭގައި ތިބެގެން ފަރުވާ ކުރެވޭނެ އިންތިޒާމުތައް ހަމަޖެހިފައި އޮންނަންޖެހޭ ކަމުގައި ރައީސް ވަނީ ވިދާޅުވެފަ އެވެ.ރައްޔިތުންގެ އަޑުއައްސަވައި، ރައްޔިތުންނާ ގާތުން، ރައްޔިތުންގެ މަޝްވަރާއާއެކު ސަރުކާރު ހިންގެވުމަކީ، ރައީސް އެންމެ އިސްކަންދެއްވާ އެއް ސިޔާސަތެވެ."ރައްޔިތުންނާ އެކު" މި ނަމުގައި ރައީސް ކުރިއަށްގެންދަވާ ޕޮޑްކާސްޓަކީ، ރައީސްގެ އޮފީހުގެ ވެބްސައިޓުންނާއި މީސް މީޑިއާގެ މަންސަތަކުން ދުރަށް ފޮނުއްވާ ޕްރޮގްރާމެކެވެ.
ކިޔުންތެރިންގެ ޝުއޫރު