ބީއެމްއެލްއިން ރީކޯ މޫސަގެ ތިން ރަށެއް ނީލަމަށް ލަައިފި

ހަސަން ހަލީމް

27 އޮކްޓޫބަރ 2024 - 15:17

0 comments

މޫސާ މަނިކު - ފައިލް ފޮޓޯ މިހާރު

ލޯނެއް ނުދެއްކުމުން ހެވީލޯޑްގެ ތިން ރަށެއް ވިއްކާލަން ބީއެމްއެލް އިން އިއުލާނުކޮށްފި އެވެ.

މި ތިން ރަށަކީ ރީކޯ މޫސަ 2016 ވަނަ އަހަރު ބޭންކް އޮފް މޯލްޑިވްސްއިން ނެގި 11 މިލިއަން ޑޮލަރުގެ ލޯނެއް އަނބުރާ ނުދެއްކުމާ ގުޅިގެން 2020 ވަނަ އަހަރު އެ ބޭންކުން ކޯޓަށް ހުށަހެޅި މައްސަލައެއްގައި ސިވިލް ކޯޓުން އެ ރަށްތަކުގެ ހެޑް ލީސް ވިއްކައިލުމަށް ހުއްދަ ދީފައިވާ ތިން ރަށެވެ.

ބީއެމްއެލް އިން ކުރި އިއުލާނުގައި ބުނެފައިވަނީ ރަށްތައް އިއުލާނުކުރީ ހެވީ ލޯޑް މޯލްޑިވްސްގެ ނަމުގައި ނެގި ލޯނަކަށް ފައިސާ ދައްކާފައި ނުވާތީ އެވެ. ހެވީ ލޯޑަކީ ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ މަސްލަހަތު އޮންނަ ކުންފުންޏެކެެވެ.

އެ ތިން ރަށް ވިއްކުމަށް ބީއެމްއެލްއިން ހުޅުވާލާފައިވަނީ ދެ ގޮތަކަށެވެ. އެއީ:

ލ.ފަރެ، ލ.ކުޑަފަރެސް. ލ.ބޮޑުހުރާ އެއްކޮށް 23،262،000 (ތޭވީސް މިލިއަން ދެލައްކަ ފަސްދޮޅަސް ދެހާސް) ޑޮލަރަށްވުރެ ބޮޑު އަގެއްގަައި ގަތުން
ހ. ފަރެސް އަދި ކުޑަ ފަރެސް ވަކިން އެންމެ ކުޑަވެގެން 23،262،000 (ތޭވީސް މިލިއަން ދެލައްކަ ފަސްދޮޅަސް ދެހާސް) ޑޮލަރަށް ގަތުން
ށ. ބޮޑުހުރާ ވަކިން 23،262،000 (ތޭވީސް މިލިއަން ދެލައްކަ ފަސްދޮޅަސް ދެހާސް) ޑޮލަރަށް ގަތުން

ފަރެސް އައިލެންޑާއި ކުޑަ ފަރެސްގައި މިހާރު ހިންގަމުންދާ ރަހާ ރިސޯޓުގައި 100 ކޮޓަރި ހުންނައިރު ހުރިހާ ކޮޓަރިއަކީ ވެސް ބީޗް ވިލާ އެވެ. އޭގެ އިތުރުން ވޯޓާ ސްޕޯޓްސްގެ ކުޅިވަރުތަކާއި ޑައިވިން އާއި ސްޕާގެ ހިދުމަތް ވެސް މި ރިސޯޓުން ލިބޭނެ އެވެ.

އެ ރަށްތައް ގަންނަން ޝައުގުވެރިވާ ފަރާތްތައް އަންނަ މަހުގެ 28 ގެ ކުރިން ޝައުގުވެރިކަން ފާޅުކުރުމަށް ވަނީ އެދިފަ އެވެ.