މިސް ޔުނިވާސްގައި ވާދަކުރާ ޝައިނާއަށް ޑިމޮކްރެޓްސްގެ މަރުހަބާ

އައިމިނަތު ޝިޔާޒާ

30 އޮކްޓޫބަރ 2024 - 22:20

0 comments

ދަ ޑިމޮކްރެޓްސްގެ ބައެއް އިސް ވެރިން

ފުރަތަމަ ފަހަރަށް މިސް ޔުނިވާސްގައި ރާއްޖެ ތަމްސީލުކުރާ މަރިޔަމް ޝައިނާ ނަސީމް އަށް ދަ ޑިމޮކްރެޓްސް އިން މަރުހަބާ ކިޔައިފި އެވެ.

ދުނިޔޭގެ ގިނަ ގައުމުތަކަކުން ބައިވެރިވާ ރީތީގެ މުބާރާތުގައި ރާއްޖޭގެ ނަމުގައި ދިވެއްސަކު ބައިވެރިވި މިއީ ފުރަތަމަ ފަހަރެވެ.

ޑިމޮކްރެޓްސް އިން ނެރުނު ބަޔާނެއްގައި ބުނީ ފިރިހެނުންނަށް އޮންނަ ކޮންމެ ފުރުސަތެއް އަންހެނުންނަށް ވެސް ލިބިދިނުމަކީ މި ރާއްޖޭގައި އެއާ އިންކާރުކުރެވި ދެކޮޅުހެދޭނޭ ކަންކަމެއް ނޫން ކަމަށެވެ. އަދި ރާއްޖެ އަނބުރާ އައިކޮޅަށް ފަހަތަށް ގެންދިޔުމަކީ އެއްވެސް ވަޒީރަކަށްވެސް، ނުވަތަ ވެރިޔަކަށްވެސް އޮތް ބާރެއް، އޮތް އިހުތިޔާރެއް ވެސް ނޫން ކަމަށް ބުނެފައިވެ އެވެ.

ޝައިނާ އަށް ޑިމޮކްރެޓްސް އިން ނުހަނު މަރުހަބާ ކިޔާ ކަމަށާއި އޭނާ އެ ނުކުންނަވަނީ ރާއްޖެއަށް ވަރަށް ފަހުރުވެރި ނަމެއް ހޯދުމަށް ކަމަށްވާއިރު އެކަމުގައި ފުރިހަމަ ކާމިޔާބީއަށް އެދޭ ކަމަށް އެ ބަޔާނުގައި ވަނީ ބުނެފަ އެވެ.

ޑިމޮކްރެޓްސް އިން ޝައިނާ އަށް މަރުހަބާ ކިޔާފައިވާއިރު، މިސް ޔުނިވާސްގައި ދިވެއްސަކު ބައިވެރިވުމަކީ ސަރުކާރުގެ ބައިވެރިވުމެއް އޮތް ކަމެއް ނޫން ކަމަށާއި އެކަން ބަލައި ނުގަންނަ ކަމަށް ޔޫތު މިނިސްޓްރީން މިއަދު ވަނީ ބުނެފަ އެވެ.

މިސް ޔުނިވާސްގެ 73 ވަނަ އެޑިޝަންގެ ފައިނަލް މިއަހަރު އޮންނާނީ މެކްސިކޯގެ ވެރިރަށް މެކްސިކޯ ސިޓީގައި ކުރިއަށް އޮތް ނޮވެމްބަރު 16 ވަނަ ދުވަހު އެވެ.