ކައުންސިލްތަކަށް ދޭން ޖެހޭ ބަޖެޓުގެ ބައެއް އުނިކޮށްލުމަކީ، ލާމަރުކަޒީ ނިޒާމު ނެތިކޮށްލުން: ޝާހިދު

އައިމިނަތު ޝިޔާޒާ

01 ނޮވެމްބަރ 2024 - 23:36

0 comments

އެމްޑީޕީގެ ރައީސް އަބްދުﷲ ޝާހިދު

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅި ބަޖެޓުގައި ކައުންސިލްތަކަށް ދޭ ފައިސާ މަދުކޮށްފައިވާތީ އެމްޑީޕީގެ ރައީސް އަބްދުﷲ ޝާހިދު ކަންބޮޑުވުން ފާޅުކޮށްފި އެވެ.

އެމްޑީޕީގެ ސަރުކާރުގައި ކައުންސިލްތަކަށް ބްލޮކް ގްރާންޓުގެ ގޮތުގައި ދޫކުރި ފައިސާއަށް ވުރެ ކުޑަ އަދަދެއް އަންނަ އަހަރަށް ލަފާކުރާ ބަޖެޓުގައި ހިމަނާފައިވާކަމަށް ބުނެ އެމްޑީޕީން ދަނީ އެކަމަށް ނުރުހުންފާޅު ކުރަމުންނެވެ.

އަންނަ އަހަރަށް ލަފާކޮށް ހުށަހަޅާފައިވާ 56.6 ބިލިއަން ރުފިޔާގެ ބަޖެޓާއި ގުޅޭގޮތުން، ޝާހިދު ވިދާޅުވީ ކައުންސިލް ހިންގުމަށް ބޭނުންވާ ބަޖެޓުން ބޮޑުބައެއް އުނިކޮށްލުމަކީ ލާމަރުކަޒީ ނިޒާމު ނެތިކޮށްލުމަށް ސަރުކާރުން ކުރަމުންގެންދާ މަސައްކަތުގެ އިތުރު ފިޔަވަޅެއް ކަމަށެވެ.

"ކައުންސިލްތަކަށް ލިބިދޭ ބަޖެޓުގެ ނިސްބަތް މަދުކޮށް، އެފައިސާ އެހެންކަންކަމަށް ޚަރަދުކުރުމުގެ ޤާނޫނީ ބާރެއް ސަރުކާރަށް ލިބިގެން ނުވޭ،" ކުރީގެ ފޮރިން މިނިސްޓަރު ޝާހިދު ވިދާޅުވި އެވެ.

އަންނަ އަހަރަށް 56.6 ބިލިއަން ރުފިޔާގެ ބަޖެޓެއް ސަރުކާރުން ހުށަހެޅި އިރު ކައުންސިލްތަކަށް ބްލޮކް ގްރާންޓުގެ ގޮތުގައި ދޭން ހިމަނާފައިވަނީ 1.4 ބިލިއަން ރުފިޔާ އެވެ. މި ހިނގާ އަހަރަށް ލަފާކޮށް ފާސްކުރި ބަޖެޓުގައި ކައުންސިލްތަކަށް ބްލޮކް ގްރާންޓުގެ ގޮތުގައި 2.2 ބިލިއަން ރުފިޔާ ހިމަނާފައިވެ އެވެ.

ލާމަރުކަޒީ ގާނޫނުގެ ދަށުން ކައުންސިލްތަކަށް "ބްލޮކް ގްރާންޓް" ނުވަތަ ހިލޭ އެހީ ކަނޑައަޅައި އެންމެ ފުރަތަމަ ފައިސާ ދޫކުރަން ފެށީ 2020 ވަނަ އަހަރުގެ ބަޖެޓާ އެކު އެވެ.

އެމްޑީޕީގެ ރައީސް ޝާހިދުގެ އިތުރަށް އެމްޑީޕީގެ ޕާލިމަންޓު ގުރޫޕުގެ ލީޑަރު، ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްގެ ފާޑުކިއުންތަކެއްވެސް ވަނީ މި މައްސަލައަށް އަމާޒުވެފައިވެއެވެ.

އެމްޑީޕީން ބޭއްވި ހަރުގެ ޖަލްސާގައި ވާހަކަ ދައްކަވަމުން ނާޒިލް ވިދާޅުވީ އެމްޑީޕީގެ ވެރިކަމުގައި ނިމިދިޔަ 19 ވަނަ މަޖިލީހުގައި ލާމަރުކަޒީ ގާނޫނަށް މުހިންމު ބޮޑެތި އިސްލާހުތަކެއް ގެނެސްފައިވާ ކަމަށެވެ. އޭގެ ތެރޭގައި މިނިވަންކަމާއެކީގައި ކައުންސިލްތައް ހިންގޭނެ ހުރިހާ ގޮތަކަށް ގާނޫނުން ކައުންސިލްތަކަށް މުތްލަކަގަށް ބާރުދީފައިވާނެ ކަމަށެވެ.

އޭގެ ތެރޭގައި ކަނޑައެޅޭ މިންވަރެއް ގާނޫނުގެ ތެރެއިން ދޭންޖެހޭނެކަމަށާއި، ވަރަށް ސާފުކޮށް އެވާހަކަ ލިޔެފައި އޮންނާނެ ކަމަށެވެ. އަދި ބްލޮކް ގްރާންޓުގެ ގޮތުގައި ބަޖެޓުގެ 5 އިންސައްތަ ދޭންޖެހޭނެ ވާހަކަ ލިޔެފައި އޮންނާނެ ކަމަށެވެ.