މުއާސަލާތީ ހިދުމަތުން އިތުރު ފީއެއް ނަގަނީ

މަރިޔަމް އަނާ

19 ނޮވެމްބަރ 2024 - 15:25

0 comments

މުއާސަލާތީ ހިދުމަތް ދޭ ފަރާތްތަކުގެ އަތުން އަންނަ އަހަރުން ފެށިގެން އިތުރު ފީއެއް ނަގަން އަންނަ އަހަރަށް ލަފާކުރާ ދައުލަތުގެ ބަޖެޓުގައި ހިމަނައިފި އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓްގައިވާ ގޮތުން ފިސްކަލް އަދި ދަރަނި މެނޭޖްކުރަން އާމްދަނީ އިތުރުކުރަން މުހިންމު ފިޔަވަޅުތަކެއް އަޅަން ވަނީ ނިންމައިފަ އެވެ. އޭގެ ތެރެއިން އެއް ކަމަކީ ރާއްޖޭގެ ރޭޑިއޯ ފްރިކުއެންސީ ސްޕެކްޓްރަމް ހަރުދަނާކަމާ އެކު ބެލެހެއްޓުމަށް ފްރިކުއެންސީ ސްޕެކްޓްރަމް ޗާޖެއް ނެގުމެވެ.

އެ ފީ ނަގާނީ އަންނަ އަހަރުގެ ތެރޭގަ އެވެ. އެކަން ކުރާނީ އެކަމާ ގުޅޭ ގާނޫނާއި ގަވާއިދުތަކަށް ބަދަލު ގެނެސްގެންނެވެ. ނަމަވެސް އެ ފީ ނަގައިގެން ދައުލަތަށް ލިބޭނެ ކަމަށް ލަފާކުރާ އާމްދަނީއެއް ބަޖެޓްގައި ހިމަނައިފައެއް ނުވެ އެވެ.

އަންނަ އަހަރު އާމްދަނީގެ ގޮތުގައި ލިބޭނެ ކަމަށް ބަޖެޓުގައި ހިމަނާފައިވަނީ 40 ބިލިއަން ރުފިޔާ އެވެ. އޭގެ ތެރެއިން 29 ބިލިއަން ހޯދަން ކަނޑައަޅާފައިވަނީ ޓެކްސްގެ ގޮތުގަ އެވެ.