މަޖިލިސް ކައިރިއަށް ޕީއެންސީ އާއި އެމްޑީޕީން ވެސް އެއްވެ މުޒާހަރާ ކުރަނީ

އަލީ ރާޒީ

20 ނޮވެމްބަރ 2024 - 14:36

0 comments

ޕީއެންސީ އާއި އެމްޑީޕީއިން މަޖިލިސް ދޮށުގައި ބޭއްވި އެއްވުމުގެ ތެރެއިން - ފޮޓޯ: ދައުރު

ރައްޔިތުންގެ މަޖިލީސް ކުރާ ގެ ކައިރީގައި އެމްޑީޕީ އާއި ޕީއެންސީން މުޒާހަރާ ކުރަމުން އެބަ ދެއެވެ.

ގާނޫނުއަސާސީއަށް އިޞްލާޙެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކުރާ ޤާނޫނަކުންނެވެ. އެއީ، 70 މެންބަރުންނެވެ. ސަރުކާރު ހިންގާ ޕީއެންސީގައި މި ވަގުތު އެ އަދަދަށް މެންބަރުން އެބަތިއްބެވިއެވެ.

ސަރުކާރުން ވަނީ މައިގަނޑު ތިން ކަމެއް ގާނޫނުއަސާސީގައި ހިމަނަން މިއަދު ހުށަހަޅުއްވާފައެވެ. އެއީ؛

މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން

ޕީއެންސީގެ ސުޕަމެޖޯރިޓީން ބިލު ބަލައިގަނެ، މުޅި މަޖިލީހުގެ ކޮމިޓީއަށް ފޮނުވިއިރު އެ މަސައްކަތް ނިންމައި، ހަވީރު 5:30 ގައި އެ މައްސަލައަށް ތަޅުމުގައި ގޮތެއް ނިންމަން ޖަލްސާއެއް ވަނީ އެޖެންޑާކޮށްފަ އެވެ.

ޕީއެންސީގެ އެކްޓިވިސްޓުން މަޖިލިސް ދޮށަށް އެއްވެ އަޑު އުފުލަމުން ދަނީ ގާނޫނުއަސާސީއަށް ގެންނަ އިސްލާހަށް ތާއިދުކޮށް، އިދިކޮޅު އެމްޑީޕީއަށް ފާޑުކިޔުމަށެވެ. އެމްޑީޕީން މަޖިލިސް ދޮށުގައި އަޑު އުފުލަމުން ދަނީ "ގާނޫނުއަސާސީގެ ދިފާއުގައި" ކަމަށް ބުނެ އެވެ.

އެއް ވަގުތެއްގައި މައި ދެ ޕާޓީގެ ސަޕޯޓަރުންގެ އެއްވުން ކުރިއަށް ދިޔައިރު، ބަހުގެ ހަމަލާތައް ހޫނުވެ ހަމަނުޖެހުން ވެސް ހިނގާފައިވެ އެވެ. އެއްވުން ކޮންޓްރޯލް ކުރުމުގެ ތެރޭގައި ފުލުހަކު ބިންމައްޗަށް ވެއްޓި އަނިޔާ ވެސް ވެފައިވެ އެވެ.

ގާނޫނުއަސާސީއަށް ގެންނަން ހުށަހެޅި އިސްލާހުތައް މިއަދުން މިއަދަށް ފާސްކުރާތީ އެމްޑީޕީގެ މެންބަރުން ވެސް ވަނީ ނުރުހުން ފާޅުކުރައްވާފައެވެ. ޕީއެންސީން ބުނަނީ އެކަން ކުރަން މިހާރުވެސް މާ ލަސްވެއްޖެ ކަމަށެވެ.