ޕީއެންސީގެ އެތެރޭގެ އިންތިހާބު އަންނަ ހޮނިހިރު ދުވަހު

އައިމިނަތު ޝިޔާޒާ

21 ނޮވެމްބަރ 2024 - 23:32

0 comments

ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބު މި މަހުގެ 23 ވާ ހޮނިހިރު ދުވަހު ބޭއްވުމަށް ނިންމައިފި އެވެ.

އެންމެ ފުރަތަމަ މި އިންތިހާބު ބާއްވާ ނިންމާފައިވަނީ މިދިޔަ އޮކްޓޯބަރު މަހުގެ 19 ވަނަ ދުވަހުއެވެ. ނަމަވެސް ފަހުން ވަނީ މި މަހުގެ 9 އަށް އިންތިހާބު ފަސްކޮށްފަ އެވެ.

9 ވަނަ ދުވަހުގެ އެ ވޯޓު ފަސްކޮށްފައި ވަނީ ޖުމްހޫރީ ދުވަހާ ގުޅިގެން މިމަހުގެ 10 ވާ އާދިއްތަ ދުވަސް އެއީ ރަސްމީ ބަންދު ދުވަހެއްގެ ގޮތުގައި ރައީސް، ޑރ. މުހައްމަދު މުއިއްޒު ހަމަޖެއްސެވުމާ ގުޅިގެން އެ ހަފްތާ ބަންދުގައި ގިނަ ބަޔަކު ރަށުން ބޭރަށް ދަތުރު ކުރުމަށް ހަމަޖެހިފައިވުމާއެކު ވޯޓުލުމުގައި މެމްބަރުންނަށް ތަކުލީފުތައް ކުރިމަތިވާނެތީ، ކެންޑިޑޭޓުންނާއި މެމްބަރުންގެ އެދުމުގެ މަތިންނެވެ.

ޕީއެންސީން ބުނީ، ދާއިރާތަކުގެ އިންތިހާބުގެ ވޯޓު ނަގާ ތާރީހު ބަދަލުވުމާ ގުޅިގެން އިންތިހާބު ބާއްވަން ޖެހޭ ދާއިރާތަކާއި ރަށްރަށް އަދި ކެނޑިޑޭޓުންގެ ނަންތައް އަދި ވޯޓު ލެވޭ މީހުންގެ ލިސްޓު މިމަހުގެ 10 ގައި އާންމު ކުރާނެ ކަމަށެވެ.

23 ވަނަ ދުވަހު މި ނެގޭ ވޯޓުގައި 59 ދާއިރާއަކަށް މެމްބަރުން އިންތިހާބު ކުރާނެއެވެ.އެގޮތުން މިހާރު ވަނީ އެ އިންތިހާބަށް ކުރިމަތިލި ކެންޑިޑޭޓުންގެ ނަންތައް ތަރުތީބުކޮށް ލިސްޓުތައް އާންމުކޮށްފަ އެވެ.