އާ ގަވާއިދާ އެކު ދުންފަތުގެ ވިޔަފާރިކުރެވޭނީ ލައިސެންސެއް ހޯދައިގެން: ހެލްތު މިނިސްޓްރީ

އައިމިނަތު ޝިޔާޒާ

22 ނޮވެމްބަރ 2024 - 12:56

0 comments

ގަވާއިދު އާއްމުކުރުމުން ދުންފަތުގެ ބާވަތްތަކުން ވިޔަފާރިކުރެވޭނީ ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން މިނިސްޓްރީން ދޫކުރާ ސައްހަ ލައިސެންސް އޮވެގެން ކަމަށް ހެލްތު މިނިސްޓްރީން މިއަދު ބުނެފިއެވެ.

ދުންފަތުގެ ގާނޫނަށް ގެނައި އިސްލާހަށް އަމަލު ކުރަން ފަށާފައިވަނީ މިދިޔަ ހުކުރު ދުވަހު އެވެ. އެ ގާނޫނުގެ ދަށުން މި މަހު 15 އިން ފެށިގެން ވޭޕް ބޭނުން ކުރުމާއި ވިއްކުން އަދި ބެހުން މަނާވާނެ އެވެ. އަންނަ މަހު 15ގެ ފަހުން އެކަންކަން ކޮށްފި ނަމަވެސް ބޮޑެތި ޖޫރިމަނާ އަންނާނެ އެވެ.

ހެލްތު މިނިސްޓްރީން އިއްޔެ ނެރުނު ބަޔާނުގައި ބުނީ ދުންފަތުގެ ވިޔަފާރި ރާއްޖޭގައި ކުރާ މީހުންނަށް ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން މިނިސްޓްރީން ދޫކުރާ ސައްހަ ލައިސެންސެއް އޮންނަންވާނެ ކަމަށެވެ.

އަދި އެ ހުއްދަތައް ހޯދުމަށް ލާޒިމްވާނީ އެ ގާނޫނުގައި ބަޔާންކުރާ ފަދައިން އެ ހުއްދަތައް ދިނުމުގެ އުސޫލާއި އިޖުރާއަތުތައް ކަނޑައަޅާ ބަޔާންކުރާ ގަވާއިދު އާންމުކުރުމުން އެ ގަވާއިދުގައި ކަނޑައަޅާ މުއްދަތެއްގައި ކަމަށް އެ މިނިސްޓްރީން ބުންޏެވެ.

ގާނޫނުގެ ދަށުން ހަދާ ގަވާއިދުތަކާ ޚިލާފަށް އެއްވެސް ފަރާތަކުން ދުންފަތް ނުވަތަ ދުންފަތުގެ އެއްވެސް ބާވަތެއް ރާއްޖެއަށް އެތެރެކުރުމާއި، ބޭރުކުރުމާއި، ބެހުމާއި، ވިއްކުން މަނާވާނެއެވެ.

ރާއްޖެއިން ބޭރުން އަންނަ 18 އަހަރު ފުރިފައިވާ ފަތުރުވެރިން އަމިއްލަ ބޭނުމަށް ގެންނަ ދުންފަތުގެ ބާވަތްތައް ބަޔާންކޮށްފައިވާ މިންވަރަށްވުރެ އިތުރުވާނަމަ ކަސްޓަމްސްގެ އާންމު ގަވާއިދުގެ ދަށުން ކަސްޓަމްސްގެ ބެލުމުގެ ދަށުގައި ބެހެއްޓޭނެއެވެ.

ދުންފަތުގެ ގާނޫނަށް ގެނައި އަނެއް ބޮޑު ބަދަލަކީ ސަރުކާރުން ނިންމާފައިވާ ގޮތަށް، ދުންފަތުގެ ބާވަތްތައް ވިއްކޭނެ އެންމެ ހަގު އުމުރަކީ ގާނޫނުގައި އޭރު އޮތް 18 އަހަރުގެ ބަދަލުގައި 21 އަހަރަށް މަތިކުރުމެވެ.

އޭގެ އިތުރުން، މަނާ ތަންތަނުގައި ދުންފަތުގެ އިސްތިއުމާލުކޮށްފި ނަމަ، ހަރުކަށި ފިޔަވަޅު އެޅުމަށް ވެސް މި އިސްލާހުގައި ހިމަނާފައިވެ އެވެ.