އާސަންދައަށް ހޭދަކުރާ ފައިސާގެ ސަބަބުން ދައުލަތަށް ބުރަ ބޮޑު: ނާޒިމް

ހަސަން ހަލީމް

17 ނޮވެމްބަރ 2024 - 11:06

0 comments

ހުޅުމާލޭ ހޮސްޕިޓަލް ޓާޝަރީ ފެންވަރަށް ބަދަލުކުރުމަށް ބޭއްވި ރަސްމިއްޔާތުގައި ނާޒިމް ވާހަކަދައްކަވަނީ

އާސަންދަ ނިޒާމަށް ދައުލަތުގެ ބަޖެޓުން ކޮންމެ އަހަރަކު ވަކި އަދަދެއް ހަމަޖައްސާފައިވީ ނަމަވެސް އެ ފައިސާ އިން މިހާތަނަށް އެއްވެސް އަހަރެއްގައި ފޫބެއްދިފައި ނުވާ ކަމަށާއި އެ ނިޒާމުވެފައި ވަނީ އިގްތިސާދީ ބުރައަކަށް ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ނާޒިމް މިހެން ވިދާޅުވީ ހުޅުމާލެ ހޮސްޕިޓަލް ޓާޝަރީ ފެންވަރަށް ތަރައްގީކޮށް ހުޅުވުމަށް އިއްޔެ ބޭއްވި ރަސްމިޔާތުގައި ވާހަކަދައްކަވަމުންނެވެ.

މި ސަރުކާރުން ވަނީ އާސަންދަ ނިޒާމުގެ އިސްރާފު ކުޑަކުރުމަށް ހާއްސަ ޕްލޭނެއް އެކަށައަޅައި ތަންފީޒު ކުރަން ފަށައިފަ އެވެ.

ހެލްތު މިނިސްޓަރު ވިދާޅުވި ގޮތުގައި، ސިއްހީ ނިޒާމަކީ ބޭސް ފަރުވާ ކޮށްދިނުމާއި އިމާރާތް އެޅުން އެކަންޏެއް ނޫނެވެ. އޭގެ ތެރޭގައި ވަށައިޖެހޭ ކަންތައްތަކެއް ކޮށް، ސިޔާސަތުތަކެއް ތަންފީޒު ކުރެވެން ޖެހޭނެ ކަމަށް ވިދާޅުވި އެވެ.

"އާސަންދައިގެ ތަފާސްހިސާބުތަކަށް ބަލާއިރު އެއްވެސް އަހަރެއްގައި ރައްޔިތުންގެ މަޖިލީހުން އެކަމަށް ފާސްކުރާ ބަޖެޓުން ނުފުދި، ކޮންމެ އަހަރަކު އެ އަށް ފައިސާ އަޅަ އަޅައި ތިބެން ޖެހުމުގެ ސަބަބުން މުޅި ނިޒާމު ވަނީ ދައުލަތުގެ އިގްތިސާދަށް ބޮޑު ބުރައަކަށްވެފައި،" ނާޒިމް ވިދާޅުވި އެވެ.

ނާޒިމް ވިދާޅުވީ ރައްޔިތުން އެދެނީ ސިއްހީ ނިޒާމަކީ އެންމެ ފައިދާ ހުރި ގޮތަކަށް، ހައްގުވެރި ފަރާތްތަކަށް ލިބޭ ނިޒާމަށް ވެގެން ދިއުން ކަމަށެވެ.

އެ ނިޒާމުގެ ސަބަބުން ގައުމުގައި ދެން ކުރަން ހުރި ކަންކަން ކުރުމަށް ގޮންޖެހުން ކުރިމަތިވެގެންދާން ރައްޔިތުން ބޭނުން ނުވާ ކަމަށް ވެސް އޭނާ ވިދާޅުވި އެވެ. އެކަމަށްޓަކައި އަޅަން ޖެހޭ ފިޔަވަޅުތައް ރައީސް އަޅުއްވަމުންގެންދަވާ ކަަަމަށް ވެސް ނާޒިމް ވިދާޅުވި އެވެ.