އިންޑިއާގެ މަހުޖަނަކަށް އެމެރިކާ އިން ދައުވާކޮށްފި

ހަސަން ހަލީމް

21 ނޮވެމްބަރ 2024 - 23:36

0 comments

އަދާނީ

އިންޑިއާގެ ބިލިއަނަރު ގޮތަމް އަދާނީ 250 މިލިއަން ޑޮލަރު ރިޝްވަތުގެ ގޮތުގައި ދިން ކަމަށް ތުހުމަތު ކުރެވޭ މައްސަލައިގައި އޭނާގެ މައްޗަށް އެމެރިކާގެ ޕްރޮސެކިއުޓަރުން އުފުލައިފި އެވެ.

ކަމާބެހޭ އިދާރާތަކުން ބުނީ ގޯތަމް އާއި އޭނާއަށް ބޮޑުބޭބެ ކިޔާ ކޮއްކޮ ސާގަރު އަދާނީ ހިމެނޭ ގޮތަށް އިތުރު ހަތް މީހަކު ވަނީ 20 އަހަރު ތެރޭގައި ދެ ބިލިއަން ޑޮލަރުގެ ފައިދާ ލިބޭނެ ކަމަށް ބެލެވޭ ކޮންޓްރެކްޓްތައް ހޯދުމަށް އިންޑިއާ ސަރުކާރުގެ އޮފިޝަލުންނަށް ގާތްގަނޑަކަށް 265 މިލިއަން ޑޮލަރުގެ ރިޝްވަތު ދިނުމަށް އެއްބަސްވެފައެވެ. އެއާއެކު އިންޑިއާގެ އެންމެ ބޮޑު ސޯލާ ޕަވާ ޕްލާންޓު މަޝްރޫއު ތަރައްގީކުރުމަށް ރާވައިފައިވާ ކަމަށްވެސް އިދާރާތަކުން ބުނެއެވެ.

އަދި ގޯތަމްއާއި ސާގަރުގެ އިތުރުން އަދާނީ ގްރީން އެނާޖީގެ އެހެން އެގްޒެކެޓިވްއެއް ކަމަށްވާ ކުރީގެ ސީއީއޯ ވްނީތު ޖައިން ވަނީ ލޯނު ދޫކުރާ ފަރާތްތަކާއި އިންވެސްޓަރުންގެ އަތުން އޮޅުވާލައިގެން ތިން ބިލިއަން ޑޮލަރަށް ވުރެ ގިނަ ޑޮލަރުގެ ލޯނާއި ބޮންޑް ހޯދާފައި ކަމަށް ވެސް އެމެރިކާގެ ޕްރޮސެކިއުޓަރުން ބުނެއެވެ.

ދައުވާގައިވާ ގޮތުން ބައެއް މީހުން ވަނީ ގޯތަމްއަށް "ނޫމެރޯ އުނޯ" އާއި "ބޮޑު މީހާ" ފަދަ ކޯޑް ނަންތަކުން ވާހަކަދައްކާފައެވެ.

އެ މައްސަލައާ ގުޅިގެން މިހާތަނަށް އަދާނީގެ އިތުރުން ރިޝްވަތު ދިނުމުގައި ބައިވެރިވި ހަތް މީހުންގެ ތެރެއިން އެކަކު ވެސް ހައްޔަރުކޮށްފައެއް ނުވެ އެވެ.

އަދާނީއަކީ އިންޑިއާގެ ބޮޑުވަޒީރު ނަރެންދުރަ މޯދީގެ އިތުރުން އިންޑިއާ ސަރުކާރުގެ އިސްވެރިންނާ ވަރަށް ގާތް ގުޅުމެއް އޮންނަ މީހެކެވެ.