2028އާ މެދު ގޮތެއް ނިންމަން އަދި އަވަސް: ޝާހިދު

އިސްމާއިލް ރިޒާ

25 ނޮވެމްބަރ 2024 - 09:54

0 comments

ދެހާސް އަށާވީސް ވަނަ އަހަރު އޮންނަ ރިޔާސީ އިންތިޚާބުގައި ވާދަކުރެއްވުމާ މެދު ގޮތެއް ނިންމަން އަދި އަވަސް ކަމަށާއި، ޕާޓީގެ ރައީސްގެ ހައިސިއްޔަތުން މިވަގުތު މުޅި 'ފޯކަސް' ހުރީ މި ސަރުކާރު ޖަވާބުދާރީކުރުވުމަށް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިރޭ ވިދާޅުވެއްޖެއެވެ.

ކުރިއަށް އޮތް ރިޔާސީ އިންތިހާބުގެ އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ އިއުލާންކުރައްވާފަ އެވެ.

ރާއްޖެ ޓީވީގެ 'ފަލަ ސުރުހީ' ޕްރޮގްރާމްގައި ރޭ ތަކުރާރުކޮށް ސުވާލުކުރުމުން ވެސް އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އަދި އެކަމަށް ޝައުގުވެރިކަން ހުރިކަން ޝާހިދު ހާމަކުރައްވާފައެއް ނުވެ އެވެ. ޝާހިދު ވިދާޅުވީ އޭނާގެ ފޯކަސް މިވަގުތު ހުރީ މި ސަރުކާރު ހަމަ މަގަށް އެޅުވުމަށާއި 2026 ގައި އޮންނަ ލޯކަލް ކައުންސިލް އިންތިހާބު އެމްޑީޕީ އަށް ކާމިޔާބުކޮށްދިނުމަށް ކަމަށެވެ.

މިވަގުތަކީ އަޅުގަނޑުމެން އެތެރޭގެ، 2028ގައި އޮންނަ ކަމެއްގައި އަޅުގަނޑުގެ އަމާޒު ހިފައިގެން ކަމެއް ކުރާނެ ދަނޑިވަޅެއް ނޫން. އަޅުގަނޑުގެ މުޅި މިސްރާބު ހުންނާނީ 2026ގައި މުޅި ރާއްޖެ ލޯކަލް ކައުންސިލް އިންތިހާބުގައި ރީނދޫކޮށްލުން،" ޝާހިދު ވިދާޅުވި އެވެ.

ޝާހިދު ވިދާޅުވީ ރައްޔިތުން މިއަދު އެދިއެދި ތިބި ޑިމޮކްރެޓިކް ނިޒާމު ރާއްޖެއަށް ދެވޭނެ ކަމުގެ އުންމީދު ރައްޔިތުންނަށް ލިބޭނެ މަގަށް ކަންތައްތައް ގެންދިޔުމަށް މަސައްކަތްކުރައްވާނެ ކަމަށެވެ.

"އެއްވެސް ހާލެއްގަ އަޅުގަނޑު ގަސްތެއް ނުކުރަން 2028ގަ އޮންނަ ކަމެއްގަ އަޅުގަނޑު ހުންނާނި ކޮންތަނެއްގަތޯ މިއަދު ނިންމާކަށް،" ޝާހިދު ވިދާޅުވިއެވެ.

އެމްޑީޕީ ޓިކެޓަށް ވާދަ ކުރައްވާނެކަން އެ ޕާޓީގެ ޗެއާޕާސަން ފައްޔާޒު އިސްމާއީލް އިތުރުން އެހެން ބޭފުޅަކު އަދި އިއުލާން ނުކުރި ނަމަވެސް ރައީސް ސޯލިހުއާއި ޝާހިދުގެ އިތުރުން މާލޭގެ މޭޔަރު އާދަމް އާޒިމް އެކަމަށް ޝައުގުވެރިވާ ކަމަށް ތުންތުންމަތިން ވާހަކަ ދެކެވެއެވެ. ނަމަވެސް މިހާތަނަށް އޭގެ ތެރެއިން އެއްވެސް ބޭފުޅަކު އެކަން ރަސްމީކޮށް ހާމައެއް ނުކުރައްވައެވެ.

ކުރިއަށް އޮތް ރިޔާސީ އިންތިހާބުގައި ވާދަ ކުރައްވާނެކަން ކުރީގެ ރައީސް ޔާމީން އަބްދުލްގައްޔޫމް ވެސް ވަނީ އިއުލާން ކުރައްވައިފަ އެވެ.