ހުޅުމާލޭގެ ބީޗް ސައިޑާއި ބީޗް ފްރަންޓުން އިތުރު 10 ބިން ވިއްކަނީ

މަރިޔަމް އަނާ

02 ޑިސެމްބަރ 2024 - 15:32

0 comments

އެޗްޑީސީ އިން އަށް ވަނަ ފަހަރަށް ހުޅުމާލޭގެ ދެވަނަ ފިޔަވަހިން ބިން ވިއްކަން ހުޅުވާލައިފި އެވެ.

ބީލަމުގެ އުސޫލުން ހަމައެކަނި ދިވެހިންނަށް ގަނެވޭ ގޮތަށް ވިއްކާ މި 10 ބިމުގެ ތެރޭގައި ހިމެނެނީ ބީޗް ފްރަންޓުން ވިއްކާ ތިން ބިމާއި ބީޗް ސައިޑުން ވިއްކާ ހަތް ބިމެވެ.

ބީޗް ފްރަންޓުން ވިއްކުމަށް ހުޅުވާލާފައިވަނީ 1559 އަކަފޫޓާއި 3250 އަކަފޫޓާ ދެމެދުގެ ބިންތަކެކެވެ. ބީޗް ސައިޑުން ހުޅުވާލާފައިވަނީ 1230 އަކަފޫޓާއި 1534 އަކަފޫޓާ ދެމެދުގެ ބިންތަކެކެވެ.

ބީޗް ފްރަންޓް ބިންތަކުގެ ބީލަން ފެށޭ އަގަކީ 4500 ރުފިޔާ އެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4000 ރުފިޔާ އެވެ. ކޮންމެ ފަރާތަކަށްވެސް އެއް ބިމަށްވުރެ ގިނަ ބިން ގަތުމަށް އެދި އީއޯއައި ހުށަހެޅުމުގެ ފުރުސަތު އޮވެ އެވެ.

މި ބިންތައް ވިއްކަން އެޗްޑީސީން ހުޅުވާލީ ހަމައެކަނި ދިވެހިންނަށް ގަނެވޭ ގޮތަށެވެ. އުމުރުން 18 އަހަރުން މަތީގެ ކޮންމެ މީހަކަށް ވެސް ބީލަމަށް ކުރިމަތިލެވޭނެ އެވެ. ބީލަން ހުށަހަޅަނީ ކުންފުންޏަކުން ނަމަ އެއީ ރާއްޖޭގައި ރަޖިސްޓަރީ ކޮށްފައިވާ 100 ޕަސެންޓް ދިވެހިންގެ ހިއްސާ އޮންނަ ކުންފުންޏަކަށް ވާން ޖެހެ އެވެ.

ރާއްޖޭގައި އެންމެ އަގުބޮޑުކޮށް ބިމުގެ އަގު ހުރީ ހުޅުމާލޭގަ އެވެ. މިދިޔަ އަހަރު ވެސް ދެ ފަހަރެއްގެ މަތިން ހުޅުމާލެ އިން ބިން ވިއްކަން ހުޅުވާލި އެވެ. އޭރު ފުރަތަމަ ބުރުގައި 17 ބިމެއް އަދި ދެވަނަ 13 ބިމެއް ވިއްކަން ހުޅުވާލި އެވެ.