ފެނަކައިގެ ދަރަނި 2027 ގައި ފިލުވޭނެ: އެމްޑީ މުއާޒު

އިސްމާއިލް ރިޒާ

06 ޑިސެމްބަރ 2024 - 13:22

0 comments

ފެނަކަ ކޯޕަރޭޝަންގެ ދަރަނިތައް 2027 ގައި އެއްކޮށް ފިލުވައި ލެވޭނެ ކަމަށް އެ ކުންފުނީގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވެއްޖެ އެވެ.

ޕީއެސްއެމްގެ ރާއްޖެ މިއަދު ޕްރޮގްރާމްގައި މުއާޒު ވިދާޅުވީ ހައްލުތަކާއެކު، ފެނަކައިގެ ހުރިހާ ދަރަންޏެއް 2027އަށް ފިލުވައިލެވި، އެ ކުންފުނީގެ އޮޕަރޭޝަންސްގައި ދިމާވާ މައްސަލަތައް ވެސް ހައްލު ކުރެވޭނެ ކަމަށެވެ.

އޭގެ ތެރޭގައި ހިމެނޭ ބައެއް ކަންކަމަކީ:

ނަރުދަމާ ނިޒާމު ބެލެހެއްޓުމަށް ދާ ޚަރަދާ އެއްވަރަށް ސަބްސިޑީ ލިބިގެންދިއުން
ޓެރިފް ޑިފަރެންސްގެ ގޮތުގައި ނަގާފައިވާ 619 މިލިއަން ރުފިޔާގެ ލޯނަށް ކެނޑުން ހުއްޓާލައި، އެސްޓީއޯ ތެޔޮ ބިލަށް އެ ފައިސާ ދެއްކުން
ލޯނުތަކުގެ ތެރެއިން ފިނޭންސް މިނިސްޓްރީއަށް ދައްކަންޖެހޭ ފައިސާ ތިން އަހަރަށް މަޑުޖައްސައިދިނުން
އެމްއައިބީން ނަގާފައިވާ 400 މިލިއަން ރުފިޔާގެ ދެ ލޯނު ރީސްޓްރަކްޗާ ކުރުން
ސަރުކާރުގެ ފަރާތުން ފެނަކައަށް ލިބެންޖެހޭ ފައިސާ މަހުން މަހަށް ލިބުން

"މި ދެންނެވި ހައްލުތަކާ އެއްކޮށް އިރާދަ ކުރެއްވިއްޔާ އަޅުގަނޑުމެންނަށް ދެހާސް ހަތާވީސް އަންނައިރުގައި މިހާރު މިހިރަ ހުރިހާ ދަރަންޏެއް އެއްކޮށް ފިލުވާލައި، އޮޕަރޭޝަންސްގައި މި ހުރި މައްސަލަތައް އެކީ އެއްކޮށް ހައްލު ކުރެވިގެންދާނެ." މުއާޒު ވިދާޅުވިއެވެ.

ސަރުކާރުން ދޭ ސަބްސިޑީއާއެކު މަހެއްގެ މައްޗަށް ފެނަކައަށް ލިބޭ ޖުމްލަ އާމްދަނީ އަކީ 213 މިލިއަން ރުފިޔާ އެވެ. އޭގެ ތެރެއިން 79 މިލިއަން ރުފިޔާ މުވައްޒަފުންގެ މުސާރައަށް ޚަރަދުވާ އިރު، އެއީ އާމްދަނީގެ 35 ޕަސަންޓެވެ.

މުއާޒު ވިދާޅުވި ގޮތުގައި ފެނަކަ ރަނގަޅަށް ހިންގޭ ނަމަ، މުސާރައަށް ކުރާ ޚަރަދު 28 ޕަސަންޓަށް ކުޑަ ކުރެވޭނެ ކަމަށެވެ.

މި ސަރުކާރު ވެރިކަމަށް އައި އިރު ފެނަކައިގެ ދަރަނި 4.3 ބިލިއަން ރުފިޔާ އަށް އަރާ ކަމަށް ބުނެފައިވެ އެވެ. ޚަރަދު ކުޑަކުރުމަށްޓަކައި ކުރަމުން އަންނަ މަސައްކަތުގެ ތެރެއިން މިދިޔަ އަހަރާ އަޅައިބަލާ އިރު، ޚަރަދުން 140 މިލިއަން ރުފިޔާ ދަށް ކުރެވިފައިވާ ކަމަށް ފެނަކަ އިން ބުނެ އެވެ.

ފެނަކައަކީ ސަރުކާރުގެ ކުންފުނިތަކުގެ ތެރެއިން އެންމެ ދަރަނި ބޮޑު އަދި މާލީ މައްސަލަތައް އެންމެ ގިނަ އެއް ކުންފުންޏެވެ.