އަނިޔާވެރި އަމަލުތަކަށް ހިތްވަރު ދިނުން ހިޔާލުފާޅުކުރުމުގެ މިނިވަންކަމުގެ ރޫހާ ހިލާފު: އެޗްއާރްސީއެމް

އަލީ ރާޒީ

10 ޑިސެމްބަރ 2024 - 22:28

0 comments

ރައީސް ޑރ. މުހައްމަދު މުއިއްޒު ވެސް ރައްޔިތުންނަށް ދެރަ ގޮތެއް ހައްދަވައިފި ނަމަ، ކުރީގެ ރައީސް މުހައްމަދު އަމީން ދީދީއާ މެދު އަމަލުކުރި ގޮތަށް އަމަލު ކުރަން ޖެހޭ ކަމަށް ބުނެ އިދިކޮޅު އެމްޑީޕީން ދައްކައިފައިވާ ވާހަކައާ މެދު ހިއުމަން ރައިޓްސް ކޮމިޝަން (އެޗްއާރުސީއެމް)އިން މިއަދު ކަންބޮޑުވުން ފާޅުކޮށްފި އެވެ.

އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޗެއާޕާސަން ފައްޔާޒް އިސްމާއިލް ވަނީ ރާއްޖޭގެ ފުރަތަމަ ރައީސް މުހައްމަދު އަމީންގެ ވެރިކަމާއި އެ މަނިކުފާނުގެ ނިމުން އައި ގޮތާ ގުޅުވައި، ކުޅުދުއްފުށީގައި އެ ޕާޓީގެ އެކްޓިވިސްޓަކު ދެއްކި ވާހަކަ ދިފާއުކުރައްވައި ވާހަކަ ދައްކަވައިފަ އެވެ.

ފާޑުކިޔުން އަމާޒުވި ވާހަކަ ދިފާއުކުރައްވައި ފައްޔާޒު ވިދާޅުވީ "ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދި ގޮތް" ކަމަށެވެ.

މިކަމާއި ގުޅިގެން އެޗްއާރުސީއެމުން ނެރުނު ބަޔާނެއްގައި ވަނީ އެމްޑީޕީން ދާދި ފަހުން ބާއްވާފައިވާ ހަފުލާތަކެއްގައި އާންމުންގެ މެދުގައި ނަފުރަތު އުފައްދައި އަނިޔާވެރިވުމަށް ހިތްވަރު ލިބޭ ގޮތަށް ވާހަކަދައްކައިފައިވާ ކަމަށެވެ.

އެ ކޮމިޝަނުން ބުނީ ޚިޔާލު ފާޅުކުރުމުގެ މިނިވަންކަމަކީ ވަރަށް ފުޅާކޮށް ގާނޫނު އަސާސީގެ ދަށުން ލިބިދީފައިވާ ހައްގެއް ކަމުގައިވީ ނަމަވެސް އެ ހައްގުގެ ބޭނުން ކުރަންވާނީ ވަކި ހުދޫދެއްގެ ތެރެއިން، އަނެކާގެ ހައްގުތަކަށް އިހުތިރާމު ކުޑަނުވާ ގޮތަށް ކަމަށެވެ.

ސިޔާސީ ޕާޓީތަކުން ބާއްވާ ޖަލްސާތަކާއި އެއްވުންތަކާއި މީޑިއާ އަދި ސޯޝަލް މީޑިއާ ޒަރިއްޔާއިން ފާޅުކުރާ ޚިޔާލުތަކުގައި ވެސް މީހުންގެ މެދުގައި ނަފުރަތު އުފެއްދުމަށާއި މުޖުތަމައުގެ ހަމަޖެހުމާއި މަސްލަހަތު ނަގާލުމަށް ގޮވާލުމުގެ އިތުރުން އަނިޔާވެރި އަމަލުތައް ކުރުމަށް ހިތްވަރު ލިބޭ ގޮތަށް ފާޅުކުރާ ޚިޔާލުތަކަކީ އެ ހައްގުގެ ރޫހާ ޚިލާފު އަމަލެއް ކަމަށް އެޗްއާރުސީއެމުން ފާހަގަކުރިއެވެ.

"މިފަދަ އަމަލުތައް ކުރުމަށް ހިތްވަރު ލިބޭ ގޮތަށް ގޮވާލައި ކުރެވޭ ޚިޔާލުފާޅުކުރުންތަކަކީ، މި ކޮމިޝަނުން ނުހަނު ކަންބޮޑުވާ ކަމެއް ކަމުގައި ދަންވަމެވެ. އަދި މިފަދަ އަމަލުތައް ކުށްވެރިކޮށް، ސިޔާސީ ޕާޓީތަކުންނާއި ޕާޓީތަކުގެ އިސް ފަރާތްތަކުން މިފަދަ އަމަލުތައް ނުކުރުމަށް ކޮމިޝަނުން ގޮވާލަމެވެ." އެ ކޮމިޝަންގެ ބަޔާނުގައިވެއެވެ.