ސްޕްރީމް ކޯޓުގެ ބެޗު ބަދަލުކުރަން މި ސަރުކާރުން އެއްވެސް މަސައްކަތެއް ނުކުރޭ: އޭޖީ

އަހުމަދު ނިހާން

11 ޑިސެމްބަރ 2024 - 15:19

0 comments

ސުޕްރީމް ކޯޓުގެ ފަނޑިޔާރުންގެ ބެންޗަށް ބަދަލު ގެނައުމުގެ މަސައްކަތް ސަރުކާރުން ނުކުރާ ކަމަށާއި އެކަމުގެ ނިޔަތެއް ވެސް ނެތް ކަމަށް އެޓާނީ ޖެނެރަލް އަހުމަދު އުޝާމް މިއަދު ވިދާޅުވެއްޖެ އެވެ.

އެމްޑީޕީ އިން "ގާނޫނުއަސާސީގެ ދިފާއުގައި" ކާނިވާ ސަރަހައްދުގައި ރޭ ބޭއްވި ޖަލްސާގައި ކުރީގެ ރައީސް ސޯލިހް ވިދާޅުވީ މި ސަރުކާރުގެ އަމާޒަކީ ހުދުމުހުތާރު ވެރިކަމެއް ރާއްޖޭގައި އަނެއްކާވެސް ގާއިމުކުރުން ކަމަށެވެ.

އެގޮތުން ރައީސް ސޯލިހު ވިދާޅުވީ ދެން ފެންނާނީ މި ސަރުކާރުން ސުޕްރީމް ކޯޓުގެ ބެންޗު ބަދަލުކުރާ މަންޒަރު ކަމަށެވެ.

"ދެން އަޅުގަނޑުމެންނަށް ފެނިގެންދާނީ، މި ސަރުކާރުގެ ދެން އަޅާނެ ފިޔަވަޅަކީ ސުޕްރީމް ކޯޓުގެ ބެންޗު ބަދަލުކުރުން. އެކަން ނުކޮށެއް ހުއްޓައެއްނުލާނެ. ހަގީގަތުގައި މި ސަރުކާރުގެ ސިފަ ފެނިގެންދާނީ އޭރުން،" ރައީސް ސޯލިހް ވިދާޅުވި އެވެ.

މި ވާހަކަތަކާއި ގުޅިގެން ސުވާލުކުރުމުން އުޝާމް ރާއްޖޭގެ އޮންލައިން ނޫހެއް ކަމުގައިވާ "ދައުރު" އަށް މިއަދު ވިދާޅުވީ އެއީ އެއްވެސް ކަހަލަ ހަގީގަތެއް އޮތް ވާހަކައެއް ނޫން ކަމަށާއި ސަރުކާރަށް އަހަރަކަށް ވުރެ ގިނަ ދުވަސްވެފައިވާ އިރު ވެރިކަންކުރާ ޕީއެންސީއަށް މަޖިލީހުގެ މެޖޯރިޓީ ލިބުނު ފަހުން މި ހިނގި ހަ މަހެއްހާ ދުވަހު ސަރުކާރުން އެކަން ނުކުރައްވާ ކަމަށެވެ.

އުޝާމް ވިދާޅުވީ ފަނޑިޔާރުންނާ ގުޅޭ ވަކި މައްސަލައެއް ވަކި ގޮތަކަށް ބަލަން ޖުޑީޝަލް ސާވިސް ކޮމިޝަން (ޖޭއެސްސީ) އަށް އެންގުން ފަދަ ކަންކަމަކީ މި ސަރުކާރުން އެއްގޮތަކަށް ވެސް ކުރާނެ ކަމެއް ނޫން ކަމަށާއި އަދި ފަނޑިޔާރުންނާ ގުޅޭ އެފަދަ ކަންކަން ހިނގާނީ ސަރުކާރުގެ އެއްވެސް ނުފޫޒެއް ނެތި އެ އޮންނަ އުސޫލުގެ ދަށުން ކަމަށް އޭނާ ވިދާޅުވި އެވެ.

ނަމަވެސް އެމްޑީޕީގެ ސަރުކާރުގެ ފުރަތަމަ އަހަރުގެ ތެރޭގައި ސުޕްރީމް ކޯޓުގެ ބެންޗު އެއްކޮށް ބަދަލުކުރިކަން އުޝާމް ފާހަގަ ކުރެއްވި އެވެ. އަދި ހައި ކޯޓުގެ ބެންޗަށް ވެސް ބޮޑު ބަދަލެއް ގެނެސް، ދަށުގެ ކޯޓުތަކުގެ ގާޒީން ވެސް ކުރީގެ ސަރުކާރުގައި ބަދަލުކުރި ކަމަށް އޭނާ ވިދާޅުވި އެވެ.

ސުޕްރީމް ކޯޓުގެ ބެންޗު ބަދަލުކުރުމަކީ ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި ހިނގި ކަމެވެ. އޭރު އެމްޑީޕީގެ ބާރު ޖުޑީޝަލް ސާވިސް ކޮމިޝަން (ޖޭއެއްސީ) އާއި ރައްޔިތުންގެ މަޖިލީހުގައި އޮތުމުން ކުރިން ތިއްބެވި ހުރިހާ ފަނޑިޔާރުން ވަކިކޮށް މުޅި ބެންޗު ބަދަލުކުރި އެވެ.

މިހާރު ބެންޗުގައި ތިއްބެވި ހުރިހާ ފަނޑިޔާރުންނަކީ ވެސް ކުރީގެ ރައީސް އައްޔަން ކުރައްޔަން ކުރެއްވި ބޭފުޅުންނެވެ.