އެމްޕީއެލްއަށް ސައުތު އޭޝިއަން ބިޒްނަސް އެކްސެލަންސްގެ ދެ އެވޯޑެއް

އައިމިނަތު ޝިޔާޒާ

23 ޑިސެމްބަރ 2024 - 14:00

0 comments

މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ސައުތު އޭޝިއަން ބިޒްނަސް އެކްސެލެންސް އެވޯޑްސް 2024 ގެ މުހިންމު ދެ އެވޯޑް ލިބިއްޖެ އެވެ.

މި މަހުގެ 20 ވަނަ ދުވަހު އޮތް އެ އެވޯޑު ހަފްލާގައި ދެކުނު އޭޝިއާގެ ހަތް ގައުމެއްގެ ކުންފުނިތަކާ ވާދަކޮށް، އެމްޕީއެލް އިން ވަނީ "އިނޮވޭޓިވް ލާނިން އެންޑް އޯގަނައިޒޭޝަނަލް ޑިވަލޮޕްމަންޓް ޕްރެކްޓިސް" އެވޯޑާއި "އިނޮވޭޓިވް ބިޒްނަސް އެވޯޑު" ހޯދައިފަ އެވެ.

އެ އެވޯޑު ހަފުލާގައި އެމްޕީއެލް އަށް ލިބުނު "އިނޮވޭޓިވް ބިޒްނަސް" އެވޯޑަކީ އެ އެވޯޑު ހަފްލާގެ ހާއްސަ ކެޓަގަރީގައި ހިމެނޭ އެވޯޑެކެވެ. އަދި މިއީ، އެ އެވޯޑު އެ ކުންފުންޏަށް ލިބުނު ފުރަތަމަ ފަހަރެވެ.

މިއީ އެމްޕީއެލްއަށް އިނޮވޭޓިވް ބިޒްނަސް ޓްރާންސްފޮމޭޝަން އެވޯޑް ލިބުނު ފުރަތަމަ ފަހަރެެވެ.

އެމްޕީއެލްއަށް އިނޮވޭޓިވް ލާނިން އެންޑް އޯގަނައިޒޭޝަނަލް ޑިވެލޮޕްމަންޓް ޕްރެކްޓިސް އެވޯޑް ލިބުނީ މުވައްޒަފުންނަށް ތަމްރީންތައް ދިނުމަށް ކުރަމުންދާ މަސައްކަތްތައް ފާހަގަކޮށެވެ.

އެމްޕީއެލްއަށް މި ދެ އެވޯޑްވެސް ލިބުނީ ދެކުނު އޭޝިއާގެ ހަތް ގައުމަކަށް ނިސްބަތްވާ ގިނަ ކުންފުނިތަކަކާ ވާދަކޮށްގެންނެވެ.

އެމްޕީއެލް އަކީ މުވައްޒަފުންނަށް ތައުލީމާއި ތަމްރީންގެ ފުރުސަތުތައް ތަނަވަސްކުރަން އެ ކުންފުނީގެ ލާނިން އެންޑް ޑިވެލޮޕްމަންޓް ޑިޕާޓްމަންޓް މެދުވެރިކޮށް ކޮންމެ އަހަރަކު ވެސް ގިނަ ކޯސްތަކަކާއި ތަމްރީނުތައް ހިންގާ އެޕްރެންޓިސް ޕްރޮގްރާމްތަކާއި އިންޓާންޝިޕް ޕްރޮގްރާމްތައް ވެސް ކުރިއަށް ގެންދާ ކުންފުންޏެކެވެ.

އެ ކުންފުނިން މި އަހަރު ކުރީކޮޅު މޯލްޑިވްސް މެރިޓައިމް ކޮންފަރެންސެއް ވެސް ވަނީ ބާއްވައިފަ އެވެ. އެ ކޮންފަރެންސަކީ މެރިޓައިމްގެ ދާއިރާއިން ރާއްޖޭގައި ބޭއްވި ފުރަތަމަ ބައިނަލްއަގުވާމީ ބައްދަލުވުމެވެ. އަދި އެ ކުންފުނިން ވަނީ މޮޑާން ޕޯޓް މެނޭޖްމަންޓް ކޯހެއް ވެސް މި އަހަރު ފަށައިފަ އެވެ.