އެޗްޑީސީގެ ބޯޑުގެ ސަސްޕެންޝަން އުވާލައިފި

ހަސަން ހަލީމް

24 ޑިސެމްބަރ 2024 - 13:55

0 comments

ކޮރަޕްޝަނާއި ހިޔާނާތުގެ ގިނަ މައްސަލަތަކެއް ދާދިފަހުން ފެންމަތިވި ހައުސިން ޑިވެލޮޕްމަންޓު ކޯޕަރޭޝަންގެ ޑިރެކްޓަރުންގެ ބޯޑުގައި ތިއްބެވި މެންބަރުންގެ ސަސްޕެންޝަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިއަދު އުވާލައިފި އެވެ.

އެ ބޯޑްގެ ޗެއާމަން ފިޔަވައި އެހެން ހުރިހާ މެންބަރުން ސަސްޕެންޑްކުރީ މިދިޔަ ހަފުތާގެ ބުރާސްފަތީގަ އެވެ. ޕްރައިވެޓައިޒޭޝަން އެންޑް ކޮޕަރަޓައޒޭޝަން ބޯޑް (ޕީސީބީ) އިން ބުނީ ބޯޑްގެ ޑިރެކްޓަރުން ސަސްޕެންޑްކުރީ އެޗްޑީސީއާ ގުޅޭ ތަހުގީގެއް ކުރިއަށްދާތީ އެކަމަށް މަގުފަހި ކުރުމުގެ ގޮތުން ކަމަށެވެ.

ބޯޑު ސަސްޕެންޑްކޮށްފައި ވަނިކޮށް އޭރު މެނޭޖިން ޑިރެކްޓަރަކަށް ހުންނެވި ފަޒުލް ރަޝީދު ވަނީ ބުރާސްފަތި ދުވަހުގެ ރޭ މަގާމުން އިސްތިއުފާ ވެސް ދެއްވައިފަ އެވެ. އަދި މިދިޔަ އާދީއްތަ ދުވަހު އެޗްޑީސީގެ އެމްޑީއަކަށް ސަރުކާރުން ވަނީ މައުރޫފް ޖަމީލް އައްޔަންކޮށްފަ އެވެ.

ޕީސީބީގެ ރައީސް ހަމްދީ އަގީލް އެޗްޑީސީގެ ޗެއާމަނަށް މިއަދު ފޮނުއްވި ސިޓީއެއްގައި ވިދާޅުވީ، އެ ސަސްޕެންޝަން މިއަދު ނިމުމަކަށް ގެނެސްފައިވާ ކަމަށެވެ. އެ ސިޓީގައި އިތުރު ވާހަކައެއް ނެތެވެ.

އެޗްޑީސީގެ ބޯޑުގައި ޗެއާމަން ނާސިފް އާއި މެނޭޖިން ޑިރެކްޓަރުގެ އިތުރުން ދެން ހިމެނިވަޑައިގަންނަވަނީ:

އަޒުހަރު އަބްދުﷲ ސައީދު
އިބްރާހިމް ޔޫސުފް ފުޅު
މުހައްމަދު ވިޝާމް
އުލާ މުހައްމަދު ރަޝީދު
އާރިފް އަބްދުއްސަމަދު
މުހައްމަދު ނާޖިލް
މުހައްމަދު ވަހީދު
ފާތިމަތު މިޒްނާ އަލީ
ޔޫސުފް ވަހީދު

ތަހުގީގާ ގުޅިގެން ކުރި ސަސްޕެންޝަން އުވާލި ނަމަވެސް، ބޯޑު މެންބަރުންގެ ޕާސްޕޯޓް އަދިވެސް ވަނީ ހިފަހައްޓައިފަ އެވެ. އެޗްޑީސީއާ ގުޅޭ ގޮތުން ހިންގާ ތަހުގީގާ ގުޅިގެން 20 މީހެއްގެ ޕާސްޕޯޓް ފުލުހުން އެދިގެން ހިފަހައްޓާފައިވެ އެވެ. އަދި ފަޒުލްގެ މެނޭޖުމަންޓުގައި އިސްކޮށް އުޅުނު 15 މީހަކު ވަނީ މިދިޔަ އާދިއްތަ ދުވަހު މަގާމުން ވަކިކޮށްފަ އެވެ.

ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، އެޗްޑީސީގެ ކުރީގެ އެމްޑީ ފަޒުލްގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާ އަށް ވަނީ ގޯތީގެ ރެޖިސްޓްރީއެއް ހަދައިފަ އެވެ. އޭނާގެ އިތުރުން އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން ވަނީ ފަޅާއަރައިފަ އެވެ. ފަޒުލް ވެސް ވަނީ އެ މަގާމުން ސަސްޕެންޑް ކޮށްފަ އެވެ.