މާރުކޭޓް ސަރަހައްދުން ގަވާއިދާ ހިލާފަށް އުޅުނު 23 ބިދޭސީއަކު އަތުލައިގަނެފި

މަރިޔަމް އަނާ

24 ޑިސެމްބަރ 2024 - 22:18

0 comments

މޯލްޑިވްސް އިމިގްރޭޝަނުން މިއަދު މާލޭ ލޯކަލް މާރުކޭޓް ސަރަހައްދުގައި ހިންގި ރެއިޑް އޮޕަރޭޝަނެއްގައި ގަވާއިދާ ހިލާފަށް އުޅުނު 23 ބިދޭސީން އެ މުއައްސަސާގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން ބުނީ ލޯކަލް މާރުކޭޓު ސަރަހައްދުގައި މިއަދު ފަތިހުން ފެށިގެން މެންދުރާ ހަމައަށް ކުރިއަށް ގެންދިޔަ މި ރެއިޑުގައި އެ ސަރަހައްދުގައި އަޅާފައިވާ އުޅަނދުފަހަރާއި، ލަފާފުރާ އުޅަނދުތައް ވެސް ބަލާފައިވާ ކަމަށެވެ.

މި ރެއިޑުގައި ޖުމްލަ 248 ބިދޭސީއަކު ބަލައި ފާސްކޮށް، ގަވައިދާ ހިލާފަށް އުޅޭ 22 ބިދޭސީ ފިރިހެނުންނާއި އެއް ބިދޭސީ އަންހެނަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށެވެ.

މީގެ ކުރިން ވެސް އިމިގްރޭޝަނުން ލޯކަލް މާރުކޭޓް ސަރަހައްދުގައި ރެއިޑް އޮޕަރޭޝަންތައް ކުރިއަށް ގެންގޮސް، ގަވާއިދާ ހިލާފަށް އުޅޭ ބިދޭސީން އަތުލައިގަނެފަ އެވެ.

އިމިގްރޭޝަނުން އަންނަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީން އުޅޭ ތަންތަން ފާހަގަކޮށް، އެ ބިދޭސީން އިމިގްރޭޝަންގެ ބެލުމުގެ ދަށަށް ގެނައުމަށްފަހު ޑީޕޯޓް ކުރަމުންނެވެ.

ހޯމް މިނިސްޓަރު އަލީ އިހުސާން މިދިޔަ މަހު ވިދާޅުވެފައި ވަނީ ރާއްޖޭގައި ގަވައިދާ ހިލާފަށް އުޅެމުން ދިޔަ ބިދޭސީންގެ ތެރެއިން 5،000 އެއްހާ މީހުން މިދިޔަ އެއް އަހަރު ތެރޭ ޑީޕޯޓު ކޮށްފައިވާ ކަމަށެވެ.