އެސްއޯއީތައް ހިންގުން ހަރުދަނާކުރަން އާ ގަވައިދެއް

މަރިޔަމް އަނާ

31 ޑިސެމްބަރ 2024 - 21:56

0 comments

ސަރުކާރު ކުންފުނިތަކުން ލޯނު ނަގާނަމަ ފިނޭންސް މިނިސްޓްރީގެ ހުއްދަ ހޯދަންޖެހޭ ގޮތަށް ހަމަޖައްސައިފި އެވެ.

ޕީސީބީ އިން މިފަދަ ގަވައިދެއް ހެދީ ސަރުކާރު ހިއްސާވާ ހުރިހާ ކުންފުންޏެއް ނުވަތަ ހުރިހާ އެސްއޯއީތަކުން އަމަލުކުރާނެ އާންމު އެއް އުސޫލެއް އޮންނަންޖެހޭ ކަމަށް ފެންނާތީ އެވެ.

ޕީސީބީ އިން މިދިޔަ ބުދަ ދުވަހު ފާސްކުރި ގަވައިދުގައިވާ ގޮތުން އެސްއޯއީ އަކުން ލޯން ނަގާނަމަ ޕީސީބީގެ އުސޫލުތައް ފުރިހަމަކުރުމަށްފަހު ހިއްސާދާރުންގެ ހުއްދަ ހޯދަންޖެހެ އެވެ. އަދި ލޯން ނަގަން ފާސްކުރާތާ ފަސް ދުވަހުގެ ތެރޭގައި ޕީސީބީއަށް އެކަން އެންގުމަށްފަހު ލޯން ނެގުމަށް ފިނޭންސް މިނިސްޓްރީގެ ހުއްދަ ހޯދުމަށް ހުށަހަޅަންޖެހެ އެވެ.

ޕީސީބީ އިން "ކޯޑް އޮފް ކޯޕަރޭޓް ގަވަނަންސް ފޯ ސްޓޭޓް އޯންޑް އެންޓަޕްރައިޒަސް"ގެ ނަމުގައި އެކުލަވާލި ގަވައިދުގައި އެސްއޯއީތައް ގިންތިކުރުމާއި، މެނޭޖިން ޑިރެކްޓަރުން، ޗެއާމަނުން އަދި ބޯޑު މެމްބަރުންގެ އިނާޔަތްތައް ދެވޭނެ ގޮތްތަކެއްވެސްވެ އެވެ.

ލޯނު ނެގުމާއި އޮނިގަނޑަށް ބަދަލުގެނައުމުގެ އިތުރަށް ކުންފުނިތަކުން އިންވެސްޓުމެންޓުތައް ހެދުމުގެ ކުރިންނާއި މުވައްޒަފުންނަށް ބޯނަސް ނުވަތަ އިންސެންޓިވްތައް ދިނުމަށް ނިންމުމުގެ ކުރިން ފިނޭންސް މިނިސްޓްރީން ހުއްދަ ނަގަންޖެހޭނެ އެވެ. އޭގެ ތެރޭގައި ކުންފުނީގެ މެނޭޖުމެންޓަށް ދޭ އިނާޔަތްތަކާއި، ބޯނަސް އަދި އިންސެންޓިވުތައްވެސް ހިމެނެ އެވެ.

އޭގެ އިތުރަށް ސަރުކާރުން އަލަށް އުފައްދާ ކުންފުނިތައް ގިންތިކުރުމުގައި އެ ކުންފުނީގެ މަގުސަދަށާއި ރައުސުލް މާލަށް ބިނާކޮށް ކުންފުނި ގިންތިކުރުމުގެ ބާރު ޕީސީބީއަށް ލިބިދޭ ގޮތަށް އުސޫލު ގާއިމުކޮށްފައިވެ އެވެ. އަދި އެ އުސޫލުގައި އައު ކުންފުނިތަކުގެ ބޯޑު މެންބަރުންނަށް ދޭ އިނާޔަތް ކަނޑައަޅާނެ އުސޫލުތައްވެސް ބަޔާންކޮށްފައިވެ އެވެ.

ޕީސީބީންވަނީ ސަރުކާރު ހިއްސާވާ ކުންފުނިތަކުގެ ނަމޫނާ ހިންގުމުގެ ގަވާއިދެއްވެސް އެކުލަވައިލާފަ އެވެ. އެ ބޯޑުން ބުނެފައިވަނީ މި ގަވާއިދަކީ އެ ކުންފުނިތަކުގެ ހިންގުން އިތުރަށް ހަރުދަނާކޮށް، ކޯޕަރޭޓް ގަވަނެންސްގެ ހަމަތައް ނެގެހެއްޓުމަށްތޚައި އެކުލަވާލާފައިވާ ނަމޫނާ ގަވާއިދެއްކަމަށް އެ ބޯޑުން ބުނެ އެވެ.