ރިފޯމް އޮފީހުގެ ކޮމިޝަނަރަކަށް އަސްމާ

އަލީ ރާޒީ

17 ޑިސެމްބަރ 2024 - 20:34

0 comments

އަސްމާ ޝަފީއު -- ފޮޓޯ: ޕީއެސްއެމް

ދައުލަތުގެ މާލީ ނިޒާމު ހަރުދަނާ ކުރުމަށް ކުރަމުންދާ މަސައްކަތުގައި އިސްރޯލެއް އަދާކުރަން އަލަށް އުފައްދާ އިކޮނޮމިކް ރިފޯމް އޮފީހުގެ ކޮމިޝަނަރަކަށް އަސްމާ ޝަފީއު ހަމަޖައްސައިފި އެވެ.

ފިނޭންސް މިނިސްޓްރީން މިއަދު ބުނީ، ދައުލަތުގެ މާލީ ނިޒާމު ހަރުދަނާ ކުރުމުގެ ގޮތުން ކުރިއަށްގެންދާ މަސައްކަތްތަކުގެ ތެރެއިން، ދައުލަތުގެ އެކިއެކި ދާއިރާތައް ރިފޯމް ކުރުމާބެހޭ މަސައްކަތްތައް ހަލުވި ކުރުމަށްޓަކައި މާލީ ވުޒާރާއިން ގާއިމުކޮށްފައިވާ އިކޮނޮމިކް ރިފޯމް އޮފީހުގެ ކޮމިޝަނަ އޮފް ރިފޯމްގެ މަގާމަށް އަސްމާ ހޮވައިފައިވާ ކަމަށެވެ.

މީގެ ކުރިން އަސްމާ ވަނީ މީރާގެ ޑިރެކްޓާ ޖެނެރަލް، ޕްލޭނިން އެންޑް ޑެވެލޮޕްމެންޓްގެ މަގާމާއި ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމު ފުރުއްވާފަ އެވެ.

ރިފޯމް ކޮމިޝަނަރު ރިޕޯޓުކުރާނީ ފިނޭންސް މިނިސްޓަރު އަދި މިނިސްޓަރުގެ އެޑްވައިޒަރުންނަށް ކަމަށް ފިނޭންސުން އާންމުކުރި ޓާމް ޝީޓުގައިވެ އެވެ.

ސަރުކާރުން ރިފޯމް އޮފީހެއް އުފައްދާފައި މިވަނީ ހަރަދުތައް ކުޑަކުރުމަށާއި އެސްއޯއީތައް ރިފޯމްކުރަން ގިނަ ކަންތައްތަކެއް ކުރަން ރާވާފައިވާ ދަނޑިވަޅެއްގަ އެވެ. އޭގެ ތެރޭގައި އަންނަ އަހަރުން ފެށިގެން ސަބްސިޑީ ދޭ ގޮތް ބަދަލުކުރުމާއި އާސަންދަ ރިފޯމާއި ބައެއް ކުންފުނިތައް އުވާލުމާއި އެއްކޮށްލުން ހިމެނެ އެވެ.