ފްލެޓް ލިބުނު 4000 ގެ ލިސްޓު ވެރިފައި ކުރަނީ

އަލީ ރާޒީ

14 ޖެނުއަރީ 2025 - 20:46

0 comments

ކުރީ ސަރުކާރުން ހިންގި ގެދޮރުވެރިޔާ ސްކީމުގެ ދަށުން އިމާރާތް ކުރި ފްލެޓްތައް

މިދިޔަ ސަރުކާރުން ހިންގި ބޯހިޔާވަހިކަމުގެ މަޝްރޫއު، ގެދޮރުވެރިޔާ ސްކީމަށް ކުރިމަތިލާފައިވާ 20،000 މީހުންގެ ފޯމުތައް އިވެލުއޭޓްކުރުމުގެ ބަދަލުގައި މިދިޔަ ސަރުކާރުން އިއުލާނުކުރި 4000 މީހުންގެ ފުލެޓު ލިސްޓު ވެރިފައިކުރުމުގެ މަސައްކަތް ކުރަން ސަރުކާރުން ނިންމައިފި އެވެ.

ހައުސިން މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އަބްދުﷲ މުއްތަލިބް ވިދާޅުވީ ޖޫން 26، 2022 ގައި އިއުލާން ކުރި ސްކީމުގެ ތެރެއިން ދެ ކޮޓަރީގެ އެޕާޓްމަންޓުތަކަށް 6،000 މީހުން އަދި ތިން ކޮޓަރީގެ އެޕާޓްމަންޓްތަކަށް 14،000 މީހުން ކުރިމަތިލާފައިވާ ކަމަށެވެ.

އެ ހުށަހެޅުންތައް ރީ އިވެލުއޭޓް ކުރުމުގެ މަސައްކަތް ކުރުމާއި ފައިނަލް ލިސްޓު ނެރުމުގެ މަސައްކަތް މިދިޔަ 14 މަސް ތެރޭގައި ކުރަން މަސައްކަތް ކުރުމަށް ފަހު ބޮޑެތި މައްސަލަތައް ފާހަގަވެފައިވާތީ އެ ލިސްޓު އާންމު ކުރުން ވަރަށް ބޮޑަށް ލަސްވެފައިވާ ކަމަށް މުއްތަލިބް ވިދާޅުވި އެވެ.

މިނިސްޓަރު ވިދާޅުވި ގޮތުގައި ސަރުކާރުން މިހާރު ނިންމާފައި ވަނީ ކުރީ ސަރުކާރުން އިއުލާން ކުރި 4،000 ފްލެޓްގެ ލިސްޓު ވެރިފައި ކުރުމުގެ މަސައްކަތް ފެށުމަށެވެ. އެކަން ކުރާއިރު އޭރު ހެދިފައިވާ އުސޫލުތަކަށް ރިއާޔަތް ކުރާނެ ކަމަށް ވެސް ވިދާޅުވި އެވެ.

"މިއީ ފޯމުލީ ފަރާތްތަކުގެ ރި އިވެލުއޭޝަނެއް ނޫން. އަޅުގަނޑުމެން 20،000 ފޯމު އަލުން ރި އިވެލުއޭޓް ނުކުރާނަން. މިއީ ފްލެޓް ލިބޭނެ ކަމަށް 15 ނޮވެމްބަރު 2023 ގައި އިއުލާނު ކުރެވުނު ލިސްޓުގައިވާ 4،000 ފަރާތް ވެރިފައި ކުރުމަށް ކުރެވޭ މަސައްކަތެއް،" މުއްތަލިބް ވިދާޅުވި އެވެ.

އޭނާ ވިދާޅުވީ، މާލޭގައި 15 އަހަރު ދިރިއުޅުނުކަން ސާބިތުކޮށްދޭން ހުށަހެޅިދާނެ ލިޔެކިޔުންތައް ކަމަށް ޕޯޓަލްގައި ބަޔާންކޮށަފއިވާ ލިޔުންތަކަކީ މި ސްކީމުގައި ފޯމުތައް އިވެލުއޭޓްކުރަން ބަލަންޖެހޭ ލިޔުންތައް ކަމަށެވެ.

އޭގެ ތެރޭގައި:

މާލޭގައި ވަޒީފާ އަދާ ކުރިކަމުގެ ލިޔުން.
އަނބިމީހާ، ފިރިމީހާ ކައިވެނި ކުރުމަށް ފަހު ވަޒީފާ އަދާ ކުރިކަމުގެ ލިޔުން.
ސްކޫލު، ކޮލެޖް، ޔުނިވާސިޓީގައި ކިޔަވަމުންދާކަމުގެ ލިޔުން.
އަނބިމީހާ، ފިރިމީހާ ކައިވެންޏަށް ފަހު ސްކޫލް، ކޮލެޖް، ޔުނިވާސިޓީގައި ކިޔަވަމުންދާކަމުގެ ލިޔުން.
ދަރިން މާލެ ސްކޫލް، ކޮލެޖު، ޔުނިވާސިޓީގައި ކިޔަވަމުންދާކަމުގެ ލިޔުން.
ޕެންޝަނާ ބެހޭ ލިޔުންތައް.

މިނިސްޓަރު ވިދާޅުވީ، ޕޯޓަލްގައި ހުށަހެޅިދާނެ ކަމަށް ބަޔާންކޮށަފައިވާ ލިޔުންތައް ނޫން ލިޔުންތަކަކީ ގާނޫނީ ގޮތުން ބަލައިގަނެވިދާނެ ލިޔުންތަކެއް ނޫން ކަމަށެވެ.

"އަޅުގަނޑުމެންގެ އުއްމީދަކީ ރޯދަ މަސް އަންނަން ވާއިރަށް މި ވެރިފިކޭޝަންގެ މަސައްކަތް ނިންމައި ގެޒެޓު ކުރުން. ލިސްޓު ގެޒެޓު ކުރެވޭނީ ކޮންމެ މީހެއްގެ ޕޮއިންޓު ލިބުނު ގޮތާއި ހޮވުނިއްޔާ ހޮވުނު ގޮތް، ނުހޮވޭ ނަމަ އެކަން އެނގޭނެހެން ތަފްސީލާ އެކު،" މުއްތޮލިބު ވިދާޅުވި އެވެ.

ފްލެޓު ލިސްޓާ ގުޅޭ ގޮތުން މިދިޔަ ހަފްތާ ރައީސް މުއިއްޒު ވިދާޅުވީ މިހާރު ކުރަމުން ދަނީ ވައުދުވެވަޑައިގެންނެވި ގޮތަށް ގޯއްޗާއި ފްލެޓު ދޫކުރުމަށް ކުރަން ޖެހޭ މަސައްކަތްތައް ކަމަށާއި ކުރިއަށް އޮތް ރޯދަ މަހުގެ ކުރިން ފްލެޓު ލިސްޓް އާންމުކުރެވޭ ކަމަށް ގަބޫލުކުރައްވާ ކަމަށެވެ.