ސަރުކާރުގެ ހުރިހާ ހިދުމަތެއް ޑިޖިޓަލައިޒްކުރަން ބޭނުން: ރައީސް

އަލީ ރާޒީ

17 ޖެނުއަރީ 2025 - 11:13

0 comments

މި ދައުރުގެ ތެރޭގައި ސަރުކާރުގެ ހުރިހާ ހިދުމަތެއް ޑިޖިޓަލް ކުރުމުގެ މަސައްކަތް ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ އެމަނިކުފާނު އެސްޓޯނިއާއަށް ކުރެއްވި ދަތުރުފުޅަށްފަހު ދައުލަތުގެ މީޑިޔާ ޕަބްލިކް ސާވިސް މީޑިޔާ (ޕީއެސްއެމް)އަށް ދެއްވި ބަސްދީގަތުމެއްގަ އެވެ. އެމަނިކުފާނު ފާހަގަކުރެއްވި ގޮތުގައި އެމަނިކުފާނު އެސްޓޯނިއާއަށް ކުރެއްވި ދަތުރުފުޅަކީ އާންމު ހިދުމަތްތައް ޑިޖިޓަލައިޒްކުރުމާއި ޑިޖިޓަލް އިގުތިސާދެއް ބިނާކުރުމުގައި ދުނިޔޭގެ ނިސްބަތުންވެސް އެންމެ ބޮޑު ކާމިޔާބެއް ހޯދާފައިވާ އެސްޓޯނިއާއިން އެ ދާއިރާތަކުން ހާސިލުކުރި ކާމިޔާބުގެ ތަޖުރިބާ ހޯއްދެވުމާއި، އެ ގައުމުގެ އެހީތެރިކަން އެކި ދާއިރާތަކުން ހޯއްދެވުމެވެ.

އެގޮތުން އެ ދަތުުރުފުޅުގައި ތިން ދާއިރާއަކުން އެއްބާރުލުން ދިނުމާ ގުޅޭ ގޮތުން ދެ ގައުމުގެ މެދުގައި ފަހުމުނާމާތަކުގައި ސޮއިކުރެވިފައިވާކަން ރައީސް ފާހަގަކުރެއްވި އެވެ. ތިމާވެށީގެ ދާއިރާގެ އިތުރަށް ޑިޖިޓަލައިޒޭޝަންގެ ދާއިރާއިން ދެ ގައުމުގެ މެދުގައި އެއްބާރުލުންދިނުމާ ގުޅޭ ފަހުމުނާމާތަކުގައި ސޮއިކުރެވިފައިވާކަމަށް ރައީސް ވިދާޅުވި އެވެ.

"އަޅުގަނޑުމެން ކުރިއަށްދިއުމުގައި ތިން ދާއިރާއަކުން އެމްއޯޔޫގައި ސޮއިކުރެވިގެންދިޔަ. އޭގެ ތެރޭގައި ޑިޖިޓަލައިޒޭޝަންގެ ދާއިރާއިން ރާއްޖޭގެ ކަންކަން ބައްޓަންކުރުމުގައި އެ ބޭފުޅުންގެ އެހީތެރިކަން ދިނުމާ ގުޅޭ ގޮތުން މަޝްވަރާކުރުމާ ބެހޭ ގޮތުން ސޮއިކުރެވުނު އެމްއޯޔޫ. އަނެއް އެމްއޯޔޫއަކީ ތިމާވެއްޓާ ބެހޭ ކަންކަމާ [ގުޅޭ އެމްއޯޔޫ]" ރައީސް ވިދާޅުވި އެވެ.

ކުރިއަށް އޮތް ތިން ހަތަރު އަހަރުގެ ތެރޭގައި ރާއްޖޭގެ ސިއްހީ ދާއިރާއާއި ތައުލީމީ ދާއިރާއާއި އާންމު ހުރިހާ ހިދުމަތެއް ޑިޖިޓަލައިޒްކުރުމުގެ މަސައްކަތް ކުރެވިގެންދާނެ ކަމަށާއި، އެ މަސައްކަތުގައި އެންމެ ބޮޑަށް ބޭނުންވަނީ ސަރުކާރުގެ މުވައްޒަފުން އަދި ޖުމްލަކޮށް ހުރިހާ ރައްޔިތުންގެ އެހީތެރިކަން ކަމަށްވެސް ރައީސް ވިދާޅުވި އެވެ.

އެސްޓޯނިއާ އަކީ މި ދާއިރާ އިން އެންމެ ކުރިއަރާފައިވާ ގައުމުކަން ފާހަގަކުރައްވަމުން ރައީސް ވަނީ ކުރިއަށް އޮތް ތަނުގައި މި ދާއިރާއިން ރާއްޖެއަށް އެހީތެރިކަން ފޯރުކޮށްދޭނެ ކަމަށް އެސްޓޯނިއާ އިން ބުނުމަކީ ރާއްޖެ ގެންދަން ބޭނުންވާ މިސްރާބަށް ގެންދިޔުމުގައި ލިބޭ ބޮޑު ކުރިއެރުމެއް ކަމަށްވެސް ވިދާޅުވެފަ އެވެ.

ރައީސް މުއިއްޒު އެސްޓޯނިއާ އަށް ކުރެއްވި ދަތުރުފުޅަކީ އެގައުމުގެ ރައީސް ޑރ. އަލާރް ކަރިސްގެ ދައުވަތަކަށް ކުރެއްވި ދަތުރުފުޅެކެވެ.

މިއީ ރާއްޖޭގެ ރައީސަކު އެސްޓޯނިއާ އަށް ކުރެއްވި ފުރަތަމަ ދަތުރުފުޅެވެ.