ތިނަދޫ ކައުންސިލަށް އޭސީސީން ވަދެ ބައެއް ތަކެތި ގެންގޮސްފި

އަހުމަދު ނިހާން

27 ޖެނުއަރީ 2025 - 11:22

0 comments

ގދ. ތިނަދޫ ސިޓީ ކައުންސިލްގައި ބައެއް ފުލުހުން ހަރަކާތްތެރިވަމުން ދަނީ- ފޮޓޯ: ތިނަދޫ ސިޓީ ކައުންސިލު

ތިނަދޫ ސިޓީ ކައުންސިލަށް އެންޓި ކޮރަޕްޝަން ކޮމިޝަން (އޭސީސީ) އިން ވަނުމުން، އޮފީހަށް ވަނީ އޭސީސީއިން ކަން ބަލައިނުގަނެ، ބަޔަކު އޮފީހަށް ވަދެ ވައްކަން ކޮށްފައިވާ ކަމަށް ކައުންސިލުން ބުނެފި އެވެ.

ތިނަދޫ ސިޓީ ކައުންސިލުން ފޭސްބުކްގައި ކުރި ޕޯސްޓެއްގައި ބުނީ އޭސީސީގެ ނަމުގައި ބަޔަކު ކައުންސިލް އޮފީހަށް ވަދެ ވައްކަން ކުރި މައްސަލަ ފުލުހުންނަށް ހުށަހެޅުމުން ތަހުގީގު ކުރަމުންދާ ކަމަށެވެ.

"ތިނަދޫ ސިޓީ ކައުންސިލްގެ ގިނަ އަދަދެއްގެ ތަކެތި އޭސީސީގެ ނަމުގައި އައި ބަޔަކު ވަގަށް ނަގައިފި. މި މައްސަލަ މޯލްޑިވްސް ޕޮލިސް ސާވިސްއަށް ހުށަހެޅި ބަލަމުންދާތީ ކައުންސިލްގެ ބައެއް ހިދުމަތްތައް މެދުކެނޑިފައިވާ ވާހަކަ ދަންނަވަން،" ކައުންސިލްގެ ޕޭޖުގައި ލިޔެފައިވެ އެވެ.

ފުލުހުން ވެސް މީޑިއާތަކަށް ބުނީ ތިނަދޫ ސިޓީ ކައުންސިލުން ވައްކަން ކޮށްފައިވާ މައްސަލައެއް މިއަދު ފުލުހަށް ހުށަހަޅާފައިވީ ނަމަވެސް މިހާތަނަށް ބެލިބެލުމުން އެފަދަ ކަމެއް ހިނގާފައިވާ ކަމަށް ނުބެލެވޭ ކަމަށެވެ.

އިދިކޮޅު އެމްޑީޕީގެ މޭޔަރަކާއި އެ ޕާޓީގެ މެޖޯރިޓީ އޮތް ތިނަދޫ ސިޓީ ކައުންސިލްގެ ގިނަ މައްސަލަތަކެއް އޭސީސީއަށް ހުށަހެޅުއްވީ، ރައްޔިތުންގެ މަޖިލީހުގައި ތިނަދޫ އުތުރު ދާއިރާ ތަމްސީލްކުރައްވާ ޕީއެންސީގެ މެންބަރު ސައުދުﷲ ހިލްމީ އެވެ.

ނަމަވެސް އޭސީސީން ބަލަމުންދަނީ ތިނަދޫ ސިޓީ ކައުންސިލާ ގުޅޭ ކޮން މައްސަލައެއް ކަމެއް އެ ކޮމިޝަނުން ހާމަކޮށްފައެއް ނުވެ އެވެ.