އެފްއޭއެމްގެ އެކްޓިން ޖެނެރެލް ސެކްރެޓަރީއަކަށް ޝުޖާއު

އިސްމާއިލް ރިޒާ

04 ފެބުރުއަރީ 2025 - 14:25

0 comments

ޝުޖާ: އޭނާ ކުރިން ވަނީ އައްޑޫ ސިޓީ ކައުންސިލްގެ ސެކްރެޓަރީ ޖެނަރަލްގެ މަގާމު އަދާކުރައްވާފަ

އެފްއޭއެމްގެ ހުސްވެފައިވާ ޖެނަރަލް ސެކްރެޓަރީގެ މަސްއޫލިއްޔަތުތައް އައްޑޫ ސިޓީ ކައުންސިލްގެ ކުރީގެ ސެކްރެޓަރީ ޖެނަރަލް މުހައްމަދު ޝުޖާއު ހަމަޖައްސަވައިފި އެވެ.

އެފްއޭއެމްގެ ނޯމަލައިޒޭޝަން ކޮމިޓީގެ ރައީސް އަޙްމަދު ޒުހޫރު ވިދާޅުވީ ޝުޖާއު އެ މަގާމަށް ހަމަޖެއްސީ އިއްޔެގެ ވަގުތެއްގައި ކަމަށާއި އެ މަގާމަށް އެހެން ޖެނެރަލް ސެކްރެޓަރީއެއް އައްޔަނުކުރެވެން ދެން އެ ޒިންމާ އަދާކުރާނީ ޝުޖާއު ކަމަށެވެ.

އެފްއޭއެމްގެ ޖެނެރަލް ސެކްރެޓަރީގެ މަގާމު ހުސްވީ އެ މަގާމުގައި ހުރި ނާހިލް އަހްމަދު ސިއްދީގު މިދިޔަ އަންގާރަ ދުވަހު އަމިއްލައަށް އިސްތިއުފާދިނުމުންނެވެ. އެއަށްފަހު ޝުޖާއު މަގާމަށް އައްޔަނުކުރުމާއި ހަމަޔަށް މަގާމު އަދާކުރީ އެފްއޭއެމްގެ ނޯމަލައިޒޭޝަން ކޮމިޓީގެ މެމްބަރު އިސްމާއިލް ސިމަން އެވެ.

ޝުޖާއު ވަނީ ސަރުކާރު ކުންފުނިތަކުގެ އެކި އިސް މަގާމުތައް މީގެކުރިން ފުރުއްވާފަ އެވެ. ސަރުކާރާއި ކުންފުނިތަކުގެ އެކި މަގާމުތަކުގައި 29 އަހަރުވަންދެން ހިދުމަތް ކުރެއްވި ޝުޖާއު އެސްޓީއޯގެ ޖެނަރަލް މެނޭޖަރުގެ މަގާމު ވެސް އޭނާ އަދާކުރެއްވި އެވެ. އޭނާ ވަނީ ސައިންސް އެންޑް ޓެކޮނޮލޮޖީ ދާއިރާއިން މާސްޓާސް ޑިގްރީ ހާސިލު ކުރައްވައިފަ އެވެ. އެންމެ ފަހުން އަދާކުރެއްވީ އައްޑޫ ސިޓީ ކައުންސިލްގެ ސެކްރެޓަރީ ޖެނެރަލްގެ މަގާމެވެ.

އައްޑޫ ކައުންސިލްގެ އެސްޖީގެ މަގާމުން އޭނަ އިސްތިއުފާ ދެއްވީ މިދިޔަ އަހަރުގެ އޮގަސްޓް މަހު އެވެ. ޝުޖާއު އެ މަގާމަށް އައްޔަން ކުރީ 2021 ގަ އެވެ. އޭނަ އަކީ ކުރިން ސަރުކާރުގެ ބައެއް ކުންފުނިތަކުގެ އިސް މަގާމުތަކެއް ވެސް ފުރުއްވި ބޭފުޅެކެވެ. އޭގެ ތެރޭގައި އެސްޓީއޯގެ ޖެނެރަލް މެނޭޖަރުގެ މަގާމާއި މޯލްޑިވް ގޭހުގެ ބޯޑު ޑިރެކްޓަރުގެ މަގާމު ހިމެނެ އެވެ.