ކުނި މަގުމަށްޗަށް ނުނެރުމަށް އިލްތިމާސްކޮށްފި

އައިމިނަތު ޝިޔާޒާ

05 ފެބުރުއަރީ 2025 - 13:53

0 comments

ކުނި ނޭޅުމަށް އެދި ހަރުކޮށްފައިވާ ބޯޑެއްގެ ކުރިމައްޗަށް ކުނި އަޅާފައި - ފޮޓޯ: ދައުރު

އަންނަ މާޗު މަހު ފަށާ ރޯދަ މަހަށް ތައްޔާރުވުމަށް ގޭތެރެ ސާފުކުރުމަށް ފަހު އުފެދޭ ކުނި މަގުމައްޗަށް ނޭޅުމަށް އެންވަޔަރަމެންޓު ޕްރޮޓެކްޝަން އެޖެންސީ (އިޕީއޭ)ން މިއަދު އިލްތިމާސް ކޮށްފި އެވެ.

އީޕީއޭއިން އިއްޔެ ނެރުނު ބަޔާނެއްގައިވަނީ ރޯދަ މަހަށް ތައްޔާރުވުމުގެ ގޮތުން، ތަންތަން ސާފު ކުރުމަށްފަހު ނެރޭ ގިނަ އަދަދެއްގެ ކުނިތައް މަގުތަކާއި ދުވާރު މަތީގައި ބަހައްޓާކަން ފާހަގަ ކުރެވިފައިވާ ކަމަށެވެ. އަދި ފިހާރަތަކުންނާއި ގޭބިސީތަކުން މަގުމަތީގައި ކުނި ބަހައްޓާކަން ފާހަގަ ކުރެވޭ ކަމަށް އެ ބަޔާނުގައިވެ އެވެ.

އޭގެ ސަބަބުން ސިއްހީ ގޮތުން ބޮޑެތި ބަލިތައް ފެތުރި އަދި މަގުތައް ސާފުތާހިރުކަން ގެއްލުމާއެކު، ހިނގާ މީހުންނަށް ވެސް ދަތިތަކާ ކުރިމަތިވާ ކަމަށް އީޕީއޭގެ ބަޔާނުގައިވެ އެވެ. އަދި އެކަމަކީ ގާނޫނީ ގޮތުން މަނާ ކަމެއްކަން ވެސް އެ ބަޔާނުގައި ފާހަގަ ކޮށްފައިވެ އެވެ.

"އަދި [މިއީ] ސިއްހީ ގޮތުން ބޮޑެތި މައްސަލަތަކެއް ކުރިމަތިވެދާނެ ކަމެއް ކަމުގައި ވާތީވެ، މަގުމައްޗަށާއި ހުސްކޮށް ހުންނަ އިމާރާތްތަކަށާއި އާންމު ސަރަހައްދުތަކަށް ކުނިބުނި ނޭޅުމަށް ދަންނަވަމެވެ،" އިއުލާނުގައިވެ އެވެ.

އެހެންކަމުން ރޯދަ މަހަށް ތައްޔާރުވުމުގެ ގޮތުން ކުނި އުކާލުމުގެ އިންތިޒާމްތައް ކުނި މެނޭޖް ކުރުމުގެ ހިދުމަތްދޭ ފަރާތްތަކާއި ވޭސްޓް މެނޭޖަންޓް ކޯޕަރޭޝަނާއި ގުޅިގެން ހަމަޖެއްސުމަށް އެ ބަޔާނުގައި އީޕީއޭއިން އެދިފައިވެ އެވެ.

ކޮންމެ އަހަރަކުވެސް ރަމަޟާން މަހާ ދިމާކޮށް ގޭބިސީތައް ސާފުކުރުމަށްފަހު އުފެދޭ ބޮޑެތި ކުނި މަގުމައްޗަށް އުކާލާ މައްސަލަ ބޮޑުވެއެވެ. މިގޮތަށް ކުނި އުކާލާ ފަރާތްތަކާމެދު ފިޔަވަޅުވެސް އަޅައެވެ.