މުސާރައާއި އިނާޔަތްތަކަށް ކުރި ހަރަދު އިތުރުވެއްޖެ

އައިމިނަތު ޝިޔާޒާ

20 ފެބުރުއަރީ 2025 - 21:48

0 comments

މި އަހަރު ފެށިގެން ފެބްރުއަރީ 13ވަނަ ދުވަހާ ހަަމައަށް ތަރައްގީގެ މަޝްރޫއުތަކަށް ދައުލަތުން ކުރި ހޭދަ، މިދިޔަ އަހަރުގެ މި މުއްދަތަށްވުރެ ދެ ގުނައަށްވުރެ ބޮޑަށް ދަށްކަން ހާމަވިއިރު، މުސާރައާއި އިނާޔަތްތަކަށް ކުރި ހަރަދު އިތުރުވެއްޖެ އެވެ.

ފިނޭންސް މިނިސްޓްރީން ކޮންމެ ހަފްތާއަކު އެއް ފަހަރު އާންމުކުރާ ތަފާސްހިސާބުތަކަށް ބަލާއިރު މިމަހުގެ 13 ވަނަ ދުވަހުގެ ނިޔަލަށް މުސާރައާއި އިނާޔަތްތަކަށް 1.14 ބިލިއަން ރުފިޔާ ހޭދަކޮށްފައިވެ އެވެ.

ފާއިތުވި އަހަރުގެ އެ މުއްދަތުގައި މުސާރައާއި އިނާޔަތްކަށް ހަރަދުކުރީ 1.02 ބިލިއަން ރުފިޔާ އެވެ. އެއީ 11 އިންސައްތައިގެ އިތުރުވުމެކެވެ.

މިމުއްދަތުގައި ދައުލަތަށް އާމްދަނީގެ ގޮތުގައި ލިބުނީ 4.4 ބިލިއަން ރުފިޔާ އެވެ. މި މުއްދަތުގައި ހަރަދުކޮށްފައިވަނީ 3.04 ބިލިއަން ރުފިޔާ އެވެ.

އޭގެ ތެރެއިން ރިކަރަންޓު ޚަރަދަށް ހޭދަކޮށްފައިވަނީ 2.87 ބިލިއަން ރުފިޔާ އެވެ.

ނަމަވެސް ރިކަރަންޓް ޚަރަދުތަކުގެ ތެރެއިން، މުސާރައާއި އިނާޔަތްތަކާއި ޕެންޝަންތަކަށް ވެސް ކޮށްފައިވާ ހޭދަވަނީ މިދިޔަ އަހަރަށްވުރެ މި އަހަރު އިތުރުވެފައެވެ. މިދިޔަ އަހަރުގެ މި މުއްދަތުގެ ޖުމްލަ 1.02 ބިލިއަން ރުފިޔާ ހޭދަކުރި ނަމަވެސް މި އަހަރު 1.14 ބިލިއަން ރުފިޔާ ހޭދަކުރިއެވެ. އެއީ 11.4 ޕަސެންޓްގެ އިތުރުވުމެކެވެ.